2 Bb. 21 - Bible en langue Bulu

Manasé, njô bôte ya Yuda

¹ Manasé a mbe mimbu awôm a mibaé éyoñ a nga tebe njô bôt. A nga jôô mimbu mewôm metan e Yérusalém. Nyia a mbe jôé na Efsiba.

² A nga bo mam me ne abé e mise me Nti, a nga ve émien mfaʼa beangôndô mimboone meyoñe Nti a nga wôlé biôm ôsu bone bʼIsraél.

³ A nga beta lôñe bito ya bikôndôʼô yôp mbie ésaa wé Ezékias a nga mane vaa, a nga lôñe baal metaʼa metunaʼa, a nga bo akône akéra aval Akab, njô bôte ya Israél a nga bo, a nga kut ateté ya yôbe meboñe si a kañe de.

⁴ A nga lôñe metaʼa metunaʼa e nda Nti nje Nti a nga jô na: E Yérusalém, nye ma ye tooé jôé dam.

⁵ A nga lôñ ateté ya yôbe metaʼa metunaʼa e minseñe mibaé ya nda Nti.

⁶ A nga diʼi monafame wé e nduan; a nga biʼi mame ya melu ôsu a bo majik. A nga telé bôt ba loone bôt be maneya wu be biʼi fe mame ya melu ôsu. A nga ke ôsu a dañe bo mam me nʼabé e mise me Nti a bo nye na a wôʼôlun.

⁷ A nga telé éveʼela akéra a nga bo e nda Nti a nga jô David a mone wé Solômon na: E nda nyô a e Yérusalém nye me nga tob e meyoñ mese ya Israél été na, ma ye tooé jôé dam nnôm éto;

⁸ Ma ye bo te beta bo na, mebo me Israél me ndeñ atane ya si me nga ve bʼésaa, nge ba baʼale a bo mam mese me nga bendé be, aval ane atiñ ese mbo ésaé wom Môze a nga ve be e né.

⁹ Ve be nji ke wôk, a Manasé a nga yale be feñ, a kui na be nga bo abé a dañe meyoñe Nti a nga tyam ôsu bone bʼIsraél.

¹⁰ Eyoñe Nti a nga kobô a anyu bebo bisaé bé bekulu mejô na:

¹¹ Amu Manasé, njô bôte ya Yuda a nga bo beangôndô be mame bana, amu a nga bo éndaman a dañe mam mese Beamorééñ be nga bo nye ôsu, a amu a nga bo na Yuda a bo abé a bengunemelane bé,

¹² ajô te ñhe Nti, Zambe Israél, a kobô na: Ma zuu bidim e Yérusalém a e Yuda, e too na, melo ma ye bo ne miaññ e be nyô ase a ye wôʼô be kobôʼô jame te.

¹³ Ma ye limi nkole Samari a lévo ya nda Akab, e tisone Samari. Ma ye fimi Yérusalém ane ba fimi beta ésua a buti nye asu si, éyoñe be maneya nye fimi.

¹⁴ Nde ma ye telé mebukaʼa ye ngabe jam e fefe, a kee be e mo besiñe bap; besiñe bab bese ba ye sa be a telé be soé,

¹⁵ Amu be nga bo mam me nʼabé e mise mam, a bo na me wôʼô ôlun, ataté môse bʼésaa be nga kôlô Ejipte, a kui e môse wu.

¹⁶ Manasé a nga kuli fe metyi abui me ne teke bijô, a jalé Yérusalém a metyi mete, ataté akuʼu di a kui di avok, te lañ abé a nga dutu Yuda na a bo mam me ne abé e mise me Nti.

¹⁷ Mimboone mivoʼo ya be Manasé, ma mese a nga bo, a abé a nga bo, me ne ntilan e kalate minkañete bejô bôte ya Yuda.

¹⁸ Manasé a nga bômbô baa bʼésaa a jambe afube ya nda jé, afube Uza. Mone wé Amon a nga jôô éjiane jé.

Amon, njô bôte ya Yuda

¹⁹ Amon a nga bili mimbu mewôm mebaé a mitan éyoñ a nga tebe njô bôte, a nga jôô mimbu mibaé e Yérusalém. Nyia a mbe jôé na Mesulémét, ngone Arut ya Yôtba.

²⁰ A nga bo mam me ne abé e mise me Nti, aval ésaa wé Manasé a nga bo;

²¹ A nga wulu e zen ése ésaa wé a nga wulu, a nga kañe bengunemelan ésaa a nga kañ a kute be meboñe si;

²² A nga liʼi Nti, e Zambe bʼésaa, a a nji wulu e zene Nti.

²³ Bebo bisaé bʼAmon be nga bôndé feʼe ya bo nye abé . Be nga wôé njô bôt e nda jé été.

²⁴ Ve bôte ya si éte be nga wôé bôte bese be nga bôndé feʼe ya bo njô bôt Amon abé; nde be nga telé mone wé Yôzias njô bôt éjiane jé.

²⁵ Miboone mivoʼo ya bʼAmon a mam a nga bo, bi ne ntilan e kalate minkañete bejô bôte ya Yuda.

²⁶ Be nga jame nye e soñe jé, afube Uza. Mone wé Yôzias a nga jôô éjiane jé.