2 Minkte 14 - Bible en langue Bulu

Atataʼa éjôé Asa e melu mé, si ya Israél é nga nyiñ évôvoé été tañe mimbu 10

¹ Asa a nga bo mam me mvaé a zôsôô e mise me Nti, Zambe wé.

² A nga tyam metaʼa metunaʼa a bito ya bikôndôʼô yôp bi mbe asu nkañane bezambe bikuu, a nga buʼu mekôn me ndeme bezambe ya bikuu a baʼé bʼAkéra.

³ A nga yeʼele Yuda na a jeñe Nti, e Zambe bʼésaa bé, a baʼale metiñ a mebendé.

⁴ A nga tyame bito ya bikôndôʼô yôp e bitisone bise ya Yuda, nalé fe mevôm ba diʼi beôlobinda, si é nga too ne mieññ éyoñe melu a nga jôô.

⁵ A nga lôñe bitison bi bili alem e Yuda, amu évôvoé é mbe. Bita bi nji ke kui be nye mimbu mite, amu Nti a nga ve nye awoʼon.

⁶ A nga jô Yuda na: Nlôñane bitison a bômane bie a beta mimfin mi bili mevôme benonô be ne tabe, mi bili fe mimbé a mengôñ: amu si é ne évôvoé ôsu viangan. Amu bi jeñeya Nti e Zambe wongan, bi jeñeya nye a nye ki a veya bia awoʼon mekuʼu mese. Nde be nga kui na be bo melôñe map.

⁷ Asa a nga bili nkane bita ô bili bôte ya Yuda toyini mintete mila môt ase yʼété a beʼe beta ében a akoñ, nalé fe bôte ya Bényamin toyini mintete mibaé a mewôme muam, môt ase yʼété a beʼe mon ében a élaé . Bese be mbe biwôlô mfaʼa mewosan.

Asa a wosane Zéra a bôte ya kus

⁸ Ane Zéra, môte ya Nubie, a nga zu wosane be a bili nkane bita ô too bôt akutu wua a bevagoñ mintete mila, a nga wulu a kui e Marésa.

⁹ Ane Asa a nga ke tôbane nye, nde be nga tebe été mewosan e mbiʼili ya Sefata, bebé a Marésa.

¹⁰ Nde Asa a nga yeʼelane Nti e Zambe wé na a volô nye a jôʼô na: A Nti ô ne nguleya volô ngungu avale fe ô ne volô ntetek: zaʼa volô bia, a Nti, e Zambe wongan! Amu e nne bi yeʼe be wo, a bia te zu wosan e jama bôte nyô amu jôé dôé, a Nti, ô ne e Zambe wongan: te kañese na môt a dañe wo.

¹¹ Ane Nti a nga bo na Asa a Yuda be dañe bôte ya Kus, nde bôte bete be nga mate.

¹² Asa a e bôte ba be be be mbe nsamba be nga tôñe be a kui e Yérar, a bôte ya Kus be nga wu teke nguleya nyii ényiñe jap, amu be nga baabane bifus ôsu Nti a ôsu minkane mié. Asa a bôte bé be nga sa abui biôm a kee bie.

¹³ Be nga bôé bitison bise bia bômane Yérar, amu nkoone Nti woñ ô nga bi bie, a be nga mane sa bitison bise: amu biôme ya sa bi mbe foʼo abui.

¹⁴ Be nga tyame fe menda bindelé asu mimbame biyem, a be nga kee abui bikela, mintômba a bekamel. Mvuse ya valé, be nga bulan e Yérusalém.