2 Bb. 11 - Bible en langue Bulu

Atali, njô bôta minga e Yuda

¹ Atali, nyia Akazia a nga yene na mon a wuya. Ane a nga kôlô si a mane wôé mvoñe bôte njô bôt ése.

² Ve Yehôséba, ngone njô bôte Yôram, kale Akazia, a nga nyoñe Yôaz e mone Akazia a vaa nye asoé e zañe bone be njô bôt be mbe na ba zu wôé; a nga futi nye étune nda , e binoñ baa minga a baʼale nye. Nde be nga solé nye e mise me Atali a a nji ke wôéban.

³ A nga tabe mimbu misaman e nda Nti ba Yehôséba. Melu mete Atali nye a mbe njô bôte ya si.

Atali a kôlô éto a wôéban, Yôaz a bo njô bôt

⁴ E mbu zamgbwale, Yehôyada a nga lôme bôt be ke nyoñe bivete mintete ya Bekarisieñ a bemate bikabela. A nga zuu be fefele jé e nda Nti. A nga bo élat a be, a bo be na be kane ngana e nda Nti a liti e mone njô bôt.

⁵ Eyoñe te a nga ve mebendé ma na: Avale di nde mia ye bo: e ba ya be mia ba bo ésaé e môse Sabat, ngabe jia ya ngab éla ja yiane baʼale nda njô bôt,

⁶ ngabe lale fok ja ye baʼale mbé ya Sur, a nyô ja suʼulan ja ye tebe mbé e mvuse bemate bikabela;

⁷ Ngabe jenan ébaé fok, ba bese ba kôlô ésaé jap e môse sondô, ba ye baʼale nda Nti be tele fefele njô bôt.

⁸ Mia ye bômane njô bôt mimfaʼa mise, môt ase mengale mo, a ba ye wôé môt ase a ye sembe e minnoñ ôsu; mia ye tebe fefele njô bôt éyoñ a kui atan a éyoñ a nyiin e nda été.

⁹ Ane bivete ya mintet bi nga bo mebendé mese ntuni Yehôyada a nga ve. Be nyoñe môt ase, e bôte bé, ba ba nyiin e nda Nti e môse Sabat a ba ba kui e môse Sabat. Be nga ke be ntuni Yehôyada.

¹⁰ Ane ntuni a nga kalane be mekoñ a biben bi mbe asu njô bôte David a mbie bi mbe e nda Nti, a nga kalane bie e be bivete ya mintet.

¹¹ Bemate bikabela, môt ase mengale mo, be nga tele ataté mbo nnôm a kui mbo ngale ya nda , mfôm ataʼa metunaʼa a mfôme nda na be bômane njô bôt.

¹² Ane Yéhôyada a nga kuli mona njô bôt atan, a nga jalé nye ékat a mendem me njô bôt. Be nga telé nye njô bôt a woʼo nye mbon be kute mefas a jô na: Ényiñe njô bôt é boʼo ayap.

¹³ Atali a nga wôʼô tyiñe bemate bikabela a nyô bôt. Ane a nga zu e vôme bôt be mbe e nda Nti a fombô:

¹⁴ a yene na njô bôt a tele ôsu e fusbôden, aval éyem é né; bivet a metoñ bi tele fefele njô bôt: bôte bese ya si be mbe mevaʼa été, be loñe metoñ. Atali a nga nyabe mengômesane mé a yôtane na: Njoñ!

¹⁵ Ane Ntuni Yéhôyada a nga bendé bivete ya mintet a bejôô nsamba mewosane na: Kulaʼane nye e minnoñ atan a wôé môt ase a ye tôñe nye a nkpwaté mekôn. Amu Ntuni a nga jô na: Be boʼo te wôé nye e nda Nti!

¹⁶ Nde be nga bi Atali, a éyoñ a nga kui nda njô bôt anyiine bikabela, a nga wôébane vôm ate.

¹⁷ Yehôyada a nga bo élat e zañe Nti, njô bôt a bôte na, be bo ayoñ e ne asu Nti; a nga bo fe élat e zañe njô bôt a ayoñ.

¹⁸ Ane bôte bese ya si be nga ke e nda baal, be tyame je, be mane fe buʼu metaʼa metunaʼa mé teke liʼi jôm, nalé fe biveʼelaʼa bié, a wôé fe Matan, ntuni baal, e metaʼa metunaʼa ôsu. Ane ntuni Yehôyada a nga telé bôt be baʼale nda Nti,

¹⁹ mvuse valé a nga nyoñe bivete ya mintet, Bekarieñ, bemate bikabela, a bôte bese ya si; be nga soo njô bôt e nda Nti, ane be nga lôt e mbé bemate bikabela a ke e nda njô bôt. Nde Yôaz a nga tabe éto bejô bôt.

²⁰ Bôte bese ya si be mbe mevaʼa été a tison é nga tabe évôvoé été. Ve be nga wôé Atali e nda njô bôt été a nkpwaté mekôn.