2 Ko 9 - Bible en langue Bulu

Mebendé mefe ajô mimvean

¹ Mfaʼa mimvolan mimfufup, e nji bo mfi na me tili mia de.

² Ma yeme mbamba minkômbane mienan, a ne ne wulu ngunguan a mia e be bôte ya Masédôan. Me nga bo me jôʼô be na, Akayi a ne nkôman aso mbu ya mvus, a ayôñe mboone denan e nga fôʼô bekeké abui.

³ Ma lôme mia bobejañ, e nde ngunguane me bili mia ô za bo zesé mfaʼa ôte a na, avale me mbe me jôʼôk, mi tabe foʼo nkôman.

⁴ Ma ko woñe na, nge bia be bôte ya Masédôan bia zu, a koone mia teke nkôman, mbamba ndi nlem ate, a viane bo ôsone wongan, ma jô na ôsone wônan.

⁵ Nde ñhe me nga buni na, ma yiane loone bobejañe na be zu bia ôsu e be mia, a kômesane mimveane mienan. Mengakaʼa me ésôse menan, éyoñe be maneya kôane me, ma ye bo mveane nya ésôse, saa wu ôkak.

⁶ Yemane na, nyô a mias mmiasan ôkôlôt, a ye fe kôan nkôan ôkôlôt. A e nyô a miase mmiasan ésôs, a ye fe kôane nkôan ésôs!

⁷ Môt ase a vaʼak ane e nleme wé ô tyiʼiya, teke ôlun nge ntindan, amu Zambe a nyeʼe nyô a ve a mevak.

⁸ Zambe a ne nguleya jalé mia a mevale me akume mese, nalé ate mia ye fe bi abet asu mboon ôse ô ne mvoʼé , ve koone na mi bili abime da yiane mam mese a éyoñ ése.

⁹ Ane e ne ntilane na: A nga kap, a nga ve minzôzoé, zôsôô wé a too nnôm éto.

¹⁰ Nyô a ve mmiase fese mvoñ a belet ane bidi, a ye fe ve mia mvoñ, a fôlô je, a yale bibuma bi zôsôô bienan.

¹¹ Mia ye bo minkukume mezene mese, a e mevale me ésôse mese, mme ma ye bete mvean akéva be Zambe amu bia.

¹² Amu ésaé mimvean mite é nji yiane jalé ve minkômbane mimfufub étam, ve bo fe na mvean akéva mfaʼa Zambe ô bo abui abui.

¹³ Eyoñe ba ye seʼe ésaé te ane é né, ba ye ve Zambe duma, amu mewôʼô mia ve Mbamba Foé Krist, a amu ésôse jenan e fufulu ésaé mia be be été, a mia be bôte bese été.

¹⁴ A zene ya meyeʼelane map mfaʼa wônan, ba ye liti mia nyeʼane wop, amu abui mvame Zambe a nga bo mia.

¹⁵ Akéva e boʼo be Zambe amu mveane wé ô ne teke jame ya jô.