1 Tim 2 - Bible en langue Bulu

Meyeʼelan asu bôte bese

¹ Nde ma bendé ôsusua ya mame mese na, be bo minjaʼan, meyeʼelan, mbane ya sili, mvean akéva mfaʼa bôte bese.

² Te vuane bejô bôt a ba bevoʼo bese be bili bito bi ne ôyabe yôp. Nalé bia ye nyiñ évôvoé a mvoʼé e mbunane Zambe a éjijin été.

³ Jame te e ne abeñ a mvaé e mise me Zambe nyii wongan.

⁴ Nye a kômbô na bôte bese be nyiiban, a kui vôme ya yeme benya mejôô.

⁵ Amu Zambe a ne ve wua, mvañe fe ve wua e zañe Zambe a bôt, émien a ne môt, Krist Yésus,

⁶ nye a nga ve émien ane ngôtô asu bôte bese. E nkañete ô nga veban biyoñe bi mbe ntiñetan ñwô le,

⁷ ñwô ôte me nga teléban nkatefoé a nlôman . Ma kobô bebela, me nji laa minsos, nyeʼele beteyeme Zambe, e mbunan a benya mejôô été.

Befam a binga ésulan été

⁸ Ajô te ma yi na befam be yeʼelan vôm ase be beteʼe mimfuban mi mo yôp, teke ayaa nge meluman.

⁹ Ve mfaʼa binga, ma yi na be jaé bijijine mengômesan, a biôme bi nyanga bi ne éjijin tekeʼe dia. Saa mfenane ésil, nge metabe me or, nge bibat a nyanga é ne tañ anen.

¹⁰ Ve be vianeʼe jaé mbamba mimboon, aval ane da yiane binga ba semé mame ya mbunan.

¹¹ Minga a yiane ku évô, a nyoñe nyeʼelan a nsuan émiene si.

¹² Me nji kañese na minga a yeʼele nge jôô fam, ajô te a yiane tabe évô.

¹³ E ne été na, Adam nye a nga taté kômban, Eve ke a suʼulan.

¹⁴ A saa Adam nye a nga duʼuban, ve minga, éyoñ a duʼubaneya, a nga ku ntyaman atiñ été.

¹⁵ Ve akôsa bo nalé, a ye nyiiban amu abiaé dé, nge a bo mbane ya tabe mbunan été, nyeʼan, mfuban a éjijin été.