2 Ko 2 - Bible en langue Bulu

¹ Mfaʼa wom, me nga tyiʼi jame dina na: Ma ye bo te bulane be mia a ôlune nlem .

² A nge ma ve mia ôlune minlem, za a ye ve ma avak, ye saa nyô me nga ve ôlune nlem ?

³ E jame me nga sôñ e kalate wom été e mbe na: éyoñe ma suan, me saʼale ajô dina na e bôte be nga yiane ve ma avak, be viane ve ma ôlune nlem . Me too ndi nlem e mfaʼa wônan na, avaʼa dam e ne fe éndenane bese;

⁴ ajô te, ézezañe minjuʼu été a nleme ntyaʼan, nje me nga tili mia a miliʼi mis, saa asu ya ve mia ôlune minlem, ve na, mi yeme nyeʼan wo fuluku, ñwô me bili mia.

Paul a jamé nsiñe wé

⁵ Nge môt éziñ a nga ndeñele, saa ma a nga bo, nge me nji beté jam, ve mia bese a zen éziñ.

⁶ Da sili na môt avale te a nyoñe mvam é soʼo e be ngume nsamba;

⁷ ajô te mia yiane viane mvamane a volô nye nlem , a za kee ényônyongo ya abui ôlun été.

⁸ Ajô te ma lebe mia na mi liti ndeme nyeʼane be nye;

⁹ amu éyoñe me nga tili mia, me nga sôñe na me yene ndeme ja liti na mewôʼô menan me mbe ngumba.

¹⁰ A e nyô mia mvamane nye, nye ma ma mvamane nye! Nge ma me nga liti mvam , nge me nga bo nalé, e mbe amu mia, Krist émien a lôô,

¹¹ nde bia ye bo te duʼubane be Satan, amu bi nji dimi minsôñane mié.

Esaé ja fombô mfefé élat

¹² Ane me nga kui Trôas, mfaʼa ya kañete Mbamba Foé Krist, akôsa bo Nti a nga yoé ma mbé ne ngeññ, nlem ô nji bômbô ma si amu me nji koone Tite, monyañe wom.

¹³ Ane ñhe me nga liʼi be a ke Masédôan.

¹⁴ Akéva e boʼo be Zambe, nyô a kee bia biyoñe bise e ndañane wé été amu Krist, a nye fe a belane bia asu ya miam vôm ase, ôlobinda ñyeman e vôm ase. A zene ya e be bia.

¹⁵ Jam e ne na: Bi ne mfaʼa Zambe, mbamba ényume Krist, asu ba ba nyii bebien, a asu ba ba jañele bebien.

¹⁶ Mfaʼa bana, ényum awu ja kee môt awu, mfaʼa ba bevok, ényum ényiñ ja kee môt ényiñ. A za a ne nkôñe ya bo aval ésaé te?

¹⁷ Bi nji bo ane bevoʼo abui ba kuan ajô Zambe; bia kobô tee meduʼan, e señe Zambe, asu Zambe, a e Krist été.