2 Minkte 13 - Bible en langue Bulu

Abiya, njô bôte ya Yuda

¹ Mbu awôm a muame, njô bôte Yérôbôam a nga jôô, ñwô Abiya a nga tebe njôô e Yuda.

² A nga jôô mimbu mila e Yérusalém. Nyia wé a mbe jôé na Mikayahu, ngone Uriel ya Yibéa. Bita bi nga boban e zañe Abiya a Yérôbôam.

³ Abiya a nga tyaʼa bita a mintobane biwôlô bi bôte mewosan toyini mintete minyin. A Yérôbôam a nga tebe nye ngame yat a mintoban biwôlô mimben toyini mintete muam.

⁴ A too e nkôle Temarayim, ngabe nkôle Efrayim, nde Abiya a nga tebe tetele a jô na: Vôʼôlaʼane ma a Yérôbôam a Israél ase!

⁵ Ye mi nji yiane yeme na Nti, Zambe Israél, a nga ve David éjôé ya Israél éyoñe jia ya biyoñ bise, émien a bone bé, a élat é ne teke atyamé?

⁶ Ve Yérôbôam, e mone Nébat, mbo ésaé Solômon, e mone David, a tebeya a wosane masa wé.

⁷ Bemomo be bôt a mbia be bôt be nga sulane be nye a dañe Rôbôam, e mone Solômon. Rôbôam, amu a mbe mongô a nlem atek, a nji bo nguleya yeme ngu ôsu viap.

⁸ Eyoñe ji mia jô na mia zu dañ éjôé Nti, nje é ne e mo me bone be David. Mi ne ézuʼu bôt a mi bili bone benyaʼa be or, mbe Yérôbôam a nga bo ane bezambe.

⁹ Ye mi nji titane betuni be Nti, e bone bʼAron, nalé fe Belévit; a ye mi maneya bo miabebien betuni avalʼane bôte ya mesi mefe ba bo? E môt ase a zu a étoñe nnôme nyak a beyôme bikela zamgbwa na be ve nye nguleya bo ntuni , mia telé nye ntuni ya jôm e nji bo ntuni .

¹⁰ Ve mfaʼa wongan, Nti a ne e Zambe wongan a bi nji ke liʼi nye: betuni ba bo Nti bisaé be ne bone bʼAron, a Belévit ba bo ésaé.

¹¹ Bia ve Nti mimvean mia diʼibane ngumba mametyé a mamengôʼé mese, ba diʼi beôlobinda be ne mbamba menyum; bia bôé minnoñ mi belet e tawôlô a ne mfubane yôp, a mamengôʼé mese, bia boʼé ébi bifufube or a belambe bé; amu bia tôñ abendé Nti, e Zambe wongan. Ve mia, mi liʼiya nye.

¹² Tame yenan: Zambe a betuni bé be ne be bia, be tele bia ôsu, a bi bili metoñ asu ya loñe ngu bi too mia e ngame yat. A bone bʼIsraél! Te wosane Nti, Zambe bʼésoo benan, amu mia ye bo teke dañ!

¹³ Nté te ôse, Yérôbôam a nga lôme ngab bezimbi éziñ é ke sobô e mvuse bôte ya Yuda; ajô te bôte ya Yuda be nga tele avale di: nkane bita Israél ô too be ôsu, bezimbi ke be nga solô be too be mvus.

¹⁴ Eyoñe bôte ya Yuda be nga kôñelan, be nga koone na ba yiane wosane mesu mebaé nde be nga sili mvolane Nti, éyoñe betuni be nga loñe metoñ,

¹⁵ ane bôte ya Yuda be nga bete metyiñe yôp! Nde, éyoñe bôte ya Yuda be nga bete metyiñ, Zambe a nga bôé Yérôbôam a Israél ase ôsu Abiya a Yuda.

¹⁶ Ane bone bʼIsraél be nga mate e mise me Yuda, a Zambe a nga ve be e mo map.

¹⁷ Abiya a e bôte be nga bo be na be bômban abé , a mintoban mi bôt toyini mintete mitane ya bone bʼIsraél be nga wôéban.

¹⁸ Bone bʼIsraél be nga same éyoñe te, a bone be Yuda be nga dañ amu be nga yeʼebe be Nti, e Zambe bʼésaa bap.

¹⁹ Abiya a nga tôñe Yérôbôam a wôlé nye bitisone bi: Bétél a minlame mié, Yesana a minlame mié, Ebroñ a minlame mié.

²⁰ Melu me Abiya, Yérôbôam a mbe teke ngu, ane Nti a nga bibi nye, nye ve wu.

²¹ Ve Abiya a nga yemete éjôé jé. A nga luʼu binga awôm a benyin a biaé bobefame mewôm mebaé a bebaé a bobebinga awôm a besaman.

²² Mimboone mi Abiya, mam a nga bo a mam a nga jô, me ne ntilan e kalate ba loone na: Minsimesan mi nkulu mejô Iddô.

²³ Ane Abiya a nga bômbô vôme wua ba bʼésaa; be nga jame nye e tisone David. E mone wé Asa a nga jôô éjiane jé.