2 Minkte 17 - Bible en langue Bulu

Yôzafat njô bôte ya Yuda

¹ E mone wé Yôzafat a nga jôô éjiane jé. A nga yeme nguleya wosan Israél.

² A nga telé minsamba bezimbi e bitisone bise ya Yuda bi bili alem; a nga telé fe minkane bezimbi e si ya Yuda a e bitisone ya Efrayim mbie ésaa wé Asa a nga nyoñ.

³ Nti a nga too be Yôzafat amu a nga wulu mezene ya ôsu ésaa wé David a nga wulu, a amu a nji ke Bebaal.

⁴ Vʼa nga jeñe Zambe ésaa wé a tôñe mebendé mé, a selaʼane aval Israél a mbe a boʼok.

⁵ Nti a nga yemete éjôé e mo mé a Yuda ase a mbe a zaʼa ve Yôzafat mimvean. A nga bi abui akum a duma.

⁶ Nleme wé ô nga betebane yôp e mezene me Nti, a nga beta tyame bito ya bikôndôʼô yôp a mekôn mʼakéra e Yuda été.

⁷ Mbu lale ya njôane wé, a nga lôme bivete bié bi: Bén-Ayil, Abdias, Zakari, Natanaél a Miké be ke ba yeʼele e bitisone ya Yuda.

⁸ A nga lôme Belévit bana ba be be nsamba: Semaéyahu, Netaniahu, Zebadiahu, Asaél, Semiramôt, Yônatan, Adoniahu, Tobiahu, Tob-Adôniya, Elisama a Yôram.

⁹ Be nga yeʼele e Yuda, be bili kalate metiñ me Nti. Be nga bômane bitison bise ya Yuda a be nga tyeñele bôt.

¹⁰ Nkoone Nti woñ ô nga bi bijôé ya mesi me nga bômane Yuda, ajô te bijôé bite bi nji ke wosane Yôzafat.

¹¹ Befilisteñ be nga ve Yôzafat mimvean, moné a betoya. Bearabe fe be nga zu ve nye bikela a mintômba, beyôm mintômba toyini zamgbwa a mintete zamgbwa a beyôm bikela toyini zamgbwa a mintete zamgbwa.

¹² Yôzafat a nga ke ôsu a bet ôyabe yôp. A nga lôñ alem e Yuda a bitisone ya naane biôm.

¹³ A nga bili abui ésaé e bitisone ya Yuda, nalé fe bôte mewosan a biwôlô bi bôt e Yérusalém.

¹⁴ Tañe bôte jap nje nyô avalʼane menda me bôte map me né: e Yuda, bivete ya betoyini: Adna, évet, ba be biwôlô bi bôte toyini mintete mila;

¹⁵ A mbe a bili e mefefele mé Yôhanañ, évet a bôte toyini mintete mibaé a mewôme muam;

¹⁶ a tôé valé na: Amasia e mone Zikri, nyô a nga ve émiene be Nti a mbamba nkômbane wé, ba be biwôlô bi bôt toyini mintete mibaé.

¹⁷ E Bényamin: Eliada, éwôlô môt, ba be biwôlô bi bôte toyini mintete mibaé be bili bilaé a biben;

¹⁸ A nga bili e mefefele mé Yehôzabad ba be bôte toyini ntet a mewôme muam, be bili biôme mewosan.

¹⁹ Bôte bete mbe be nga bo njô bôte bisaé, te lañe ba njô bôt a nga telé e bitisone bise ya Yuda bi bili alem.