2 Ko 10 - Bible en langue Bulu

Paul a kaman ésaé jé

¹ Mamiene Paul, ma sili mia de a évôvoé a e mvoʼé Krist été, e ma ma yeme suu mamiene si éyoñe me ne ézezañe jenan bi lôane mesu, ve ayok e be mia éyoñe me ne ôyap;

² ma yeʼelane mia na, éyoñe me ntoo be mia, me bo te belan ayoʼo ma kômbô liti a bivele bi mis, asu ya wosan e bôt ba veʼe feʼe na e ntabane wongan ô tii e be amu ya minsôn.

³ Bôt, ane bi né, bi nji wosane foʼo ve aval ane bôt.

⁴ Momo, biôme mewosane biangan bi nji so e be bôt, ve ngule jap ja so e be Zambe, mfaʼa ya tyam alem. Bia tyam asimesane befeʼe,

⁵ a ngul ése ja liti ziñ, nje éte ja tebe ñyemane ya yeme Zambe e ngame yat. Bia bi ôsimesan ôse mbôk asu ya zuu wô na ô ve Krist mewôk,

⁶ a bi ne nkômane ya ve ébiasé ése melep éyoñe mewôʼô menan ma ye bo ngum.

⁷ Fombaʼane mam ane me né. Nge môt éziñ a buni na a ne nyô Krist, a yeme nalé éyoñe jia. Nge a ne be Krist, bia fe!

⁸ A jaʼane ma dañe bo mebun a ngule Nti a nga ve bia asu ya kômôtô mia, saa asu njañane wônan, maa ye ke wôʼô ôson.

⁹ Me nji kômbô yené ane nyô a bo mia na mi ko woñ amu bekalate bam,

¹⁰ amu ba jô na: Bekalate bé be ne teke ajibi a ngu. Ve éyoñ a too ézezañe jangan a ne atek, a e nkobô wé momo jam.

¹¹ Môt ate a kômeʼe yeme na: Avale bia kobô bi too ôyap e bekalate bangan été, avale te fe bia ye yené e mimboone miangan été.

¹² Yaa, bi nji bi ôvañe ya veʼan nge bo ane bewumulu bebien, éyoñe ba nyoñe bebien ane ôvek ô ne ntoban nge jôme ba funane je a bife, ba jañele fek!

¹³ Mfaʼa wongan, bia ye bo te wumulu biabebien a lôte nné, ve bia ye bo nalé ézezañ ésaé Zambe a nga ve bia, éyoñ a nga bo na bi kui be mia.

¹⁴ Amu bi nji lôte nné wongan, aval ane nge bi nji ke zu be mia. Bia foʼo bi nga taté kui be mia a Mbamba Foé Krist.

¹⁵ Bi nji bi ngunguan wo dañ, ô soʼo éza mboon ésaé, ve bi bili ndi nlem , e meyaé ya mbunane wônan été na, bia ye dañe dañe yaé e be mia, aval ane nyeʼelane wongan ô né,

¹⁶ a nkeane Mbamba Foé ôyap a lôte be mia, teke bo ngunguane ya bisaé bi bobaneya e bifuse bi si bôte befe.

¹⁷ Nyô a nguan émien, a futiʼi nguui jé e be Nti.

¹⁸ Saa nyô a wumulu émien nye a ne nkañesan, ve nyô Nti a sek.