2 Bb. 13 - Bible en langue Bulu

Yoakaz, njô bôte ya Israél

¹ Mbu mewôm mebaé a lale Yoaz e mone Akazia, njô bôte ya Yuda a nga jôô, ñwô Yôakaz, e mone Yéhu, a nga tebe njô bôte ya Israél e Samari tañe mimbu awôm a zamgbwa.

² A nga bo mam me nʼabé e mise me Nti; a nga vu abé Yérôbôam, e mone Nébat, a nga tindi Israél na a bo; a nji ke saʼale de.

³ Ane ayaa Nti e nga yôñ Israél nyô, nde a nga kalane nye éyoñ ése e mo me Azaél, njô bôte ya Siri, a e mone Bén-Adad, e mone Azaél, nté ôse bejô bôte bete be nga vee.

⁴ Ane Yôakaz a nga yeʼelane Nti. Nti a nga wôʼô nye, amu a nga yen étibelaʼa Israél, ataté éyoñe njô bôte ya Siri a nga tibili nye,

⁵ a Nti a nga ve Israél nkôté bôt. Ajô te bone bʼIsraél be nga tub e mo Besirieñ a tabe menda bindelé map ane melu mvus.

⁶ Ve be nji ke saʼale abé ya nda Yérôbôam é nga tindi Israél na a bo; be nga ve bebien abé te, a tôñe zen éte, toʼo na akôn éveʼela akéra fe é nga liʼi é tele e Samari.

⁷ Nti a nga liʼi Yôakaz, ane minsamba, foʼo ve bewulu bikabela mewôm metan, bevagoñ awôm a bôt ba wulu a mebo toyini awôm; amu njô bôte ya Siri a nga mane wôé be, a bo be na be funane mbuluk ba tibi a mebo.

⁸ Mimboone mivoʼo Yôakaz, jam ése a nga bo a éwôlô jé, mam mete me ne ntilan e kalate minkañete bejô bôte ya Israél.

⁹ Yôakaz a nga bômbô baa bʼésaa, be nga jame nye e Samari. Mone wé Yôaz a nga jôô éjiane jé.

Yôas njô bôte ya Israél

¹⁰ Mbu awôm a zamgbwale Yôas njô bôte ya Yuda a nga jôô, ñwô Yôa, e mone Yôakaz a nga tebe njô bôte ya Israél e Samari. A nga jôô mimbu awôm a misaman.

¹¹ A mbe a boʼok e mam me nʼabé e mise me Nti; a nji ke saʼale toʼo ve abé da ya ma Yérôbôam, e mone Nébat, a nga tindi Israél na a bo, a nga wulu e zen éte.

¹² Mimboon mivoʼo Yôas, mam mese a nga bo, éwôlô jé, bita baa Amasia, njô bôte ya Yuda be nga bo, mam mete me ne ntilan e kalate minkañete bejô bôte ya Israél.

¹³ Yôas a nga bômbô baa bʼésaa. Yérôbôam baa a nga tabe éto njôane jé. Be nga jame Yôas e Samari baa be bejô bôte ya Israél.

Awu Elizé

¹⁴ Eyoñe Elizé a nga kon ôkon a nga wu wô, Yôas, njô bôte ya Israél, a nga ke be nye a yôn asu dé yôp a jôʼô na: Ésa wom! Esaa wom! Vagoñ ya Israél a nsamba bikabela wé!

¹⁵ Elizé a nga jô nye na: Nyoñ élaé a mekoñ. Ane a nga nyoñ élaé a mekoñ.

¹⁶ Eyoñe te Elizé a nga jô njô bôte ya Israél na: Limitiʼi élaé a wo wôé! Eyoñ a limitiya je a wo wé, Elizé a nga beté mo mé e mo me njô bôt a jô na:

¹⁷ yoʼé vundi mfaʼa jôb da tôô! Ane a nga yooé nye. Elizé na: Wuʼa! Nde a nga wua. Elizé na: Akoñe ya nyiane wo so be Nti nde le, akoñe ya nyiane wo wosane Besirieñ; wo ye bôé Besirieñ Afék akekui wo ye jiane be.

¹⁸ Elizé a nga beta jô njô bôte ya Israél na: Lumuk e si! Nde a nga lum biyoñ bilaa a tebe.

¹⁹ Ane môta Zambe a nga yaa nye a jô na: Wo te yiane lum biyoñ bitan nge bisaman; éyoñe te ô nga tyaʼa Besirieñ akekui wo mane jiane be; éyoñe ji wo ye tyaʼa be ve biyoñe bilaa.

²⁰ Ane Elizé a nga wu, nde be nga jame nye soñ. Mbu ô nga tôñe valé, nde minsamba Bemôabite mi nga nyiine si.

²¹ A nga bo na be jame môt, ateme na nsamba wua yʼété ve kuu. Nde be nga wua môt e soñe Elizé; ane môt a nga nnambe bivese bi Elizé, ndʼa nga wômô a beta tebe tetele a mebo mé.

²² Azaél, njô bôte ya Siri a nga tibili bone bʼIsraél nté ôse Yôakaz a nga vee.

²³ Ve Nti a nga mvamane be; a nga ko be éngôngo a a nga kôñelane e be be, amu élate jé a nga bo a Abraham, Izak a Yakob; a nji kômbô mane tyame be, nge bene be na be kôlô nye mis a kui éyoñe ji.

²⁴ Ane Azaél, njô bôte ya Siri a nga wu a e mone wé Bén-Adad a nga jôô éjiane jé.

²⁵ Yôas, e mone Yôakaz a nga beta nyoñe bitison e mo me Bén-Adad, e mone Azaél, bitisone Azaél a nga nyoñ e mo mʼésaa wé Yôakaz éyoñe bita bi nga boban. Yôaz a nga dañe be biyoñe bilaa a beta nyoñe bitisone ya Israél.