2 Ko 8 - Bible en langue Bulu

Melep asu nsondane mimvean

¹ A bobejañ, bia kômbô na mi yem abime mvame Zambe a nga ve bekeké ya Masédôan.

² Ezezañe minjuʼu abui mi nga veʼele be, avaʼa dap da fuluku a azoé dap da nemban, bi nga viane beté ôdoʼé e mimvean mi ésôs.

³ Aval ane ngule jap é né, a dañe fe dañ abime ngule dap, me ne ngaa,

⁴ be nga sili bia, bebien, be yemeteʼe fe na, bi kañese be na be nyoñe ngab ésaé ya volô mimfufup.

⁵ Be nga taté ve bebiene be Nti a lôt abime bi nga buni, wôna e be bia, amu nkômbane Zambe.

⁶ A na, bi nga tuʼa lebe Tite na, a kee ésaé mboon ésôs a nga taté e be mia ôsu.

⁷ Ve amu mi bili mame mese abui: mbunan, atyeñe nkobô, ñyemane mam, ayôñe mboon ésaé aval ese, mevale mese, a nyeʼane mi nga nyoñe be bia, biane fe ésôs abui abui éyoñe ji.

⁸ Me nji jô jame te ane abendé, ve éyoñe ma liti mia ayôñe mboone ba bevok, ma ve mia afôla ya liti nya nyeʼane wônan.

⁹ Mia tuʼa yem ésôse Nti wongan Yésus Krist, nye ate, nkukum ane a mbe, a nga bobane nzôzoé , amu na a bo mia minkukum amu azoé dé.

¹⁰ E ne tyiñe ma ve ajô te: jame te nde da yiane mia, amu mi mbe ôsu, saa ve mfaʼa ya bo ésaé te, ve mfaʼa ya tyiʼi na mia bo je aso mbu ya mvus.

¹¹ Eyoñe jina ñhe, sondaʼane bo je; nalé ate mbamba mefeʼe menan ma ye luʼan a mboon, abim ane ngule jenan é né.

¹² Eyoñe mbamba nkômban a né foʼo, Zambe a nyoñ jôme môt a ve, a fombôʼô biôme môt ate a bili, saa bi a nji bi.

¹³ E nji bo asu ya telé mia éndeñelaʼa été éyoñe mia volô e bôte bevok ve amu na, mi tebe avale da: ane éyoñe ji, e jôme mi bili abet, ja ye jalé jôme ja jembane be;

¹⁴ ndembene môs éziñ, e jôme ba ye bi abet ja ye jalé jôme ja ye jembane mia: nalé mia ye tebe été jia,

¹⁵ ane e ne ntilane na: Nyô a nga kôan abui, a nji bi a lôte nné, a nyô a nga kôane tyôtyoé, a nji yi jôm.

¹⁶ Akéva e boʼo e be Zambe, nye a nga futi e nleme Tite, avale mbamba nkômbane da ya volô mia.

¹⁷ A nga kañese nloone wongan a, avôl avô, émien a nga zu be mia.

¹⁸ Bi nga lôm, e nsamba wé, e mojañ bekeké bese ba sek ajô mbamba Foé.

¹⁹ E jame da beta dañe mvaé, e ne na, bekeké be nga tobe nye na bia be nye bi ke e dulu mimvolane di, ésaé bia bo asu duma Nti émien, a asu ya tôé e mbamba minkômbane miangan.

²⁰ Bia tuʼa tabe ntyel asu ya saʼale bijô bi ne so mebelane bizuʼu bemoné bia baʼale.

²¹ Bia ve ngule ya bo mvaé, saa ve e mise me Zambe étam, ve nalé fe e mise me bôt.

²² Bi nga lôme mojañ baa be minlôman, nyô bia zu bia veʼele ayôñe mboon ésaé dé biyoñ abui, a éyoñe ji, a dañe beta liti nalé, amu a too mia ndi.

²³ Tite a ne nyô bia nye bia wulu, a ébe mbo ésaé wom e be mia; e bobejañ baa be nye be ne nsamba, be ne minlômane bekeké, asu duma Krist.

²⁴ Nde, litaʼan e mise ya bekeké, ndeme ya nyeʼane mi bili be, a ngunguane bi bili mia ajô dap.