2 Bb. 3 - Bible en langue Bulu

Yôram njô bôte ya Israél, bejô bôte belaa ba wosane Môab

¹ Mbu awôm a zamgbwale Yozafat, njô bôte ya Yuda, a nga jôô, ñwô Yôram, e mon Akab, a nga tebe njô bôte ya Israél e Samari. A nga jôô tañe mimbu awôm a mibaé.

² A nga bo mam me nʼabé e mise me Nti, ve saa ke ane ésaa a nyia. A nga tyam éveʼelaʼa baal nje ésaa a nga bo;

³ ve a nga kabetane mevale mʼabé Yérôbôam, e mone Nébat a nga bo, nye a nga dutu Israél na a bo abé , Yôram a nji ke saʼale abé te.

⁴ Mésa, njô bôte ya Môab, a mbe mfôlô biyem; a mbe a yakaʼane njô bôte ya Israél toya tañe bone mintômba toyini ntet, a beyôme mintômba toyini ntet, a mevule mabe mese.

⁵ Eyoñ Akab a wuya, ane njô bôte ya Môab a nga ben éjôé bôte ya Israél.

⁶ E nde njô bôte Yôram a nga kôlô Samari a mane jom Israél ase.

⁷ A nga téé dulu, a lôme bôt be ke kate Yôzafat njô bôte ya Yuda na: Njô bôte ya Môab a beneya njôane wom; ye wo ye volô ke wosane ma Môab? Yôzafat a nga yalane na: Ma ye bet ma ane wo, bôte bam ane bôte bôé, bikabela biam ane bikabela biôé.

⁸ A nga beta fe jô na: Bia ye lôte zene fé? Yôram na: E zene ya nkôte si yʼEdom.

⁹ Ane njô bôte ya Israél, nyô ya Yuda a nyô yʼEdom be nga ke; be nga wulu melu zamgbwa e nkôte zen , ve mendim me nga jeñeban asu minkan a biyem bi nga tôñe be.

¹⁰ Nde njô bôte ya Israél a nga jô na: Éé! Nti a te loone bejô bôte bana belale na a kalane be e mo me Môab.

¹¹ Ve Yôzafat a nga jô na: Ye nkulu mejô Nti éziñ a nji bo vana, nye bi ne nguleya sili nkômbane Nti? Wua ya bebo bisaé be njô bôte ya Israél a nga yalane na: Elizé, e mone Safat a mbe a sôʼé mendim e mo mʼElie a ne va.

¹² Yôzafat na: Mejô me Nti me ne be nye. Ane njô bôte ya Israél Yôzafat a njô bôte yʼEdom be nga ke be nye.

¹³ Elizé a nga jô njô bôte ya Israél na: Za jame me bili a wo? Kelek e be bekulu mejô be nyua. Eyoñe te njô bôte ya Israél a nga jô nye na: Momo! Amu Nti a te foʼo loone bejô bôte bana belale na a kalane be e mo me Môab.

¹⁴ Elizé na: Ane Nti ya minsamba mewosan a vee, ôsu vié ñwô me tele! Nge me too ye bo te semé Yôzafat, njô bôte ya Yuda, me nji ye bisi wo nge fombô ke fombô wo.

¹⁵ Eyoñe ji, zaʼane ma môta mezik; nté ôse môta mezik a mbe a vôék, e wo Nti ô nga too be Elizé.

¹⁶ Ane a nga jô na: Avale di nde Nti a kobô na: Faʼane bibé e mone mbiʼili nyôna été!

¹⁷ Amu avale di nde Nti a kobô na: Mia ye bo te yen évuñulu, a mia ye bo te yene mveñ, ve mone mbiʼili nyô a ye jaé a mendim, a mia ye nyu, miabebien, mimbame biyeme mienan a betite benan.

¹⁸ Ve nalé a ne mone jam e mise me Nti; a ye kalane Môab e mo menan;

¹⁹ Mia ye tyame bitisone bise bi bili alem a bitisone bise bi ne biwôlô, mia ye baʼé mbamba bilé bise, mia ye jine menjeñe mendime mese, mia ye ndamane mbamba bifuse bi si bise a mekok .

²⁰ Mametyé, éyoñe ya nlitane mimvean, mveñ é nga so mfaʼa yʼEdom a si é nga jaé a mendim.

²¹ Eyoñe Bemôabite bese be wôʼôya na bejô bôt be maneya bete na, ba zu wosane be, be nga sulane ba bese be mbe nguleya jaé mengaa, toʼo na ba ba lôte valé, nde be nga tebe e nnéa si.

²² Be nga kôlô si ndibe tyé, a éyoñe jôb da taté faé e mendime yôp, Bemôabite be nga teme bivele mendim bi ntoo bʼôsu ane metyi.

²³ Nde be nga jô na: Metyi le! Bejô bôt be téya nkpwaté mekôn e zañe jab be maneya wôan; éyoñe ji, a Bemôabite, nkelane saane biôm!

²⁴ Ane be nga kui minkane ya Israél, ve Israél a nga kôlô si a bôé Môab, nye ve tub ôsu viap. Be nga nyiine sii Môab a tyame nye.

²⁵ Be nga tyame bitison, môt ase a nga wua akoʼo dé e mesi ma dañ abeñ, a jalé me a mekoʼo mete, be nga mane jine menjeñe mendime mese, a mane kpwé mbamba bilé bise si; jôm é nga liʼi ve mekaʼa me Kir-Arését, mme bôt be nga bili betoloo be nga bôman a tyam.

²⁶ Eyoñe njô bôte ya Môab a yeneya na mewosan me dañeya nye ngu, a nga nyoñe bôte ba té npwaté mekôn mintete zamgbwa na be kpwaʼé zen a kui be njô bôte ya Edom; ve be nji bo nguleya tube je.

²⁷ Nde a nga nyoñe ntôle monafame wé ô nga yiane jôô éjiane jé a ve wô mveane ba diʼi ngumba e beta mfine yôp. Ane beta ayaa a nga tôñe bôte ya Israél, nde be nga bôlé minkane be njô bôte ya Môab a bulan e si jap.