2 Bb. 5 - Bible en langue Bulu

Elizé a saé Naman, mone Sirieñ zam

¹ Naman, évete nsamba mewosane njô bôte ya Siri a nga yene mvaé be masa wé, masa wé a nga semé fe nye abui, amu nye Nti a nga belane nye na a nyii Besirieñ. Ve éwôlô môte te é mbe nzezam.

² Nde a mbe vana na, éyoñe minsamba Besirieñ mi nga ke ôban, be nga soo ôyôm ésoé ngone minga ya si yʼIsraél minkôm. A mbe a boʼo nga Naman bisaé.

³ Nde a jô masa minga wé na: Ngoʼé nge tate wom a mbe e fefele nkulu mejô a ne Samari ve a nga ye saé nye zam !

⁴ Naman a nga zu kate masa wé jame te a jôʼô na: Ésoé ngone minga ya si yʼIsraél ja kobô avale di a avale di.

⁵ Ane njô bôte ya Siri a nga jô na: Kelek e Samari a ma ye lôme njô bôte ya Israél kalate. Eyoñ a nga ke, a nga nyoñe betalañ be argent a bifas bi or toyini ésaman a mengômesane môt a tyendé awôm.

⁶ A nga kee njô bôte ya Israél kalate a too ntilane na: Éyoñe ji, awolo kalate nyô a ke kui be wo, wo ye yeme na, ma lôme wo Naman mbo ésaé wom na, ô saé nye zam .

⁷ Eyoñe njô bôte ya Israél a nga mane lañe kalate, a nga nyabe mengômesane mé a jô na: Ye me ne Zambe na me wôé a nyii, nde a sili me na me saé e môt a kone zam ? Yemane ñhe a yenane na, a jeñe mezene na bia nye bi bo mejô.

⁸ Eyoñ Elizé, môta Zambe, a nga wôʼô na njô bôte ya Israél a maneya nyabe mengômesane mé, a nga lôme bôt be kate njô bôte na: Amu jé wo te nyabe mengômesane môé? Lôme nye be ma, éyoñe te a ye yeme na nkulu mejô a ne Israél.

⁹ Ane Naman a nga zu a bikabela bié a vagoñe wé a tebe mbé ya nda Elizé.

¹⁰ Elizé a nga lôme nlôman ô kate nye na: Kele wobane Yordan biyoñe zamgbwa, éyoñe te minsône miôé mia ye beta bo mvoʼé , a wo ye bo mfuban .

¹¹ Ane Naman a nga yaa a ke a jôʼô na: Ma too me simesaʼane na: A ye kui atan a zu vôm me né, éyoñe te émien a ye loone jôé Nti, e Zambe wé, a lôte wo wé e vôm ôkon ô né a saé nzezam.

¹² Beta bʼasôé ya Damas: Amana a Parpar, ye be nji bo abeñ a dañe mendime mese yʼIsraél? Ye me nji bo nguleya woban été a bo mfuban ? Ane a nga bulan e beta ôlun été.

¹³ Ve bebo bisaé bé be nga zu bebé na be kobô nye; be nga jô nye na: A masa wom, nge nkulu mejô a nga ye sili wo jam éziñ é ne ayaé, ngaa ô nga ye bo de? Ngumaʼane ke di a te jô wo na: Wobaʼan a bo mfuban !

¹⁴ Nde a nga sis a duban ôsôé Yordan biyoñe zamgbwa avale nkobô môta Zambe ô mbe: ane minsône mié mi nga beta bo ane mi ésoé ndôman, a a nga bo mfuban .

¹⁵ Ane a nga bulane be môta Zambe a nsamba wé ôse; éyoñ a suaneya, a nga tebe ôsu vié a jô na: Ô lôô me yemeya na, Zambe a nji bo e si nyôna ése, vengevenge ve Israél. Eyoñe ji ma yeʼelane wo na, kañeseʼe nyoñe das mbo ésaé wôé a ve wo.

¹⁶ Elizé a nga yalane na: Ane Nti, Nyô me tele ôsu vié a vee! Ma ye bo te kañese. Naman a nga yemete nye na a nyoñ ve a nga ben.

¹⁷ Eyoñe te Naman a nga jô na: Amu ô beneya, kañeseʼe na be ve mbo ésaé wôé éfuse si, abime mbeʼe bemulé bebaé ô ne yian, amu mbo ésaé wôé a nji kômbô beta ve mvean ô ne ngumba, nge étyiʼa e be bezambe befe, foʼo ve be Nti.

¹⁸ Ve Nti a jaméʼé mbo ésaé wôé e jame di: Eyoñe masa wom a nyiin e nda zambe Rimôn na a ke kañ, a a yeʼebe ma wo, ma fe me wôʼô kañ e nda zambe Rimôn: ajô te Nti a jaméʼé mbo ésaé wôé, éyoñ ma ye kañ e nda zambe Rimôn été.

¹⁹ Elizé a nga jô nye na: Kele mvoʼé . Ane a nga kandane nye a wulu ôbe nté.

Zame Naman ja ke be Géhazi

²⁰ Ane Géhazi, ésoé mbo ésaé Elizé, môta Zambe, a nga jô émien na: masa wom a te done Naman e mone Sirieñ nyô, éyoñ a te bene nyoñe biôm a te soo bie e mo mé; ane Nti a vee! Ma zu tôñe nye mbile mvus, a nyoñe jôm éziñ.

²¹ Ane Géhazi a nga tôñe Naman. Eyoñe Naman a yeneya ane a zu nye mbile mvus, a nga jiʼa sis e vagoñe wé si na a ke tôbane nye, a jô na: Ye mam mese me ne mvoʼé ?

²² Nye na: Mam mese me ne mvoʼé . Masa a lôme ma me kate wo na: Tame yen bendômane bebaé ya nsamba bekulu mejô be ndôme suane be ma éyoñ ébiene ji be soʼo minkôle yʼEfrayim; nde ma yeʼelane wo na ô ve talañe argent wua a mengômesane mebaé môt a ne tyendé asu dap.

²³ Naman a nga jô na: Kañeseʼe nyoñe betalañe bebaé. A nga yemete, nye ve futi betalañe be argent bebaé e minkuta mibaé été ve kalane mie bebaé ya bendômane bé, ô laté a mengômesane mebaé môt a ne tyendé, nde be nga ke ve bie Géhazi.

²⁴ Eyoñ be kuiya nkô, Géhazi a nga nyoñe bie e mo map, a tuʼa bôé bie e nda été a suu bôte bete be bulan.

²⁵ Eyoñe te émien a nga zu a tebe ôsu be masa wé. Elizé a nga jô nye na: A Géhazi wo so vé?

²⁶ Nye na: Mbo ésaé wôé a nji ke li nge li. Ve Elizé a nga jô nye na: Ye wo buni na me nji yene jame te e nsisime wom été éyoñe môt ate a te kôlô e vagoñe wé a zu tôbane wo? Ye éyoñe ya nyoñe argent, mengômesan, beôlivié, mefube mindiʼi mi woon, mintômba, bikela, benyak, bebo bisaé befam a binga nje ji?

²⁷ E zame Naman ja ye kabetane wo a mvoñe bôte jôé nnôm éto. Ane Géhazi a nga kôlô vôm Elizé a nga too, zame nyôl éfumulu ane sut.