2 Bb. 9 - Bible en langue Bulu

Yéhu a woʼobane mbone njô bôt Israél été

¹ Ane Elizé a nga loone nkulu mejô wua ya nsamba bekulu mejô, a jô nye na: Tiñetiʼi ases angeteñ, nyoñe ndeʼe mbone nyô e wo wôé, a kelek e Ramôt ya Galad.

² E wé, wo ye ke yene Yéhu, e mone Yôzafat, e mone Nimsi. Wo ye ke vaa nye e bobenyañ été, a zuu nye étune nda ja dañ asoé.

³ Wo ye nyoñe ndeʼe mbon, a sôé nye wô nlô, a wo ye jô na: Avale di nde Nti a jô na: Ma woʼo wo mbone na, ô bo njô bôte ya Israél! Eyoñe te wo ye dii mbé a tub, te beta yange.

⁴ Ane ésoé ndôman, ésoé nkulu mejô, é nga ke e Ramôt ya Galad.

⁵ Eyoñ a nga suan, a koé na bivete mewosan bi too ékôan. A nga jô na: A évet, me bili jame ya jô wo. Yéhu na: Asu za ya be bia bese? Nye na: Asu dôé a évet.

⁶ Ane Yéhu a nga kôlô si na a nyiine nda été: ane ndômane môt é nga sôé mbon e nlô wé a jôʼô na: Avale di nde Nti, Zambe ya Israél a jô na: Ma woʼo wo mbon ane njô bôte ya Israél, e bôte be Nti.

⁷ Wo ye bibi nda Akab, masa wôé, a ma ye kune metyi bebo bisaé bam, bekulu mejô, a metyi bebo bisaé be Nti bese e nyôle Yézabél.

⁸ Nda Akab ése ja ye wu; ma ye vaa, jaʼana nyô ya ba bese be ne ba bʼAkab a dañe tyôtyoé, nyô a tii a nyô a ne fili Israél été.

⁹ Ma ye bo nda Akab é funane nda Yérôbôam e mone Nébat, é funaʼane fe nda Baésa, e mone Ahiya.

¹⁰ Mfaʼa Yézabél, bemvu ba ye di nye afube ya Yizrél, môt teke nguleya jame nye. Ane a nga dii mbé a tup.

¹¹ Ane Yéhu a nga kui atan a ke koone bebo bisaé be masa wé. Be nga jô nye na: Ye mam mese me ne mvoʼé ? Amu jé nsoʼo étyi ate a te zu be wo? A nga yalane be na: Miabebien mia yeme môt ate a nkobô wé.

¹² Ve be nga yalane na: Minsos! Kañeteʼe ñhe bia! Nye na: Avale di a di, nde a te kobô ma na: Avale di nde Nti a kobô na: Ma woʼo wo mbon ane njô bôte ya Israél.

¹³ Nde be nga bo avôle ya nyoñ, môt ase, e ngômesane jé, be nga bôé me mebo me Yéhu si. Be nga loñe toñ a jô na: Yéhu a ntoo njô bôt!

¹⁴ Avale di nde Yéhu, mone Yôzafat, mone Nimsi a nga wôlé Yôram éto. Ve Yôram a Israél ase be mbe be baʼaleʼe Ramôt ya Galad be wosaʼane Azaél njô bôte ya Siri.

¹⁵ Ve njô bôte Yôram a nga bulane ke saéban e Yizrél; a nga ke saéban meveñe Besirieñ be nga balé nye, éyoñ a nga wosane Azaél njô bôte ya Siri. Yéhu a nga jô na: Nge e ne nkômbane wônan, môt a ye ke tube na a ke kate foé e Yizrél.

¹⁶ Eyoñe te a nga bet e vagoñe wé a ke Yizrél, amu Yôram a nga bôô énoñ ôkone wé, a Akazia, njô bôte ya Yuda a nga ke yene Yôram.

¹⁷ Mmombô a nga too ôzomezome nda yôp, a nga yene beta nsamba bôt ba be Yéhu be zaʼak, nde a nga jô na: Me lô beta nsamba bôt. Yôram na: Nyoñe mbebe ékabela, ô lôme nye a ke tôbane be. A ye sili be na: Ye mvoʼé é ne?

¹⁸ Ane mbebe ékabela a nga ke tôbane. Yéhu a sili na: Ye mvoʼé é ne? Yéhu na: Mvoʼé ja volô wo jé? Kôñelaʼan a tebe e mvuse jam. Nde mmombô a nga kate foé jé na: Mbeʼe mbañete a te ke kui be be, ve a nji bulan.

¹⁹ Yôram a nga lôme mbebe ékabela baa, nye fe a nga kui be be a jô na: Avale di nde njô bôt a kobô na: Ye mvoʼé é ne? Yéhu na: Mvoʼé é ne wo mfi jé? Kôñelaʼan a tebe e mvuse jam.

²⁰ Mmombô a nga beta kate foé jé na: A te ke kui be be ve a nji bulan, a ndutan wo funane wu Yéhu, e mone Nimsi, amu a dutu vagoñ akut.

²¹ Eyoñe te Yôram a nga jô na: Kômesaʼan! Eyoñe te be nga kôme nye vagoñe wé. Ane Yôram njô bôte ya Israél a Akazia njô bôte ya Yuda be nga kui, môt ase e vagoñe wé na be ke tôbane Yéhu, nde be nga koone nye afube Nabot ya Yizrél.

²² Eyoñe Yôram a nga yene Yéhu, a nga sili na: Ye mvoʼé é ne a Yéhu? Yéhu na: Jia mvoʼé aa! Nté ôse ébamba nyua Yézabél é ngenan a jama mimboone mié ya ngbwe!

²³ Ane Yôram a nga nyiʼi tyiñ a tup; a nga jô Akazia na: Njoñ ô kuiya, a Akazia!

²⁴ Ve Yéhu a nga bi élaé jé a lume Yôram e zañe bituu: ane akoñ e nga ke tulane nlem , a Yôram a nga suʼulan e vagoñe wé été.

²⁵ Ane Yéhu a nga jô Bidkar, mbaʼale ébene wé na: Nyoñe nye a wua nye afube Nabot ya Yizrél; amu, simesaʼan éyoñe bia wo bi mbe nsamba, ékabela yôp e mvuse Akab ésaa wé, Nti a nga kobô nye mbia mejô mana na:

²⁶ me nga yene metyi me Nabot a angôʼé, a metyi me bone bé, nalé Nti a jô, ma ye bulane wo avale da, afube dina ébien été, nale Nti a jô! Ajô te éyoñe ji nyoñe nye a wua nye afub été avale Nti a nga kobô.

²⁷ Eyoñ Akazia, njô bôte ya Yuda a yeneya jame te, a nga tup e zene ya Bét-Agañ. Yéhu a nga tôñe nye a jô na: Wôane fe nye e vagoñe yôp! Jame te e nga boban abete ya Gur, bebé e Yiblim. A nga tub e Megidô vôm a nga wu.

²⁸ Ane bebobisaé bé be nga beʼe nye e vagoñ, a kee nye e Yérusalém a jame nye e soñe jé ba bʼésaa, e tisone David.

²⁹ Akazia a nga bo njô bôte ya Yuda mbu awôm a wua Yôram, e mone Akab, a nga jôô Israél.

Yéhu a jiane nda bôt Akab

³⁰ Ane Yéhu a nga nyiin e Yizrél. Eyoñe Yézabél a wôʼôya jame te, a nga dube mis a kôme nlô, a fombô e vundi yôp.

³¹ Yéhu a zaʼa kui mbé , nde Yézabél a nga jô na: Ye mvoʼé é ne, a mfefé Zimri, nyô a nga wôé masa wé?

³² A nga bete asu mfaʼa ya vundi a jô na: Bia za bi ne va? Za? Miaʼa mibaé nge mila mi nga fombô nye mi too mfaʼa ya yôp.

³³ Ane a nga jô na: Wuʼane nye si! Nde be nga sôʼôlô nye si, a metyi mé me nga mialane mimfin a e bikabela. Yéhu a nga tibi nye a mebo,

³⁴ éyoñe te a nga nyiine nda été a di a nyu; a a nga jô na: Boʼone jam éziñ mfaʼa minga biyoʼé ate, amu a ne ngone njô bôt.

³⁵ Ane be nga ke jame nye soñ; ve be nga koone jôm é liʼiya nye ve nlô, mekule mebo a mekule me mo.

³⁶ Nde be nga bulane ke kate Yéhu jame te; a nga jô na: Nkobô Nti a nga kobô anyu be mbo ésaé wé Elie, mone Tisbite le na: Bemvu ba ye di minsône mi Yézabél afube Yizrél été.

³⁷ Mbime Yézabél wo ye bo akun e fé été e afube ya Yizrél, nalé ba ye bo te nguleya beta jô na: Yézabél le.