1 Tim 5 - Bible en langue Bulu

Bebuni mevale meva

¹ Te komekane nnôme môt, ve ô lebe nye aval ane wo lebe éso. O kobôʼô bendômane be bôt aval ane bobenyoñ,

² benya binga aval ane benyua, a bengone be binga aval ane be benyôkal, ve a mfuban ôse.

³ Seméʼé minkus, e mi mi ne foʼo minkus.

⁴ Yaa, nge nkus ô bili bon nge bendaé, e mbe ba yiane taté yéʼé na be bo mam me mbunan mfaʼa menda me bôte map, a suʼulane yaʼane bebiaé bap. Nalé nye a ne foʼo mvaé e mise me Zambe.

⁵ Mfaʼa ya wu ô ne foʼo nya nkusu, e wu wo kôme foʼo nyiñ étam, ô teléya ndi nleme jé be Zambe a wo bo mbane ya jaʼé a yeʼelan môs baa alu.

⁶ Ve wu wo simesane ve mimvôman, ô ne ñwuan, ô kusa bo vevee.

⁷ Mam mete mme fe wo yiane bendé, nde mia ye bo tee bijô.

⁸ Nge môt éziñ a bo te baʼale bôte bé a dañedañ ba ba nyiñ e nda jé, a beneya mbunan. A ne abé a lôte môt a ne te buni.

⁹ Minga a ye tiliban nsamba minkus vengevenge ve a ntoo mimbu mewôm mesaman, a na a nga bili ve nnôme wua.

¹⁰ Ba yiane fe yeme nye amu mbamba mimboone mié: a nga yale bon a too fe anyep, a nga sôbe mebo mimfufup, a volô bewôʼô ôlun minlem, a ve fe émien mfaʼa ya bo bôt e mam mese me ne mvaé.

¹¹ Ve mfaʼa minkus mi ne bengon, wo ye bo te kañese mie. Amu éyoñ minkômbane miap mia ye dutu be na be lume Krist mvus, ba ye kômbô beta ke meluk,

¹² a zuu mekua e be bebien amu be tyameya ntiñetane wop ya ôsu.

¹³ Nalé fe na, amu be nji bi ésaé ya bo, ba yéʼé ke bimo e menda menda. Saa ve na be nji bi ésaé ya bo, ve ba kobô ékobôkobô, ajô te sobô.

¹⁴ Ajô te ma kômbô na bisoé minkus mi beta ke meluk, be bi bon , be baʼale menda map, a bo te ve afôla e be bibôta bi nsiñ.

¹⁵ Amu éyoñ ma kobô ji, mivok mi yaleya feñ a tôñe Satan.

¹⁶ Nge minga a buni a bili minkus, a vumane mie, a baʼaleʼe mie. E nji bo mvaé na keké é beʼe mbeʼe te, nde ja ye bi éyoñe ya beʼe mi mi ne foʼo minkus.

¹⁷ Bemvendé ba jôô mvaé, ba yiane nyoñ ésemé mebime mebaé, a dañedañe ba ba tuʼu nyôl ésaé nkatane Mbamba Foé, a e ñyeʼelan.

¹⁸ Yaa, mintilan mia jô na: wo ye bo te dibi anyu nnôme nyak a tibi fese yôp, a na: Mbo ésaé a yiane nyoñe maʼane mé.

¹⁹ Te kañese mboʼolan ba boʼolô mvendé ajô, vengevenge ve bengaa be ne bebaé nge belaa.

²⁰ E ba ba bo abé , ô komekaʼane be ézezañe bôt été. Nalé ba bevoʼo ba ye ko woñ.

²¹ Ma vu wo soñ asu Zambe a di Krist Yésus a mintobane be éngele na: Baʼaleʼe metiñ mete, teke ôbangam, teke bo jam éziñ a nsemane mingum mi bôt.

²² Te bo ôjejaʼa ya beté môt éziñe mo, te nyoñe ngabe ya éza abé . Baʼaleʼe womiene mfuban .

²³ Jôkéʼé nyu ve mendim étam, nyaʼa fe woon mon abim, amu ôsañe wôé, a amu mbane ateʼe nyôle wôé.

²⁴ Abé bôte bʼéziñ da yené ne ngeññ, jaʼa be ngenane te ve be mekua. Ve di bôte bevok e wôʼô suʼulane yené atan.

²⁵ Mbamba mimboon, mmie fe mia yené ne ngeññ. Ve jaʼane mi mi ne nsolan mi wôʼô suʼulane yené.