1 Tim 6 - Bible en langue Bulu

Belo

¹ E ba bese be ne éto belo si, ba yiane yene bemasa bap ane ba ba yian ésemé mimfaʼa mise. Nalé jôé Zambe a ñyeʼelane wongan bia ye bo te biaséban.

² E ba be bili bemasa ba buni, be boʼo te biasé be, a éfia na: Be ne bobenyañ ya mbunan. Ve be vianeʼe dañe dañe bo be ésaé mvoʼé , amu be ne bebuni a bobenyañe ya nyeʼan, mbe ba nyoñe ngabe ya mbamba ésaé wop. E jam wo yiane yeʼele a bendé e nde le na:

Nya ésaé Zambe

³ nge môt éziñ a yeʼele ñyeʼelan ôfe, nge a bo te kabetane benya mejôô me Nti wongan Yésus Krist a ñyeʼelan wo luʼan a mbunane wongan,

⁴ yeme na, a ne ndim amu mebun. A ne ndiman, nkôkon wo jeñe ve nsañetaʼane a bifia bi môman. Vôm ate minyamete, mewôman, nkobane Zambe ébiasé,

⁵ mbia menyiñ a môman me ne te tyiʼi e zañe bôt be bili mbia nsisim , teke nguleya yeme benya mejô. Ba buni na, mam ma fombô mbunan me ne anjeñe mebuʼuban.

⁶ Yaa, mfi ô ne e mame ya mbunan, mfaʼa nyô a vak a abim a bili.

⁷ E ne été na, bi nji soo jôme si nyôna été. Avale te fe bia ye bulan teke kee jôm.

⁸ Nde nge bi bili bidi a mengômesan, bia yene mvaé.

⁹ Ve mfaʼa ba ba kômbô bo minkukum, ba bili ôlame mebôbelaʼa , abui mbia minkômban mi ne tee fek, mi mia ndamane bôt, a kee be nkuan a njañan.

¹⁰ E ne été na, ôzañ akum ô ne ndi ya mbia be mame mevale mese. Amu mveane binyiñe biab été, bôte bevok be nga dimi fé a liʼi mbunan ôyap, a suʼulane nyabe minsisim miap a jama alun.

¹¹ Ve wo, a môta Zambe, saʼaleʼe mam mete. Jeñe zôsôô , mboone mam me Zambe, mbunan, nyeʼan, mban a évôvoé.

¹² Wosaʼane mbamba mewosan me mbunan, jeñ ényiñe ya melu mese, nje éte ô nga loban, aval ane ô nga mem mbunan mbamba mmeman ôsu ya abui bengaa.

¹³ Ma bendé wo asu Zambe, nyô a ve biôme bise ényiñ a e di Krist Yésus, nye a nga bo ngaa asu Ponse Pilate e mbamba mmemane mbunan wé été na:

¹⁴ baʼaleʼe abendé te, teke aton nge bijô, akekui éyoñ Nti wongan Yésus Krist a ye yené,

¹⁵ ane nyô étam a ne Nkukuma, njôô ya bejôô, a ye liti e biyoñ bi ne ntelan.

¹⁶ Nye ate étam a ne te wu. A too éfufup é ne teke akui bebé été, teke môt a nga yene nye nge bo ngule ya yene nye. Etôtok a ngu bi boʼo be nye. Amen.

Melebe ya lebe minkukum

¹⁷ Jôʼô minkukume ya si nyôna na, be bo te bo mebun, a telé ndi minleme jap e be akum e ne teke jôme ya tabe je ndi ve e be Zambe nyô a ve bia biôme bise abui abui na, bi wôʼô mevak.

¹⁸ Be boʼo mvaé, a bo minkukume mfaʼa ya mbamba mimboon. Be boʼo ésôs a kabane mvaé a bôte bevok.

¹⁹ Nde ba ye kôane bebien mbamba akum a libi melu ôsu, a bi ényiñ é ne foʼo nya ényiñ.

Mebatan

²⁰ A Timôté, baʼaleʼe jôm é nga vebane be wo. Saʼaleʼe mbia minkobô a bisô bi ékotekote ñyeman.

²¹ Amu bôte bevok be nga buni na ba yem, ane be nga viane liʼi mbunan. Mvam é tabeʼe be wo!