1 Tim 4 - Bible en langue Bulu

Mebendé mfaʼa Timôté

¹ Nsisim a jô de ne sañesañ na: Biyoñ bia suʼulan, bôte bʼéziñ ba ye kate mbunan. Ba ye lat a minsisime mi ne meduʼan a miñyeʼelan mia so e be mimbia minsisim.

² Ba ye dimi fé amu bebaduʼu belaa minsos, mbe bete mone môte ya minleme miap a mbili ndem étyé é maneya vé a nduan.

³ Ba ye tyili aluk; a kame bôt be di bidi biziñ, mbie bite Zambe a nga té na, bebuni , ba be ne njalan a ñyemane benya mejôô, be nyoñe bie a mvean akéva.

⁴ Amu jôm ése Zambe a nga té é ne mvaé. A teke jôm ja yiane wuabane fé, nge ba nyoñe je a mvean akéva.

⁵ E ne na, mejô me Zambe a meyeʼelan bia fubu je.

⁶ Litiʼi bobejañe mam mete mese: nalé wo ye bo mbamba mbo ésaé Krist Yésus, njalan a mejô ya mbunan, a mbamba miñyeʼelan mmie mite ô nga jiʼa tôñ.

⁷ Mfaʼa minkana mi ébiasé a ékobôkobô minnôme mi binga, ô bene bie. Ve wo, dañeʼe semé mboone mam me Zambe.

⁸ Yaa, ésaé minsôn é ne foʼo mfi mfaʼa mam mʼéziñ. Ve mboone mam me Zambe ô ne mfi mezene mese. Ye ô nji bi ngakaʼa ényiñ, ataté ényiñ yʼéyoñe ji a kui ényiñe ja zu?

⁹ Njôane wu ô ne wu ya kôme tabe wô mebun, a wo yiane nyoñeban ngum e be bôte bese.

¹⁰ Amu nge bia wu njuk a wosan, e ne amu bi veya ndi nleme jangan e be vevea Zambe, e nye a ne nyii bôte bese, a dañedañ nyô bebuni .

¹¹ Mame mete mme wo yiane bendé a yeʼele.

Eveʼela ya tôñ mfaʼa bebuni

¹² Môt a boʼo te biasé wo amu na ô ne ésoé. Ve boʼo éveʼela e be bebuni , mfaʼa ya nkobô, ntaban, nyeʼan, mbunan a mfubane wôé.

¹³ Nté wo yange nsoone wom, vaʼa womien e nlañane Mintilan, nlebane bôt a e nyeʼelan.

¹⁴ Te biasé mveane mvam ô ne be wo, ñwô ô nga vebane be wo a nkulane mejô, fufulu a mbetane mo nsamba bemvendé.

¹⁵ E mam wo yiane tuʼa baʼale a nlem ôse e mme le, nde meyaé môé ma ye yené e mise me bôte bese.

¹⁶ Baʼale womien a nyeʼelane wôé. Boʼo mban, nde wo ye nyii womien a ba ba wôʼô wo.