2 Bb. 10 - Bible en langue Bulu

Yéhu a ke ôsu a jiane nda bôt Akab

¹ Bone bʼAkab mewôme zamgbwa be mbe Samari, Yéhu a nga tili bekalate a lôme be Samari e be bivete ya Yizrél, e be bemvendé a e be benyoñe toya be too bone bʼAkab. Ntilan ô mbe ô jôʼô na:

² Eyoñe ji, nné ane kalate nyô a ye kui be mia, amu mia be bone be masa wônan mi né, amu fe mi bili bevagoñ a bikabela, tison é ne mbôman a ôlem, a mi bili fe menga,

³ mia ye yen mbé ya bone be masa wônan, a dañe mbamba môt a yeme fe ésaé, mia ye tooé nye éto njôan ésaa wé; wôna a ntoo ve wosan asu nda masa wônan!

⁴ Nde be nga dañe ko woñ a jô na: Tame yene bejô bôte bebaé be nji bo nguleya dañ ôsu vié, biabebien bi ne nguleya dañ aya?

⁵ Nde mbaʼale akume ya nda njô bôt a ngovina ya tison, bemvendé a benyoñe toya be nga lôme Yéhu tyiñe na: Bi ne bebo bisaé bôé a bia ye bo jam ese wo ye jô na bi bo; bi nji ke telé môt éziñe njô bôt, boʼok e jam wo ye yene mvaé e mise môé.

⁶ Yéhu a nga tili be kalate baa na: Nge mi ne asu dam a nge mia wôʼô ma, nyoñane minlô mi bôte bete, bone be masa wônan a zaʼane be ma a akiti aval awolo di, e Yizrél. Bone be njô bôt mewôme zamgbwale ki be mbe e be biwôlô bi bôte ya tison, mbe be nga yalane be.

⁷ Eyoñe kalate a nga kui be be, be nga nyoñe bone be njô bôt a tyiʼi bôte bete mewôme zamgbwale tyiñ; wôna be nga futi minlô miab e minkoé a lôme mie Yéhu e Yizrél.

⁸ Mbeʼe foé a nga zu kate nye na: Minlô mi bone be njô bôt mi maneya so. Nde ñhe Yéhu a nga jô na: Bôʼane mie mevise mebaé anyiine mbé a kui mametyé.

⁹ Mametyé, a nga kui atan, nde a nga tebe bôt ôsu a jô na: Mi ne zôsôô ! Ma nyô, me nga koñe masa wom a me nga wôé nye; ve za a te wôé bana bese?

¹⁰ A nto ñhe ve yemane na teke jame da ya nkobô abé Nti a nga kobô e nda Akab da ye liʼi te tôéban; Nti a tôé e jam a nga kobô anyu be mbo ésaé wé Elie.

¹¹ Ane Yéhu a nga wôé ba bese be nga liʼi e nda Akab e Yizrél: biwôlô bi bôte bié bise, bemvôé bé, betuni bé wua teke fam.

¹² Wôna a nga kôlô si a ke Samari. E zene zañ, e vôm ba loone na Bét-Ekéd bebaʼale mintômba,

¹³ Yéhu a nga koone bobenyañe be Akazia, njô bôte ya Yuda a sili be na: Mi ne beza? Be na: Bi ne bobenyañ be Akazia, njô bôte ya Yuda, bia ke batane bone be njô bôt a bone be nga njô bôt.

¹⁴ Nye na: Biane be bevevee. Be nga bi be bevevee, ve tyiʼi be a wua be ébé mendime ya Bét-Ekéd. Bôte bete be mbe mewôm menyin a bebaé a Yéhu a nji jôʼé toʼo ve môte wua na a tup.

Yéhu a jiane bekulu mejô be baal

¹⁵ Eyoñ a kôlôya valé, a nga koone Yônadab, e mone Rékab a zaʼa nye ôsu. A nga batane nye a jô nye na: Ye nleme wôé ô ne te meduʼan ane éñwom ô né e mfaʼa wôé? Yônadab a nga yalane na: Ô ne nalé. Yéhu a nga beta jô na: Nge nleme wôé ô ne nalé, keʼe me wo wôé. Yônadab a nga kee nye wo. Eyoñe te Yéhu a nga daa nye fefele jé e vagoñ été.

¹⁶ A nga jô nye na: Zaʼa be ma a yen abim ayôñe me bili asu Nti. Nde a nga kee nye e vagoñe wé été.

¹⁷ Eyoñ a kuiya Samari, a nga sondô mane wôé mebukaʼa ya ba be mbe bôte be Akab e Samari, a nga jiane be ne meñ avale Nti a nga kobô Elie.

¹⁸ Eyoñe te Yéhu a nga sulane bôte bese a jô be na: Akab a nga bo baal bisaé ôyôm abim, Yéhu a ye saane nye abui.

¹⁹ Eyoñe ji bañetaʼane ma bekulu mejô be baal bese, ba bese ba saane nye, a betuni bé bese, wua te jemban, amu ma zu ve baal mimvean mi nʼanen; môt ase a ye jemban a ye bo te nyiñ. Yéhu a nga bo nalé a atyeñ ése na a mane jiane bôt ba saane baal .

²⁰ Yéhu na: Telaʼan ngum ésulan asu baal . Ane be nga mialane foé yʼété.

²¹ Ane Yéhu a nga lôme bekatefoé Israél ase; a bôte bese ba saane baal be nga mane so, teke wua a nga liʼi te so. Ane be nga nyiin e nda baal, a nda baal é nga jaé ataté akuʼu di a kui di avok.

²² A nga jô nyô a mbe a baʼaleʼe biyé na: Kuliʼi mengômesan atan asu bôte bese ba bo baal bisaé. Nde a nga kuli mengômesan atan.

²³ Eyoñe te Yéhu ba Yônadab, e mone Rékab, be nga zu e nda baal a jô bôte bese ba bo baal bisaé na: Jeñan a fombô, nalé bebo bisaé be Nti ba ye bo te yené va, ve bebo bisaé be baal étam.

²⁴ Wôna be nga nyiine na be ve bityiʼa a mimvean mi ne ngumba. Yéhu a nga telé bôte mewôme muam atan a jô be na: Nge wua ya bôt ma ve e mo menan a tup, ma ye sili ényiñ éjian ényiñ.

²⁵ Eyoñe mveane mimvean ô ne ngumba ô maneya, Yéhu a nga jô bemate bikabela a bebeʼe bibene na: Nyiʼan a wôé be, môte wua a boʼo te kui atan. Ane be nga wôé be a meyo me nkpwaté mekôn. Bemate bikabela a bebeʼe biben be nga wua be valé, ane be nga ke a kui e tison é nga bili nda baal.

²⁶ Be nga kuli mimbaane mekôn atane ya nda baal, a wua me e nduan.

²⁷ Be nga sôʼôlô akôn e ne éveʼela baal si, be sôʼôlô fe nda baal si, a bo je nda éduk, nje é ne a kui e môse wu.

Ejôé Yéhu

²⁸ Yéhu a nga tyame baal ézezañe Israél.

²⁹ Ve a nji saʼale abé Yérôbôam, e mone Nébat a nga tindi Israél na a bo, nalé ane na bone benyaʼa be or be mbe e Bétél a e Dañ.

³⁰ Ane Nti a nga jô Yéhu na: Amu ô nga bo jam e mbe zôsôô e mise mam, a bo bôte ya nda Akab e jam e nga yian, avalʼane nkômbane wom ô né, ajô te bone bôé akekui miaé nyini, ba ye tabe éto njôane ya Israél.

³¹ Vʼakôsa bo nalé, Yéhu a nji tabe ntyele ya wulu a nleme wé ôse avalʼane metiñe me Nti, Zambe ya Israél me né, a nji ke saʼale abé Yérôbôam a nga tindi bone be Israél na be bo.

³² Melu mete Nti a nga taté na, a fese si ya Israél, Azaél a nga bôé be nnéa si ase ya Israél.

³³ Ataté Yordan, mfaʼa jôb da tôô, a nga bôé si ése ya Galad, Begadite, Berubenite a Bemanasit, ataté Aroér a ne e mesôʼô ya Arnon, a kui Galad a e Basañ.

³⁴ Mimboon mivoʼo Yéhu a nga bo, mam mese a nga bo a éwôlô jé ése, ye mam mete me nji bo ntilan e kalate minkañete bejô bôte ya Israél.

³⁵ Ane Yéhu baa bʼésaa be nga bômbô vôme wua, be nga jame nye e Samari. Mone wé, Yôakaz, a nga jôô éjiane jé.

³⁶ Yéhu a nga jôô Israél e Samari mimbu mewôm mebaé a muam.