2 Ko 7 - Bible en langue Bulu

¹ Amu bi bili avale mengakaʼa te, a bôte ma dañe nyeʼe, e ntunane biabebien e mfaʼa avale mvin ese ya minsôn a nsisim . E sondaʼane telé biabebien étyi e nkoone Zambe woñ été.

Paul a diine bôte ya Korént e nleme wé

² Vaʼane bia éto minleme mienan été; bi nji bo môt éziñ abé; bi nji kpwé môt éziñ azoé; bi nji diane môt éziñ.

³ Sa mfaʼa ya ve môt éziñe mekua nde ma kobô nalé, amu me maneya jô nalé na: Mi ne e minleme miangan été awu a ényiñ.

⁴ Me too beta ndi e be mia, e ngunguane me bili mia ô ne anen, nlem ô bôô ma si abui, mevaʼa mam ma fuluku alune dam ese été.

⁵ Amu na, nkuane wongan e Masédôan, bi nji bi awoʼon ve alune mevale mese. Mewosan atan, woñe ke été.

⁶ Ve Zambe, nyô a volô ba ba suu bebiene si minlem, a nga volô bia minlem éyoñe Tite a nga so,

⁷ saa ve nsoone wé étam, ve ngule nlem a nga nyoñe be mia; a nga kate bia beta nkômbane wônan e miliʼi menan, a beta ésaé wônan mfaʼa wom, avale ya na me nga beta bi avaʼa da dañ ngu amu nalé.

⁸ Yaa, nge me nga ve mia ôlune nlem amu kalate wom, me nji jôban. Ve nge me nga jôban e mboone te, kalate ate, ma yene nalé na a nga ve mia ôlune nlem , jaʼane ve nté éziñ,

⁹ ma vak éyoñe ji, saa ñhe amu ôlune wônan, ve amu nkôñelane nlem ô nga so amu nye. Amu ôlune wônan ô mbe ane Zambe a kômbô. Nde mfaʼa wongan, mi nji bi mbia jam éziñ.

¹⁰ Amu ôlun, ane nkômbane Zambe ô né, wo ve nkôñelane nlem, wo ke kui e nyian, teke mejôbaʼan. Ôlun avale si nyô ja kômbô, wo soo awu.

¹¹ Mia yiane viane yen e mam ôlun, ane Zambe a kômbô, ô nga soo me be mia: mbamba nkômban mfaʼa wônan, avôle ya kamane miabebien! Abim ateʼe nyôle te! Abime woñe te! Abime nkômbane ya beta yene ma te! Akaʼa mveane ngule ya bo ésaé! Abime nkômbane ya vaa abé te! Akôsa bo mame mete mese, mia bebien mi nga liti na, mi mbe mvoʼé ajô te été.

¹² Tyiʼibi na, nge me nga tili mia, e nji bo ajô nté ntañete, nge ajô ya nyô be nga bo abé , ve asu ya liti mia, e mise me Zambe, ayôñe mi bili mfaʼa wongan.

¹³ E jame dina nde e nga volô bia nlem . Nge ô vaa e mvolane nlem ô ne éñwongane te, bi nga beta dañe vak amu mevaʼa Tite, me soʼo ngumba njeʼebane nleme si a nga nyoñe be mia bese.

¹⁴ Amu nge me nga liti nye ngunguan éziñ amu mia, me nji wôʼô ôson, ve amu bia zu bia kobô mia bebela biyoñe bise, e nde ngunguan bi nga liti Tite ajô denan ô nga kabe.

¹⁵ Nyeʼane wé mfaʼa wônan, ô ne ve nenenen, éyoñ a simesane mewôʼô menan, mia bôte bese, avale woñ a mfôʼôban mi nga nyoñe nye.

¹⁶ Ma vak amu me ne ngule ya tabe mia ndi mfaʼa ya mame mese.