2 Minkte 18 - Bible en langue Bulu

Yôzafat a bo élat a Akab

¹ Yôzafat a nga bili duma a akum abui. A nga bo élat a Akab, zene ya aluk.

² Mimbu miziñ mi lôteya, a nga ke be Akab e Samari, ajô te Akab a nga tyiʼi abui bikela a mintômba, nalé fe benyak asu Yôzafat a e bôt be mbe e nsamba wé. A nga tindi nye na a bet e Ramôt ya Galad.

³ Ane Akab, njô bôte ya Israél a nga jô Yôzafat njô bôte ya Yuda na: Ye bia wo bia ye ke e Ramôt ya Galad? Yôzafat a nga yalane nye na: Ya! Ma ane wo, a e bôte bam ane émbôé, bia be mia bia ye wosan.

⁴ Eyoñe te Yôzafat a nga jô njô bôte ya Israél na: Ma yeʼelane wo na ô tame taté yemelan ajô Nti éyoñe ji.

⁵ Nde njô bôte ya Israél a nga sulane bekulu mejô mintete minyin a jô be na: Ye bia ye ke wosan mfaʼa ya Ramôt e Galad, ye me tabe si? Be nga yalane na: Betek, a Zambe a ye ve nye e mo me njô bôt.

⁶ Ve Yôzafat a nga jô na: Ye nkulu mejôô Nti a nji fe bo va, ane bi ne sili nkômbane Nti a nye?

⁷ Njô bôte ya Israél a nga yalane Yôzafat na: A liʼiya ve môte wua, nye bi ne nguleya sili nkômbane Nti; ve ma vini nye, amu a ne te kulu jam e ne mvaé asu dam a kulu éyoñ ése ve abé : Miké, e mone Yimla. Yôzafat nye na: Njô bôt a nji yiane kobô nalé.

⁸ Ane njô bôte ya Israél a nga loon évet éziñ a jô na: Boʼo na Miké, e mone Yimla a kui vana avôl avô.

⁹ Ane njô bôte ya Israél a Yôzafat, njô bôte ya Yuda be nga tabe, môt ase éto éjôé jé, be beʼe mengômesane bejô bôte map be nga too, anyiine mbé ya Samari, a bekulu mejô bese be kuluʼu mejô ôsu viap.

¹⁰ Sedékias, e mone Kenaan, a nga bo émiene minlaʼa mi étyé a jô na: Avale di nde Nti a jô na: A minlaʼa mi étyé mina, wo ye jine Besirieñ akekui ba ye mane jañ bese.

¹¹ Bekulu mejô bese be nga kulu avale da be jôʼô na: Betek e Ramôt ya Galad! Wo ye dañ a Nti a ye ve nye e mo me njô bôt.

¹² Nlôman ô nga ke loone Miké ô nga kobô nye na: Yene na bekulu mejô bese be ne tyiñe jia ya jô njô bôte mbamba be mam; nkobô wôé wo yiane luʼan a éñwop: wo ye kobô mvaé!

¹³ Miké nye na: Ane Nti a vee! E jame Zambe wom a ye jô nde ma ye kat.

¹⁴ Eyoñ a nga kui be njô bôt, njô bôt a nga jô nye na: A Miké, ye bia ye ke wosan mfaʼa ya Ramôt e Galad, ye me tabe si? A nga yalane na: Betan! Mia ye dañ, a ba ye veban e mo menan.

¹⁵ Ve njô bôt a nga jô nye na: Biyoñe tañ aya ma yiane bo wo na ô kane ngana ya kobô ma ve bebela a jôé Nti?

¹⁶ Miké a nga yalane na: Me nga yen Israél ase Mmialan e minkôle minkô, ane mintômba mi nji bi mbaʼale. A Nti a nga jô na: Bôte bete be nji bi bebaʼale, môt ase a bulaʼane mvoʼé e nda jé!

¹⁷ Ane njô bôte ya Israél a nga jô Yôzafat na: Ye me nji jô wo? A nji kulu jam e ne mvaé be ma, foʼo vʼabé.

¹⁸ Ane Miké a nga jô na: Vôʼôlaʼane ñhe ajô Nti! Me nga yene Nti a too éto njôane jé, a nkane bita ôse ya yôp ô tele nye mbo nnôm a mbo ngal.

¹⁹ Nde Nti a nga jô na: Za a ye won Akab, njô bôte ya Israél, na a bet e Ramôt ya Galad a ku été? Nde be nga yalan, e môte nyôna avale di, e nyôna ki avale di.

²⁰ Ane nsisim éziñ ô nga vam a tebe Nti asu a jô na: Ma ma ye wone nye. Nti a nga jô nye na: Aya?

²¹ A nga yalane na: Ma ye kui a bo nsisime minsos anyu bekulu mejô bé bese. Nti nye na: Wo ye wone nye a wo ye kui vôme ya wone nye mvoʼé : kelek a bo nalé!

²² Eyoñe ji, Nti a futiya nsisime minsos anyu bekulu mejô bôé bana; a Nti a tyiʼiya jam e nʼabé mfaʼa wôé.

²³ Ane Sedékias, e mone Kenaana a nga subu a bibi Miké abaé amañ a jô na: Zene fé e Nsisime Nti wo te kôlô be ma a kobô wo?

²⁴ Miké a nga yalane na: Wo ye de kôme yen, e môse wo ye kôlô étune nda ji a ke ji évoʼo na wo sobô.

²⁵ Ane njô bôte ya Israél a nga jô na: Nyoñane Miké mi kee nye e be Amon, évete ya tison a e be Yôas e mone njô bôt.

²⁶ Mia ye jô na: Avale di nde njô bôt a jô na: Futaʼan e môte nyôna mimbôk mi ve nye tyôtyoé bidi a mendim, akekui ma ye bulane mvoʼé .

²⁷ Nde Miké a nga jô na: Nge wo bulane foʼo mvoʼé , ô yeme na Nti a nji kobô ma. A nga beta jô na: A mia bôte bese vôʼôlaʼan!

Njô bôt Akab a wu bita

²⁸ Ane njô bôte ya Israél a Yôzafat njô bôte ya Yuda be nga bet mfaʼa ya Ramôt e Galad.

²⁹ Ane njô bôt ya Israél a nga jô Yôzafat na: Ma zu veñesan a nyiin e mewosan été; ve wo, jaék mengômesan me njô bôte môé. Nalé ate njô bôte ya Israél a nga jaé biôme na be bo te yeme nye, ane be nga ke mewosan.

³⁰ Njô bôte ya Siri a nga ve abendé e be bivete bevagoñe bé na: Te mia wosan e bôt be ne tyôtyoé nge ba be nʼanen, mia ye wosane ve njô bôte ya Israél.

³¹ Eyoñe bivete ya bevagoñ be nga yene Yôzafat be nga jô na: Njô bôte ya Israél le. Nde be nga bômane nye na be wosane nye. Ane Yôzafat a nga sili mvolan a Nti a nga volô nye.

³² Eyoñe bivete bevagoñ bi nga yene na sake njô bôte ya Israél le, nde be nga ke nye ôyap.

³³ Ane môt éziñ a nga wua élaé ñyem a lume njô bôte ya Israél e fandane ngômesane bityé jé. Ane njô bôt a nga jô ñwulu vagoñe na: Kôñelaʼan a bo ma na me kôlô e nseñe mewosan, amu me baléya.

³⁴ Mewosan me nga bete ngu môs ôte. Ane njô bôte ya Israél a nga tebe tetele e vagoñe wé été ôsu Besirieñ a kui mamengôʼé, nde a nga wu éyoñe jôp da dim.