2 Bb. 6 - Bible en langue Bulu

Nsoé ôvôn wo ku ôsôé

¹ Nsamba bekulu mejô ô nga jô Elizé na: Tame yen, e vôme bia be wo bi too ô ne bia ôbametan.

² Zaʼa ñhe bi ke a kui Yordan, môt ase ya be bia a ye nyoñ élé jia, éyoñe te bia ye lôñe biabebiene nda ya tabe.

³ A nga yalane na: Kelan! Wua ya be be a nga jô na: Kañeseʼe ñhe zu mia be bebo bisaé bôé.

⁴ A nga yalane na: Ma ye ke. Ane ba be be be nga ke.

⁵ Eyoñe be kuiya Yordan, be nga tyiʼi bilé. A nga bo na môte wua ya be be a bakéʼé élé, nde nsoé ôvôn ô nga ku nye mendim. Ane a nga bete tyiñe yôbe na: Ô ne éza ôvôn, a tate wom!

⁶ Nde môta Zambe a nga jô na: Wo te ku vé? Ane a nga liti nye vôm ô nga ku. Eyoñe te Elizé a nga tyiʼi éfus élé a wua je e vôm ate émien, a bo na étyé ôvôn é yeñ e mendime yôp.

⁷ Eyoñe te a nga jô na tokéʼé je! Nde môte mbok a nga same wo a toʼé je.

Besirieñ ba ku ndim

⁸ Njô bôte ya Siri a nga wosane Israél; ane a nga laane bebo bisaé bé a jô be na: Minkane miam mia ye bo vôme si vôme ka.

⁹ Ve môta Zambe a nga lôme bôt be kate njô bôte ya Israél na: Tabeʼe ntyele ya lôt e vôm ate amu Besirieñ ba siliki wé.

¹⁰ Ane njô bôte ya Israél a nga lôme bôt e vôme môta Zambe a nga liti nye be ke tebe valé a fombô. Jame te e nji ke boban ve éyoñe jia nge bibaé.

¹¹ Ane nleme njô bôte ya Siri ô nga dañe wôʼô jame te abé . Nde a nga loone bebo bisaé bé a jô be na: Ye mi nji kômbô liti ma môte ya be bia a ne e ngame njô bôte ya Israél?

¹² Wua ya bebo bisaé bé a nga yalane na: Tekeʼe môt! A njô bôte tate wom. Ve da na, nkulu mejô Elizé a ne Israél a kate njô bôte ya Israél mejô mese wo kobô étune nda jôé wo bômbô.

¹³ Njô bôt a nga jô na kela fomban e vôm a né, éyoñe te ma ye lôme bôt be ke bi nye. Be nga zu kate nye na a ne e Dôtan.

¹⁴ Ane njô bôt a nga lôme bikabela wé, bevagoñ a éwôlô nsamba; bese be nga kui a alu a bômane tison.

¹⁵ E môt a nga too môta Zambe bebé a nga kune kôlô si a kui atan, ateme na nsamba bôt ô nga bômane tison a bikabela a bevagoñ. Ane ésoé mbo ésaé é nga jô môta Zambe na: A masa wom, bia ye bo aya?

¹⁶ A nga yalane na: Te ko woñ, amu ba be ne ngame jangan be ne abui a dañe ba be nee ngame jap.

¹⁷ Ane Elizé a nga yeʼelan, a jô na: A Nti, ma yeʼelane wo na, ô kui ésoé mbo ésaé te mis, je ve yen avale di: nkô, njalane bikabela a bevagoñ be nduan be bômaʼan Elizé.

¹⁸ Ane Besirieñ be nga ke be Elizé. Nde a nga yeʼelane Nti a jô na: Ma yeʼelane wo na ô tame bôme nsamba bôte wu a dim! Ane Nti a nga kute be ndim e mis, aval Elizé a nga sili.

¹⁹ Elizé a nga jô be na: Zen é nji bo va, nalé fe na tison é nji bo va; tôñane ma a ma ye kee mia e be môt mia jeñ! Nde a nga kee be Samari.

²⁰ Eyoñ be nyiineya Samari, Elizé a nga jô na: A Nti kuʼi e bôte bana mis be yen! Ane Nti a nga kui mise map, nde be nga yene na be ne ézezañe tisone Samari.

²¹ Eyoñe njô bôte ya Israél a nga yene be a nga jô Elizé na: A ésaa wom ye me wôé be?

²² Elizé na: Woo ye ke wôé be, ye wo wôé e bôt be ntoo mimbôʼô miôé a nkpwaté mekône wôé a élaé jôé? Vaʼa be bidi a mendim be di a nyu. Eyoñe te ba ye suʼulane bulan e be masa wop.

²³ Ane njô bôte ya Israél a nga jô bôt be ve be abui bidi, nde be nga di, a nyu a, a nga suu be be ke, nde be nga ke be masa wop. Ataté éyoñe te minsamba Besirieñ mi nji fe beta ke ôsu a zu e si ya Israél.

Zaé e Samari

²⁴ Mam mete me maneya, Ben-Adad, njô bôte ya Siri a nga sulane nsamba mewosane wé a bete na a bômane Samari bita.

²⁵ Ajô te beta mfumbale zaé a nga kui Samari; ve ndilane tison ô nga tabe ayab a kui na, nlô éjakase wua, be nga kuane wô bifase bi argent mewôme muam, a mengabe menyine ya ésua mebi me zum, be nga kuane ngabe jia bifase bi argent bitan.

²⁶ Njô bôte ya Israél a nga zu lôt e mfine tison, nde minga éziñ a nga yône be nye na: Nyiʼi ma a njô bôt tate wom!

²⁷ Njô bôt a nga yalane na: Nge Nti a nji nyii wo, ma ma ye nyii wo a jé? Ye a bidi ya afup nge bi ya vôm ba miate bibuma?

²⁸ Njô bôt a nga beta jô na: Jé? A nga yalane na: Minga nyô a te jô ma na: Vaʼa ma monafame wôé! Bia ye di nye den, a akiti, bia ye di monafame wôé.

²⁹ Bi maneya yam a di monafame wom. E môse wo tôñe valé, ma te jô nye na: Vaʼa monafame wôé, bia ye di nye. Ve a soléya monafame wé.

³⁰ Eyoñe njô bôt a nga wôʼô nkobô minga nyô, a nga nyabe mengômesane mé. A nga lôt e mfine ya tison a bôte be nga yene nye a beʼe nkuta e biyé si.

³¹ Njô bôt a mbe a jôʼô na: Zambe a boʼo ma e jame di a beta fe beté e jame dili nge Elizé e mona Safat a beta liʼi be nye den!

³² Elizé a nga too e nda jé, a bemvendé be nga too nye fefe. Njô bôt a nga lôme môte ya bôt ba bômane nye. Ve nlôman ô ngenan te kui, nde Elizé a jô bemvendé na: Mi lôô, e mona ñwôé bôte nyô, a lômeya môt éziñ a tyiʼi ma nlô? Tabaʼane ntyel; éyoñe nlôman wo ye so, dibane mbé a sôʼôlô nye a mbé . Ye ékinda mebo me masa wé é nji bo nye mvus?

³³ A ngenan a kobôʼô be, nde nlôman ô nga zu be nye a jô na: Nge bidime bi bia so be Nti, jé ma beta yange be Nti é too mvaé?