2 Minkte 1 - Bible en langue Bulu

Solômon njô bôt. Zambe a ve nye fek a duma

¹ Ane Solômon, e mone David, a nga yemete émien éjôé jé été; Nti, e Zambe wé, a nga too be nye, a nga nene nye a dañe bete nye yôp.

² Solômon a nga kobô Israél ase, bivete betoyini a mintet, betyiʼi mejô, betebʼôsu ya Israél ase a bivete ya menda me bôt.

³ Nde Solômon a ékôane bôt ése be nga ke éto ya ékôndôʼô yôp, nje é mbe Gabaoñ, amu e nne nda éndelé bendôbaʼane Zambe é mbe wé, nje Môze, mbo ésaé Nti, a nga bo e nkôte si;

⁴ ve éwolo Zambe nje David a nga beʼe akôlô Kiryat-Yearim a kui e vôm a nga kôme na ja ye bômbô, amu a nga lame je nda éndelé e Yérusalém.

⁵ E nne fe ataʼa metunaʼa mvot Betsalél e mone Uri, e mone Ur a nga lôñ, é mbe valé, ôsu tabernakel . Ane Solômon a ékôane bôt be nga sili nkômbane Zambe.

⁶ Valé ate nye Solômon a nga bet e ataʼa metunaʼa mvot e mbe e nda éndelé bendôbaʼan, Nti a too, a ve mimvean ba diʼi ngumba tañe toyini.

⁷ Zambe a nga yené be Solômon alu te a jô nye na: Siliʼi jôm wo kômbô na me ve wo.

⁸ Ane Solômon a nga yalane Zambe na: Wo ô nga liti David ésaa wome mvam abui, wo fe wo bo na me jôʼô éjiane jé.

⁹ Ajô te a Nti, nyô a ne Zambe, nkobô ô nga kobô David ésaa wom ô ntoo ve tôéban, amu wo ô boya na me jôô ayoñe bôt e ne abui ane mbuluʼu ya si.

¹⁰ Eyoñe ji a ntoo ñhe ve ve ma fek a ñyemane mam, nalé ma ye yeme wulu e bôte bana ôsu. Amu na, za nye a ne nguleya jôô e beta ayoñe bôte wôé nyô?

¹¹ Ane Zambe a nga yalane Solômon na: Amu jame te nde é ne wo e nlem , amu ô nji sili mefok nge akum, nge duma, nge awu ya besiñe bôé, nge abui melu mʼényiñ, ve viane sili fek a ñyemane mam asu ya yeme jôô ayoñe bôte dam, nde me nga bo wo na ô jôô,

¹² fek a ñyemane mam bi ntoo wo mvean. Ma ye fe ve wo mefok, akum a duma. Bejô bôte befe be nji tame bo wo ôsu be too avale te a befe baa ye ke bo e mvuse jôé be too avale te.

¹³ Ane Solômon a nga so éto yʼékôndôʼô yôp é mbe Gabaoñ, ôsu nda éndelé bendôbaʼan, a suan e Yérusalém a bo njô bôte Israél.

Akume Solômon

¹⁴ Solômon a nga tôkan bevagoñ mewosan a bikabela; a nga bili bevagoñ toyini a mintete minyin, a bikabela toyini awôm a ébaé; a nga baʼale ngab éziñ yʼété e fefele jé Yérusalém, ba bevok mbe a nga mane kap e bitison a nga mane kôm asu ya baʼale be.

¹⁵ Njô bôt a nga bo na argent a or bi bo jôme môt ase a bili e Yérusalém ane mekok , avale te fe a nga bo na besédre be bo abui ane besikomor be ne Seféla.

¹⁶ Be nga soo bikabela bi Solômon Ejipte; ngume nsamba bebo makit be njô bôt ô mbe ô kele nyoñe bikabela bite minsamba minsamba a mveane ngume tañ.

¹⁷ Be mbe be kelek a kus, Ejipte, vagoñe wua, besikel be argent ntet a mewôm metan. Be mbe fe be soʼo bevagoñ a bikabela asu bejô bôte bese ya Behétieñ a asu bejô bôte ya Siri.

Solômon a kômesane nlôñan nda Zambe

¹⁸ Ane Solômon a nga tyiʼi na a lôñe nda asu jôé Nti a lôñe fe nda njô bôt asu dé émien.