Biblia Todo Logo
Bìoball air-loidhne

- Sanasan -

2 Minkte 2 - Bible en langue Bulu

1 Ane Solômon a nga lañe bôte toyini mewôme zamgbwa asu mbeʼane mimbeʼe, beba mekok , e minkô, bôte toyini mewôme muam a bôte toyini éla a mintete misamane ya fombô ésaé ba bo.

2 Solômon a nga lôme bôt be kate Uram, njô bôte ya Tir na: Boʼo ma avale fe ô nga bo David ésaa wom na ô nga lôme nye besédre asu ya lôñe nda ya tabe.

3 Tame yene na ma, e mone wé, ma zu lôñe nda , asu jôé Nti, e Zambe wom, a telé je étyi asu dé, asu ya diʼi ôlobinda a ne mbamba menyum ôsu vié, asu ya liti minnoñ mi belet éyoñ ése, a mimvean ba diʼi ngumba, mametyé a mamengôʼé, a besabat, e meté me ngon a éyoñe ya beta mebôʼô me Nti, e Zambe wongan, avalʼane Israél a yiane bo jame te melu mese.

4 Nda ma zu lôñ ja yiane bo anen, amu Zambe wongan a ne anen a dañe bezambe bese.

5 Ve za a bili nguleya lôñe nye nda , amu na yôp a yôbe ya môp é se nguleya yiane nye? A me nga ye bo za asu ya lôñe nye nda nge é nji ye bo asu ya diʼi biôm bi ne mbamba menyum ôsu vié?

6 Eyoñe ji lôme ma e môt a yeme bo ésaé or, argent, mvot a étyé, nalé fe nyô a yeme dube biyé évele, angôô nge blum, a yeme fe kpwele biôm. Ba be bôte bam ba ye saé, e ba ésaa wom David a nga top, mbe be too Yérusalém nge mevôm mefe e si ya Yuda été.

7 Lôme fe ma bilé bi sédre, sipré a santal, bi soʼok e Libañ, amu ma yeme na bebo bisaé bôé ba yeme tyiʼi bilé ya Libañ, a bebo bisaé bam ba be émbôé ba ye ke,

8 asu ya kôme ma abui bilé, amu e Nda ma zu lôñ ja ye bo anen a abeñ.

9 Mfaʼa wom, ma ye ve bebo bisaé bôé ba tyiʼi bilé, fôn, tône toyini ésaman, nlisi tône toyini ésaman, woon lita toyini mintete muam a belita be mbon toyini mintete muam.

10 Ane Uram, njô bôte ya Tir, a nga yalan e kalate a nga lôme Solômon été na: Amu Nti a yem ayoñe bôte dé nde a nga telé wo na ô jôô be.

11 Uram a nga beta fe jô na: Nti, Zambe ya Israél, a boʼo ébotan, Nyô a nga té yôb a si, amu a nga ve njô bôte David mfefeʼe mon, Nyô a yeme fase mam a too fe atyeñ, nyô a zu lôñe Nti nda , a lôñe fe ndaa njô bôt asu dé!

12 Eyoñe ji, ma lôme wo ntyetyeñe môt wo yeme fas,

13 Uram-Abi, e mone minga ya bengone be Dañ, ésaa a too mone Tirieñ. A yem ésaé or, argent, mvot a étyé, akok a bilé, bindelé bi ne nduban évele a blum, bindelé bi bisus a Karmin. A yem ésaé nkpwelane biôm a mboone biôm bise ba ye ve nye na a bo, ba be mintyetyeñ mi bôte bôé a mintyetyeñ mi bôt Esaa wom David, ésoo.

14 Eyoñe ji, e Nti wom a lôme bebo bisaé bé avut, nlisi, mbon a woon wo te jô bie.

15 Mfaʼa wongan bia ye tyiʼi bilé ya Libañ abim ese wo ye kômbô; bia ye lôme wo bie e mañe mañ a kui e Yafa, éyoñe te wo ye bo na bi bet a kui e Yérusalém.

16 Ane Solômon a nga lañe mintabe mise mi mbe si ya Israél été, avale David ésaa wé a nga lañe mie. Be nga koone mi too toyini ntet, mewôm metan a éla a mintet misaman.

17 A nga nyoñe toyini mewôme zamgbwa asu ya beʼe mimbeʼe, toyini mewôme muam ane beba mekok e nkôle yôp, a bôte toyini éla a mintete misaman asu ya fombô a tindi bôte na be saé.

© LʼAlliance Biblique du Cameroun, 2009

Bible Society of Cameroon
Lean sinn:



Sanasan