2 Jn 1 - Bible en langue Bulu

¹ Ma, mvendé , ma tili Nganti a ne ntoban a bone bé ma nyeʼe éfufup ya e benya mejôô été. A saa ve ma étam, ve nalé fe ba bese be bili ñyemane benya mejôô,

² amu bebela a too e be bia a kui nnôm éto.

³ Mvam, nkoon éngôngo a mvoʼé , bia ye tabe e be bia, bi soʼo e be Zambe Esaa a e be Yésus Krist Mone Esaa, e benyaa mejôô été, a e nyeʼan été.

⁴ Me nga wôʼô angôndô ya beta mevak ya yene bone bôé ba wulu e zene benya mejôô été, aval ane abendé bi nga nyoñ e be Tate e né.

⁵ Wôna éyoñe ji ma sili wo de a Nganti. Teke tili tili wo mfefé atiñ ve di bi bili a so atataʼa. E nyeʼesaʼan, wua a nyô mbok.

⁶ Nyeʼan ô ne na, bi wulu e metiñe mé été. Nalé nye a ne atiñ bi nga wôk a so atataʼa na, mi wulu e zen éte été.

⁷ Amu beduʼu bôt be maneya mialane si nyô. Be nji mem mbunane na Yésus Krist a nga zu bialé minsôn. Nduʼu bôt a nsiñe Krist nye ñhe le!

⁸ Baʼalane ñhe miabebiene na, mi bo te jañele bibuma ya biyaé bienan, ve na, mi nyoñe maʼane menan ngum.

⁹ E nyô a zembe ôsu, te tabe nyeʼelane Krist été a nji bi Zambe. E nyô a too nyeʼelan Krist été, nye a bili Esaa baa Mon.

¹⁰ Nge môt éziñ a zu e be mia ve te bi nyeʼelan ôte e be émien, te nyoñane nye nda jenan, nge tame nye mbamba nsoone zañe jenan,

¹¹ nyô a nyoñe ngabe mbia mimboone mié.

¹² Me bili mam abui ya tili mia, ve me nji kômbô tili mia me a nkôs. Amu me too ndi na, ma ye zu e be mia a kobô mia a tyiñe jam, nalé avaʼa dangan da ye jaé ne lut.

¹³ E bone be monyañe wôé a ne ntobane Zambe, ba batane wo.