2 Ko 4 - Bible en langue Bulu

Duma a nsuubane si

¹ Ajô te amu nkoon éngôngo, nde bi bili ésaé te, bi nji jañele ngule nlem .

² Bi beneya mimboon mi ne asoé a ôson, bi nji wulu ane mekut, nge tyendé mejô me Zambe, ve éyoñe bia liti bebela e nje bia dutu ndi minleme bôte bese asu Zambe.

³ Ve da nge Mbamba Foé wongan a ngenane mbutan, a ne mbutan mfaʼa bôte ba jañele bebien,

⁴ e ba be ne ayete minlem, e mbe ôzezambe ya si nyô ô kpwéya atyeñe ndime na, be bo te yen éfufube Mbamba Foé étôtoʼo Krist, nyô a ne éveʼela Zambe.

⁵ Momo, bi nji kañete biabebien, ve Yésus Krist Nti, nye bia kañete. Mfaʼa wongane biabebien, bia kañete biabebien bebo bisaé benan amu Yésus.

⁶ Amu e Zambe a nga jô na: éfufup é faék ézezañe dibi. Emien ate nye a nga faé e minleme miangan été, asu ya bo na ñyemane ya étôtoʼo jé ja kuli minkôkô asu Krist ô faé.

⁷ Ve bi beʼe édima jôme te e mevieʼe mʼétek été, nalé ate e ngul é ne tee aveʼane nyô ja ye bo nyô Zambe saa énjangan.

⁸ Bia miateban mimfaʼa mise, ve teke koʼoban; bia kui e mevôm me ne adip, ve bia suʼulane tulan;

⁹ ba titane bia mvus, ve teke koone bia; ba fite bia, ve teke jiane bia;

¹⁰ éyoñ ése bi beʼe awu Yésus e menyôle mangan nalé ate ényiñe Yésus fe é yené e menyôle mete été;

¹¹ yaa, éyoñ ése, bia bevevee, bi ne nkeeban awu amu ajô Yésus, nalé ate ényiñe Yésus fe é yené éwuwua nyôle jangan été.

¹² Ajô te awu da bo ésaé e be bia, ve ényiñ e be mia.

¹³ Ve akôsa bo nalé, bi ne ngu amu nsisime mbunane te ôbien na: Bia buni, ajô te bia kobô, ane e ne ntilane na: Me nga buni, ajô te me nga kobô.

¹⁴ Amu bia yeme na, nyô a nga soo Nti Yésus awu a zuu nye ényiñ, a ye fe ve bia ényiñ a nye, a a ye tooé bia be mia bebé a nye.

¹⁵ A mame mese ma kui be bia me ne amu ajô denan, ndembene mvam , ane ja nenenen, ja ye kôʼôlane mvean akéva, a zene ya nsamba bôt wo bo abui, asu duma Zambe.

Njalan a ndi nlem biyoñe bise

¹⁶ Amu ajô te bi nji jañele ngule nleme jangan, a e be bia été, jaʼane môt, mfaʼa ya atan, a ke e njañan môt, mfaʼa ya été, a bo mfefé môs ane môs .

¹⁷ Amu alune dangane ya ngume nté e ne éveves, éyoñe wo veʼane de a étua adit étôtoʼo é too nnôm éto alune te da kômesane bia.

¹⁸ E jame bia sôñ, e nji bo di da yené, ve di e ne te yené; e jôme ja yené é too ngume nté, ve jôm é ne te yené é too nnôm éto.