2 Minkte 15 - Bible en langue Bulu

Asa a tyame bengunemelan

¹ Nsisime Zambe ô nga too be Azariaku, e mone Obéd,

² nyô a nga ke tôban Asa a jô nye na: Vôʼôlôʼô ma, wo Asa, Yuda ase a Bényamin! Nti a ne be mia éyoñ mi ne a Nye; nge mia jeñe nye, mia ye yene Nye. Ve nge mia liʼi Nye, Nye fe a ye liʼi mia.

³ Israél a nga tabe ayap teke nya Zambee, teke bi ntuni a yeʼele, nge metiñ.

⁴ Ve ôlune viab été be nga bulane be Nti, Zambe Israél, be nga beta jeñe nye; a a nga bo na be yene nye.

⁵ Melu mete, teke mvoʼé e be ba ba ke a so, amu e mbe éyoñe ya beta bindeñelaʼa e be bôte bese be nga too mesi mesi;

⁶ ayoñ e nga wosan ayoñ avok, tison é nga wosane tisone fok, amu Zambe a nga ndeñele be minsisim a mevale mʼalune mese.

⁷ Ajô te ñhe mia, yemane ngu, a te mia jôʼé mo menane na me bo atek, amu mimboone mi mame mienan mi bili maʼan.

⁸ Eyoñ Asa a maneya wôʼô mejô mete a nkulane mejô, amu Obéd a mbe nkulu mejô, nde a nga yemete émiene ngu, a vaa bengunemelan e si ése ya Yuda a Bényamin, a e bitisone bise a nga nyoñ e minkôle ya Efrayim. A nga beta kôm ataʼa metunaʼa Nti e mbe ôsu mbé si Nti.

⁹ A nga sulane Yuda ase a Bényamin, bôte ya Efrayim, Manasé a Siméon, mbe be nga zu bo mintabe be be, amu abui bôte ya Israél e nga zu lat a nye, éyoñ be nga yene na Nti, e Zambe wé, a ne be nye.

¹⁰ Nde be nga sulan e Yérusalém e ngone lale ya mbu awôm a tane Asa a nga jôô.

¹¹ Môs ôte, be nga tyiʼi Nti biyem, bi soʼok e biôm be nga sa été: benyak mintete zamgbwa, bikela a mintômba fe mintete zamgbwa.

¹² Nde be nga tyiʼi na ba zu jeñe Nti, e Zambe bʼésaa bap, a nleme wob ôse, a nsisime wob ôse.

¹³ Môt ase a nga ye bo te jeñe Nti, e Zambe Israél, a nga yiane wôéban, toʼo a mbe mongô nge nyamôtô, fam nge minga.

¹⁴ Nde be nga kane Nti ngana tyiñe yôp, ayenga, beta metoñ a bone metoñ be kobôʼô.

¹⁵ Yuda ase a nga vak a ngana éte, amu be nga kane je a nlem ôse, be nga jeñe Nti njalan a mbamba nkômban, a nye ki a nga kañese na be yene nye. Nti a nga ve be awoʼon e mekuʼu mese.

¹⁶ Njô bôt Asa a nga vaa jaʼana nyia wé Maaka éjijin éto nyia njô bôt amu a nga bo ngunemelan asu Zambe Akéra. Asa a nga baʼé e ngunemelane jé, a kôñelane je mbuluk a diʼi je ôtôñe sédroñ.

¹⁷ Ve bito ya bikôndôʼô yôp bi nji vas, akôsa bo e nlem Asa ôse ô mbe be Nti, nté ôse a nga vee.

¹⁸ E nda Zambe, a nga zuu biôm ésaa a nga telé étyi, a biôm émien a nga telé étyi: argent, or a biôme mevale meva.

¹⁹ Bita bi nji ke boban a kui mbu mewôm mela a tane Asa a nga jôô.