2 Ko 13 - Bible en langue Bulu

Mebatan a mebendé ma suʼulan

¹ Jina é ne éyoñe lale ma zu e be mia. Ajô ese da ye tyiʼiban a bengaa bebaé nge belaa.

² Me maneya jô nalé, a na, aval ane éyoñe njomane baa ma beta baʼalane de den me too momo, e be ba be nga bo abé e mvus a ba bevoʼo bese na: Nge me beta zu, ma ye bo te yeʼele môt éziñ,

³ mbôlô mia kômbô ndeme na Krist a kobô be ma. A nji bo ateʼe mfaʼa wônan, ve a liti ngule jé be mia.

⁴ Yaa, a nga tyelébane krôa ateʼe dé été, ve a vee amu ngule Zambe. A bia fe bi ne atek e be nye, ve bia ye bo bevevee bia be nye amu ngule Zambe e mfaʼa wônan.

⁵ Fasane miabebien, a yene nge mia nyiñ e mbunan été, veʼelane miabebien; nge na, ye mi nji yeme na Yésus Krist a ne e be mia? Vengevenge ve meveʼele ma kôñelan a wosane mia. Mi nji bi ngule ya liti mendeme me mbunan.

⁶ Ma buni na, mia ye yeme na, bi nga bo abime dangan.

⁷ Bia yeʼelane Zambe na mi bo te bo abé éziñ. Bi nji kômbô liti abim avé bi ne nguleya bo ésaé, ve bia kômbô yen ane mia bo mvaé, jaʼane da yené ane nge meveʼele me ne bia e ngame yat.

⁸ Amu bi nji bi ngule ya wosane bebela ve nyô é né asu bebela.

⁹ Bi ne mevak éyoñ ése bi ne atek mi ke ngu. Nsôñane ya meyeʼelane mangan ñwô le: e nkean ôsu wônan.

¹⁰ Ajô te, éyoñe me ngenan ôyap, ma tili mia jame di, ndemben éyoñe ma ye kui be mia, me bo te tyiʼi ajô éziñ me bem belaʼan avale ngule Nti a nga ve ma e né, asu ya lôñ, saa tyam.

¹¹ A bobejañ, ma suʼulane jô mia na: Tabaʼan e mevak été, boʼon ésaé asu nkean ôsu wônan, vaʼane ngule nyô mia mia, tukaʼa boone tyiñe jia, nyiñan e mvoʼé été, a Zambe a ne nyeʼan a mvoʼé a ye tabe be mia.

¹² Mi bataʼane wua a nyô mbok, a nlatane menyu ô ne mfuban . Mimfufube mise mia batane mia.

¹³ Mvame Nti Yésus Krist, nyeʼane Zambe, mfulaʼan a Mfufube Nsisim bi tabeʼe be mia bese.