2 Ko 11 - Bible en langue Bulu

Paul nya nlômane

¹ Ngoʼo nge mi mbe nguleya jibi akute dam abim éziñ; yaa! Jibaʼane ma!

² Me bili e nlem abane mfaʼa wônan; avale da ane Zambe. Amu me nga bo mia atiñ aluk e be nnôme wua, asu ya liti mia e be Krist ane mfuban éndune ngon,

³ ve ma ko woñe na, avale Satan a nga wone Eve a meduʼane mé, asimesane denan e bo te ndaman, a liʼi tyiʼibi ényiñ a nlatan Krist.

⁴ Yaa, nge môt ôsusua a zu, a kañete mia Yésus mfe, nye a nji bo nyô bi nga kañete mia, nge mia nyoñe nsisime wo selane wu mi nga nyoñ, nge Mbamba Foé mfe, saa nyô mi nga nyoñ, mia jibi foʼo nye.

⁵ Me nji tuʼa buni na beta minlômane bete ba dañe ma jôm éziñ.

⁶ Yaa me ne asuʼu nkobô! Mfaʼa ñyemane mam, jam afe le. E mame mese a mezene mese, bi nga liti mia ndem.

⁷ Ye e mbe nkobane na me suu mamiene si a bete mia yôp, éyoñe me nga kañete mia mbamba Foé Zambe e zesé?

⁸ Me nga vose bekeké bevok, me kañeseʼe nyoñe jôme ya nyiñe je e be be asu ya saane mia.

⁹ A éyoñe me nga bili minkômbane miziñ nté me nga too be mia, me nji diane môt éziñ, amu e bobejañ be nga so Masédôan be nga ve ma biôme me nga kômbô; me nga saʼale zen ése ya bo te kaʼa mia mbeʼe, ma ye ke ôsu a saʼale.

¹⁰ Ma yemete nalé, e bebela Krist a ne be ma na ba ye bo te solé ma e ngunguan ôte e mesi ya Akayi.

¹¹ Amu jé? Ye amu me nji nyeʼe mia? Zambe nye a yeme de!

¹² E jame ma bo, ma ye beta bo de, nde ma ye vaa amu ase ya ba ba jeñe nye, asu ya bo ngunguane na bia be be bi ne nkôñe wua!

¹³ Bôte bete be ne bikotekote minlôman, belaa minsos ba sobô e nkôñe minlômane mi Krist été.

¹⁴ E nji bo jame ya semé amu Satan émien a wôʼô sobô a yené ane éngele éfufup.

¹⁵ Nde e nji bo beta jame mfaʼa bebo bisaé bé na be sobô ane bebo bisaé be zôsôô . Asuʼulane dap da ye bo ane mimboone miap mi né.

Mintaé mi Paul

¹⁶ Ma beta de baʼalane na: Be boʼo te simesane na me ne akut, nge na: Kañesaʼane ñhe na me ne akut, nalé ma fe ma ye wumulu mamien abim éziñ.

¹⁷ E jame ma zu jô, me nji jô de ane di Nti, ve aval ane nyô a ntoo akut, ve me tukaʼa yeme na me bili jame ya wumulu de mamien.

¹⁸ Amu abui bôt da wumulu ebien amu mfi ya minsôn, ma fe ma ye wumulu mamien.

¹⁹ Mia kañese jibi bôt be ne mekut, e mia mia yeme fas.

²⁰ Mia jibi na, be veñesane mia belo, be mine mia, be fone mia, be fombô mia e mfaʼa ya si, be bibi mia e mesu.

²¹ Ma jô de asu ôsone wongan, aval ane nge bi nga too atek. E jôme be ne ayoʼo ya jô, ma kobô ane akut, ma fe me ne ayoʼo ya jô nalé.

²² Ye be ne Beébre? Ma fe nalé! Ayoñ Israél! Ma fe nalé! Ba ya mvoñe bôt Abraham? Ma fe!

²³ Ye be ne bebo bisaé be Krist? Me tame kobô éfia akute na ma ma dañedañ. E minjuʼu été, me nga dañ; e menda mimbôk, me nga dañ; e ñwobane bibôm, me nga tôbane wô abui abui; e beangôndô ya awu été, me nga wulu be abui biyoñ!

²⁴ E be Beyude, me nga bibane minkasa mewôm mela a ébu biyoñe bitan;

²⁵ biyoñe bilaa, me nga biban alé e be Berômeñ; be nga lume ma mekok éyoñe jia; me nga ye wu ôsôé biyoñe bilaa; me nga lôte ngume môs a ngum alu e mendime si.

²⁶ Me nga wulu a mebo bebé éyoñ ése a tôbane minjuʼu mi beta bʼasôé, beze mimfaka, ziñe bobejañe yʼayoñ, minjuʼu mia so e be betebuni, beangôndô be mam e bitison, e nkôte si, e mañ, e be bikotekote bi bobejañ!

²⁷ Nyôle nteʼan a njuk; évevé bebé éyoñ ése; zaé a évé, mbômbane zaé éyoñ ése; avep a soé;

²⁸ teke lañe mame mevoʼo mese, ésaé jam môs ôse ntyelane nleme yôp ajô bekeké bese.

²⁹ Za a ne atek, me teke nyoñe ngap? Za a ku, jame te teke diʼi me nlem ?

³⁰ Nge ma yiane wumulu mamien, ma ye wumulu mamien ateʼe dam été.

³¹ Zambe, Esaa Nti Yésus, nyô a yian ékañaʼa nnôm éto a yeme na me nji laa minsos.

³² E Damas, ngovina a mbe éjiane njô bôt Arétas a nga bo na be baʼale tison asu ya bi ma.

³³ Ve be nga daa me vundu, a suu ma si tetele mfin me me too e nkoé été, ane me nga fam e mo mé.