2 Bb. 22 - Bible en langue Bulu

Yôzias, njô bôte ya Yuda

¹ Yôzias a nga bili mimbu muam, éyoñ a nga tebe njô bôt; a nga jôô mimbu mewôm mela a wua e Yérusalém. Nyia a mbe jôé na: Yedida, ngone Adaya ya Bôtkat.

² A nga bo mam me ne mvaé e mise me Nti a wulu e zen ése David ésaa wé a nga wulu. A nji liʼi je e mbo nnôm nge mbo nga.

³ Mbu awôm a muame njô bôte Yôzias a nga jôô, ñwô a nga lôme Safan, ñyeme bekalate, e mone Atalia, e mone Mesulam, e nda Nti a jô nye na:

⁴ Bete be Ntuni nnen, Ilkiya a lañe moné ase ba zuu nye e nda Nti, nye bebaʼale mbé be nga nyoñ e be bôt.

⁵ Ba ye kalane nye e mo me ba be bili mbeʼe ya wulu ésaé ya nda Nti. Be ki ba ye ve nye ba ba bo ésaé ya kôme mevôme ya Nda Nti me maneya ndaman:

⁶ mintyetyeñ, e bôte ba lôñ, bemaot, asu ya kuse bilé a mekoʼo me ne mbaan, ma siliban asu ya kôme nda .

⁷ Ve ba ye bo te sili be sitoʼo ya moné ba kalane be mo, amu ba bo ésaé ane da yian.

Ba some kalate metiñ e nda Zambe été

⁸ Ane Ntuni nnen, Ilkiya, a nga jô Safan, ñyeme bekalate na: Ma te some kalate metiñ e nda Nti! Ilkiya a kalane nye Safan, nde a nga lañe nye.

⁹ Ane Safan ñyeme bekalate a nga ke be njô bôt. A nga kate njô bôte na: Bebo bisaé bôé be maneya suu moné a too e nda Nti, a kalane nye e mo me ba be bili mbeʼe ya tindi ésaé ya nda Nti.

¹⁰ Safan ñyeme bekalate, a nga kate fe njô bôte na: Ntuni Ilkiya a te kee ma kalate éziñ. Ane Safan a nga lañe nye asu be njô bôt.

¹¹ Eyoñe njô bôt a nga wôʼô mejô ya kalate metiñ, a nga nyabe mengômesane mé.

¹² Nde njô bôt a nga ve Ilkiya Ntuni, Ahikam e mone Safan, Akbor e mone Miké, Safan ñyeme bekalate a Asaya mbo ésaé njô bôt abendé na:

¹³ Kela silane nkômbane Nti asu dam, asu bôt a asu Yuda ase, ajô mejô ya kalate ba te som; amu ayaa Nti e ne anen, da yôñe bia nyô, amu bʼésaa bangan be nji ke vôʼôlô mejô ya kalate nyô, asu ya bo ane mam mese me ne ntilan été ajô dangan me né.

¹⁴ Ane Ntuni Ilkiya, Ahikam, Akbor, Safan a Asaya, be nga ke be nkulu mejôa minga ulda, nga Salum, e mone Tikva, mone Arhas, mbaʼale mengômesan. A nga too e Yérusalém, e mfefé tison.

¹⁵ Eyoñe be maneya kobô nye, a nga jô be na: Avale di nde Nti, Zambe Israél a jô na: Katane môt a te lôme mia be ma na:

¹⁶ avale di nde Nti a jô na: Ma ye zuu bidim e vôme nyô, a e be bôt be too été, avale mejô mese me ne ntilan e kalate njô bôt a te lañ me né.

¹⁷ Amu be liʼiya ma, a diʼi bezambe befe beôlobinda, a bo me na me wôʼôlun a mimboone ya mo map, ajô te ayaa dam é kalaneya nduan e vôme nyô, a e se nguleya dim.

¹⁸ Ve mia ye jô njô bôte ya Yuda a te lôme mia asu ya sili nkômbane Nti na: Avale di nde Nti, Zambe Israél a jô ajô ya mejô wo te wôʼô na:

¹⁹ amu nleme wôé wo te biban amu wo te sili womiene si e mise me Nti éyoñ wo te wôʼô jame me jôya vôme nyô a bôt be too été e too abé , vôm ate a ye bo jôm ôson a jôm ba biasé, a amu wo te nyabe mengômesane môé a yôn asu dam, ma fe me wôʼôya, nalé Nti a jô.

²⁰ Ajô te ma ye nyoñe wo e vôme bʼésoo bôé be né, wo ye nyoñebane mvoʼé e soñe jia ya mesoñe môé, a mise môé ma ye bo te yene bidim bise ma ye zuu bie e vôme nyô. Ane be nga ke kate njô bôt éyalane te.