2 Minkte 11 - Bible en langue Bulu

Rôbôam, njô bôt ya Yuda

¹ Eyoñe Rôbôam a nga kui Yérusalém, a nga sulane nda bôte Yuda a nda bôte Bényamin, biwôlô bi bôte mewosan toyini ntet a mewôme muam, asu ya wosan Israél a bulane nye éjôé Israél si.

² Ve Nti a nga kobô Semaéya, môta Zambe na:

³ Kobôʼô Rôbôam, e mone Solômon, njô bôte ya Yuda, a Israél ase a ne e Yuda a e Bényamin na:

⁴ Avale di nde Nti a kobô na: Mia ye bo te bet a wosane bobenyoñ! Môt ase ya be mia a bulaʼan e nda jé, amu jame te da so be ma. Nde be nga bo mejô me Nti mewôk a bulan teke wosane Yérôbôam.

⁵ Ane Rôbôam a nga tabe e Yérusalém a lôñe bitison bi bili alem e Yuda.

⁶ A nga lôñe Bétléhém, Etam, Tekôa,

⁷ Bét-Sur, Sôkô, Adulam,

⁸ Yat, Maréka, Zif,

⁹ Adorayim, Lakis, Azéka,

¹⁰ Toréa, Agalôn a Ebroñ e Yuda a e Bényamin.

¹¹ A nga kôm alem e ne ngu a telé bivete mewosan été, a naane bidi, mbon a woon.

¹² Tison ése yʼété é nga bili beta biben a mekoñ, a a nga bo bie ngul abui. Yuda a Bényamin be mbe émbéé.

¹³ Betuni a Belévit be nga too Israél ase été be nga so éfuse si jap ése a zu be nye;

¹⁴ amu Belévit be nga liʼi menda map a e biôme biap a ke e Yuda a e Yérusalém, amu Yérôbôam a bone bé be nga ndeñele be na be bo te bo ésaé betuni jap asu Nti.

¹⁵ Ane Yérôbôam a nga telé betuni asu bito ya bikôndôʼô yôp, asu beyôm bikela a bone benyak a nga kôm.

¹⁶ Ba bese ya meyoñe yʼIsraél be nga kômbô jeñe Nti, Zambe yʼIsraél, be nga tôñe Belévit e Yérusalém, asu ya ve Nti, e Zambe bʼésaa bityiʼa .

¹⁷ Nalé be nga yemete éjôé ya Yuda a ve Rôbôam, e mone Solômon ngu tañe mimbu mila; amu be nga wulu e zene David a Solômon tañe mimbu mila.

¹⁸ Ane Rôbôam a nga luʼu Mahalat, ngone Yérimôt, e mone David ba Abigayil, ngon Eliab, mon Izayi.

¹⁹ Nde a nga biaé nye bon avale di: Yeuk, Semaria a Zaham.

²⁰ E mvuse jé a nga luʼu Maaka, ngone Absalom. A nga biaé nye: Abiya, Atayi, Ziga a Selômit.

²¹ Rôbôam a nga nyeʼe Maaka, ngone Absalom a lôte binga bé a bibone bié bise; a nga bili binga awôm a muam a bibon mewôm mesaman, wôna a nga biaé bobefam mewôm mebaé a muam a bobebinga mewôm mesaman.

²² Rôbôam a nga telé Abiya, e mone Maaka éto ya ôsu, a too évete bobenyañe bé, amu a nga kômbô bo nye njô bôt.

²³ A nga bo atyeñe ya mialane bobefame bé bese e mefôla mese ya Yuda a Bényamin, e bitison bise bi bili alem; a nga ve be bidi abui; a nga jeñe fe be abui binga ya luk.