2 Bb. 2 - Bible en langue Bulu

Nkeane yôp Elie, Elizé a nyoñe nsisime wé

¹ Avale di nde mam me nga boban éyoñe Nti a nga nyoñ Elie yôp e beta ôkôs été: Elie a Elizé be nga kôlô Gilgal.

² Elie a lôme ma me ke kui e Bétél. Elizé a nga yalane na: Ane Nti a vee a ane nsisime wôé fe ô vee! Ma ye bo teke kandane wo. Ane be nga ke e Bétél.

³ Ane nsamba bekulu mejô ô nga too Bétél ô nga zu tôban Elizé a jô nye na: Ye wo yeme foʼo na Nti a ye vaa masa wôé den e nlô wôé yôp? A nga yalane na: Ma fe ma yeme nalé; tabaʼane bivô!

⁴ Elie a nga jô nye na: A Elizé wo zu liʼi va amu Nti a lôme ma e Yérikô. Elizé na: Ane Nti a vee, a ane nsisime wôé ô vee! Ma ye bo te kandane wo. Ane be nga kui Yérikô.

⁵ Nsamba bekulu mejô ô nga too Yérikô, be nga zu bebé be Elizé a jô nye na: Ye wo yeme foʼo na Nti a ye vaa masa wôé den e nlô wôé yôp? A nga yalane na: Ma fe ma yeme nalé tabaʼane bivô!

⁶ Elie a nga jô nye na: Wo zu liʼi va, amu Nti a lôme ma e Yordan. Elizé na: Ane Nti a vee a ane nsisime wôé ô vee, ma ye bo te kandane wo! Nde bebaane be nga kee dulu dab ôsu.

⁷ Bôte mewôm metane ya nsamba bekulu mejô be nga suan a tebe zôsôô a Yordan, Elie ba Elizé be too be ôyab, be ki be nga tebe bebé a Yordan bese bebaane.

⁸ Ane Elie a nga nyoñ alôʼô dé, a mane vuluku de, ve bibi de mendim, me ve kandane li a li, nde bese bebaane be nga lôt e nkôt été.

⁹ Eyoñe be lôteya, Elie a nga jô Elizé na: Siliʼi e jam wo kômbô na me bo wo te na me kôlô be wo. Elizé na: Ma yeʼelane wo na: Ngab ébaé ya nsisime wôé é zu be ma.

¹⁰ Elie na: Wo sili jôm é nʼayaé. Ve nge wo yene ma éyoñ ma ye kôlô fefele jôé, jame te da ye bobane wo avale wo sili; nge nalé momo wôna jame te daa ye ke boban.

¹¹ Be ngenane be wuluʼu a kobô, ateme na, vagoñe nduan a bikabela bi nduan bi nga kandé be. Ane Elie a nga bete yôb ôlendé été.

¹² Elizé a nga lôô a yôtaʼane na: A ésaa wom! A ésaa wom! Vagoñ yʼIsraél a nsamba bikabela wé! Eyoñ a dimesaneya nye mis, a nga bi mengômesane mé a nyabe me bifuse bibaé,

¹³ a toʼé alôʼô Elie a nga wua si. Ane a nga bulan a tebe e kindiʼi Yordan;

¹⁴ a nga nyoñ alôʼô Elie, a nga wua de si a bibi de mendim a jô na: Nti, e Zambe Elie a ne vé? Nye fe a nga bibi mendim, me ve kandane li a li. Ane Elizé a nga lôt.

¹⁵ Ane nsamba bekulu mejô ô nga tele zôsôô a Yérikô, be nga yene nye a jô na: Nsisim Elie ô ne bʼElizé! Ane be nga ke tôbane nye a kute meboñe si ôsu vié.

¹⁶ Be nga jô nye na: Tame yen, biwôlô bi bôt mewôm metan bi ne ézezañe ya bebo bisaé bôé été. Be kele jeñe masa wôé! Ndôʼôtô na Nsisime Nti wo te kee nye a wua nye e nkôl éziñ, nge mbiʼili éziñ. A nga yalane be na: Te lômane be!

¹⁷ Ve be nga yemete nye. Nde a nga jô be na: Lômane be. Nde be nga lôme bôte mewôm metan, be ve jeñ Elie tañe melu mela, ve be nji ke yene nye.

¹⁸ Ane be nga beta zu bʼElizé mfaʼa a nga liʼi e Yérikô; a nga jô be na: Ye me nji jô mia na: Te mia ke wé?

Mendime me Yordan

¹⁹ Bôte ya tison be nga jô Elizé na: Éto ya tison é ne mvaé, avale masa wom a lôô; ve mendim me nʼabé a si ébien étua ayet.

²⁰ Elizé na: Zaʼane nye ésua.

²¹ Nde a nga ke e anjeñe mendim, ve kutane nku été a jô na: Avale di nde Nti ajô na: Me fubuya mendime ma; awu da ye bo te beta so été.

²² Ane mendim me nga bo mfuban a kui môse wu, avalʼane mejô Elizé a nga kobô me mbe.

Zambe a yaa bone be bongô ba kpweʼele Elizé

²³ Akôlô ya valé a nga ke Bétél, a kele zen , ane ayôme bobefam da so tison e nga kpweʼele nye be jôʼô nye na: Betek ayane nlôa môt! Betek ayane nlôa môt!

²⁴ A nga kôñelan a fombô be a yoʼé be e jôé Nti. Nde beyale beze bebaé be nga so afan a nyabe bisoé mewôm menyin yʼété bifuse bifus.

²⁵ Akôlô ya valé a nga ke e nkôle Karmél vôm ate a nga téé a bulane Samari.