2 Ko 3 - Bible en langue Bulu

Esaé ya mfefé Elat

¹ Ye bia ye beta bendé mia biabebien? Nge na, ye bia beta yi bekalate ba bendé bia e be mia, nge ba ba so be mia, ane bôte bʼéziñ ba bo?

² E kalate wongan a ne mia, kalate, ntilane minleme miangan, bôte bese ba yem a be lañeya nye.

³ Jaʼan aya nge aya, mi ne kalate Krist a nga ve ésaé jangan ntilan, saa a mendim me nkôs, ve a Nsisime Zambe a vee, saa ntilan e bifase mekok , ve bi minsôn, e minleme mienan.

⁴ Bebela bi bili e nye le, asu be Zambe, amu Krist.

⁵ Saa ke amu ngule jangan bi ne ngule ya futi e be biabebien, ve ngule jangan ja so be Zambe.

⁶ Nye ate a nga ve fe bia ngule ya bo bebo bisaé be mfefé élat, saa ji metiñ, ve ji Nsisim. Amu metiñe ma wôé, ve Nsisim wo nyii.

⁷ Amu na, nge ésaé awu, nkpwelane metiñ akoʼo yôp, é nga too étôtok avale ya na, bone bʼIsraél be mbe te ngule ya fombô asu Môze amu étôtok, ve é too jôm ja lôt,

⁸ abim avé ésaé Nsisim ja ye beta dañ?

⁹ Nge ésaé mveane mekua, é nga too étôtok, abim avé ésaé zôsôô ja ye beta dañe dañ?

¹⁰ Teke bebé, jaʼane jôm é nga too étôtok, é nji fe bo étôtok, éyoñ é ne asu jôm é bili étôtoʼo ja dañ.

¹¹ Amu, nge jôm é mbe ji ja lôt é nga boban étôtok, abim avé ji é tooto ja ye dañ?

¹² Ngu amu avale ndi nleme te, bi ne njalan a mbunan.

¹³ Bi nji bo ane Môze, nye a nga bo a soléʼé asu a éndelé na, bone bʼIsraél be bo te yen asuʼulane nlôtezene mfaé.

¹⁴ Ve atyeñe dap e nga bo dibi! A kui e môse wu, éyoñe ba lañe nnôme kalate Zambe, éndelé te é ngenan é yaa. E nji vas, amu e be Krist nye ja vas.

¹⁵ Yaa, a kui môse wu, éyoñ ése ba lañe Môze, éndelé ja buti minleme miap.

¹⁶ Ve nkôñelane nlem étam e be Krist ñwô éndelé te ja kôlô.

¹⁷ Amu Nti a ne Nsisim. A e vôme nsisime Nti ô né, vôm ate éto fili é né.

¹⁸ A bia bese mesu me ne tee mbutan, bia liti minkôkô mi étôtoʼo Nti, bia veñesañe mesu a nyoñ éyekaʼa te ébien, njalan a étôtoʼo ja beta dañ anen amu Nti, nyô a ne Nsisim.