2 Ko 12 - Bible en langue Bulu

¹ Ma yiane wumulu mamien! Ve nalé a nji volô jôm. Ve ma ye kobô ajô miñyenan a minlitane mi Nti.

² Ma yeme môt éziñe be Krist, nye ate, den a nto mimbu awôm a minyin, ye a mbe e nyôl été? Maa yem! Ye a mbe e nyôle jé atan? Maa yem, Zambe nye a yeme de, môt ate a nga beteban a kui yôbe lale.

³ A ma yeme na môt ate, ye a mbe a nyôle jé? Ye a mbe teke nyôle jé? Maa yem, Zambe nye a yeme de,

⁴ môt ate a nga beteban a kui Paradis, a a nga wôʼô bifia bi ne teke atoté mbie môt a nji bi nkañesane na a baʼalane tot.

⁵ Ma ye wumulu mamien amu môt ate, ve mfaʼa wom ma ye wumulu mamien, ve ateʼe dam été.

⁶ Ngoʼé! Nge me nga kômbô wumulu mamien, me nji ye bo akut, me nga ye kobô ve bebela; ve ma jôʼé amu bôte be za bi ma ôsimesane wo dañe jame be lôô be ma, nge jame ba wôʼô me kobôʼô.

⁷ A amu minlitane mite mi mbe bitua minlitan, asu ya saʼale mebune mese, éyo é nga vebane minsône miam été, éngela Satan, ésaé jé é too na a bibi ma.

⁸ Me nga yeʼelane Nti ajô te biyoñe bilale na, a vaa me je.

⁹ Ve a nga jô me na: E mvame jam ja yiane wo; e ngule jam é wôʼô yené ése ateʼe été. Ajô te ma ye viane wumulu mamien ateʼe dam été, nde e ngule Krist ja ye tabe e be ma.

¹⁰ Ajô te ma vak ateʼe été, e meta été, e mengataʼa été, e bitibelaʼa été e a woñ été amu Krist! Amu éyoñe me ne atek e nje me ne ngu.

Ntyelane nleme yôp Paul ajô bôte ya Korént

¹¹ Ma le me ntoo akut! Mi nga tindi ma été. Mia mi nga yiane wumulu ma. Amu beta minlômane bete be nji nyoñe jôm éziñ a dañe ma, toʼo me ne momo jôm.

¹² Mendeme ya yemelane nlôman me nga yené e zañe jenan: njibane meveʼele mese, mendeme bitua bi mam, mesimba, mimboone mia liti ngul.

¹³ Jé mi nga bo te nyoñ ane bekeké bevok, nga ve na, e mfaʼa wom, me nji diane mia? Jamaʼane ma ékotekot éte!

¹⁴ Mi lôô na me ntoo fe nkômane ya zu be mia éyoñe lale, a ma ye bo te diane mia. Amu me nji jeñ akume denan, ve miabebien. Saa ke bone mbe ba yiane naane bebiaé bikaʼaé, ve bebiaé mfaʼa bon .

¹⁵ Mfaʼa wom, ma ye kañese dimili, a ma ye ve mamiene ngumba asu denan. Nge, ma ke ôsu a nyeʼe mia, ye ma ye nyeʼebane tyôtyoé?

¹⁶ E boʼo nalé na me nji bo mia mbeʼe! Ve akut ane me né, me nga bi mia a feʼe meduʼan.

¹⁷ Nyôñane môt ase mia kômbô nyoñ e be bôte me nga lôme mia: ye me nga diane mia a wua ya be be?

¹⁸ Me nga yemete Tite, a lôme nye baa mojañe me nga jôô nye. Ye Tite a nga diane mia? Ye bi nji wulu avale nsisime da été? A avale mezene da été? Zene jia?

¹⁹ Aso ayap, mia simesane na bia kale biabebiene e mise menan? Momo, bia kobô asu Zambe e be Krist. Amu mame mete mese, a bôt ma nyeʼe, me ne asu ya kômôtô mia.

²⁰ Ma ko foʼo woñe ya zu koone mia, éyoñe ma zu, mi too teke avale ma kômbô, a na, mi ke mi bo te yene ma avale mia kômbô: metyamaʼan a bo momo be mia nalé fe éviele, ayaa, mesengan, bibôta, ékobôkobô, minkobô mi ébiasé, biduñ.

²¹ Ma ko woñe na, éyoñ évoʼo ma zu, e Zambe wom a za samele ma e mise menan, a na, me bo te kui vôme ya yi abui ya ba be nga taté bo abé , a ba ba bo te kôñelane minlem amu mvine jap, mbia ntabane wop, a ébamba jap!