2 Minkte 19 - Bible en langue Bulu

Nkulu mejô Yéhu a wosan élate Yôzafat ba Akab

¹ Ane Yôzafat, njô bôte ya Yuda, a nga bulane mvoʼé e nda jé Yérusalém.

² Nde Yéhu, e mone ñyene mam Anani, a nga ke tôbane nye. A nga jô njô bôte Yôzafat na: Ye ba yiane volô mbo abé , a ye wo nyeʼe ba ba vini Nti? Amu nalé, Nti a wôʼô wo abé .

³ Ve mbamba be mam be ne be wo, amu ô nga vose mekône mʼAkéra e si a ô nga ve nleme wôé mfaʼa ya jeñe Zambe.

Yôzafat a telé betyiʼi mejô

⁴ Ane Yôzafat a nga tabe e Yérusalém, nde a nga beta ke a wulu e be bôte ya ayoñ, ataté Birséba a kui e minkôle mi Efrayim, nde a nga bo na be bulan e be Nti, Zambe bʼésaa bap.

⁵ A nga telé betyiʼi mejô e bitisone bise ya si ya Yuda bi nga bili alem, e tison ése.

⁶ A nga jô betyiʼi mejô na: Tabaʼane ntyel mfaʼa jam mia ye bo amu mia ye ke be tyiʼi mejô asu bôt, vʼasu Nti nye a ye tabe be mia éyoñ mia kobô mejô.

⁷ Eyoñe ji nkoone Nti woñ ô tabeʼe be mia; tabaʼane ntyel éyoñ mia ye bo mam, amu mvô, nsemane mingumba mi bôt a nyoñan éboteze, bi nji bo e be Nti e Zambe wongan.

⁸ Avale te fe, mbulane ya Yérusalém, Yôzafat a nga telé Belévit, betuni a bivete menda me bôte ya Israél asu ntyiʼane mejô Nti a asu mejô bôt ba sôane ntyiʼan.

⁹ A nga bendé be na: Mia ye bo avale di e nkoone Nti woñ été, zôsôô a e nlem ô nji bo nkaban.

¹⁰ Ajô ese e bobenyoñ be too bitisone biap ba ye liti mia e fombôʼô mewôé me môt, ntyamane metiñ, mebendé, memvinda a minjôan, mia ye ve be ayemé, nalé ba ye bo te vebane mekua be Nti a ayaa Nti e bo te kui be mia a bobenyoñe benan. Avale te nde mia ye bo, nalé ate mia ye bo te beʼe mekua.

¹¹ Mi lôô Amaryyahu, ntuni nnen, a ne mia évet mfaʼa ya mam me Nti mese, wôna Zebadiahu e mone Ismaél, ngovina ya nda Yuda, asu mam me njô bôt mese, a mi bili Belévit ôsu vienan ane bivet. Ajô te yemane ngu a bo ane befam, a Nti émien a tabeʼe be nyô a ye bo mvaé.