1 Tim 1 - Bible en langue Bulu

Mebatan

¹ Paul, nlômane Krist Yésus, amu mbendane Zambe nyii wongan a Krist Yésus, e ndi nleme jangan,

² ma tili Timôté, nya mone wom e mbunan été. Mvam, nkoon éngôngo a mvoʼé , bi boʼo be wo, bi soʼo e be Zambe Esaa, a e be Krist Yésus Nti wongan.

Mbia beyeʼele

³ Aval ane me nga bendé wo éyoñe me nga kôlô a ke Masédôan, tabeʼe Eféze a jiʼa bendé bôte bevoʼo na, be bo te yeʼele nyeʼelan ôfe,

⁴ nge kabetan a minkana, a bindan bi ne teke suk; mam mete ma dutu bisô a liʼi feʼe Zambe, nje ja litiban e mbunan été.

⁵ Nsôñane ya abendé di ô ne ajô nyeʼan wo so mfuban nlem, mbamba mone môt ya nlem , a mbunan ô ne foʼo nya mbunane.

⁶ Mfaʼa ya kandane mam mete, bôte bevok be nga dimi fé, mfaʼa nkobô ô ne teke jôm été.

⁷ Ba veʼe feʼe na be ne beyeʼele metiñ, ve e too na, bebien be nji yeme jôme ba jô, nge mame ba yemete a ngul ése.

⁸ Bia yeme foʼo na metiñ me ne mvaé, éyoñe ba belane me ane da yian.

⁹ E jam bia yiane tuʼa wôk e nde di: atiñ e nji bo amu zôsôa môt, ve mfaʼa ba be ne te suu bebiene si, bekange, bewosane ñyebe, bebo mam abé , bendamane étyi, bebiasé mam me Zambe, bewôé beésa bap, bewôé benyia bap, bewôé bôt,

¹⁰ bebo ébamba, e bôte ba fulane befam bevok, bekuane belo, belaa minsos, bekane mengana minsos a ba bese ba wosane mfufube nyeʼelan.

¹¹ E jam da luʼan a Mbamba Foé duma Zambe a nee ébotan, nye a nga vebane be ma nde le.

Ekañaʼa mvame Krist

¹² Ma ve nyô a nga ve ma ngul akéva abui, e ne na Krist Yésus Nti wongan; nye a nga yene ma ane nyô a yian, éyoñ a nga nyoñe ma ane mbo ésaé wé.

¹³ Ma, e nyô a mbe mbiasé ñyebe, nkpweʼele a njet. Ve mvam é nga vebane be ma, amu me nga bo nalé e ndiman été, me teke mbunan.

¹⁴ Yaa, e mvame Nti wongan é nga fuluku be ma, nalé fe nyeʼan a mbunan bi nee Krist Yésus été.

¹⁵ Njôane wu ô ne nya njôane ya kañese be bôte bese na: Krist Yésus a nga zu si nyô a nyii bebo mam abé , mbe bete ma me ne nyô ya ôsu.

¹⁶ Ve nge mvam é nga vebane be ma, é mbe amu na Krist Yésus a liti abui nyeʼane dé, me too nyô ya ôsu, ane éveʼela ya ba ba ye buni nye, a nyoñ ényiñe ya nnôm éto.

¹⁷ Duma a étôtok bi boʼo be njôô ya nnôm éto, e Zambe a ne te wu, te yené, susuʼa Zambe, nnôm éto a nnôm éto. Amen.

Mbamba mewosan

¹⁸ A mone wom Timôté, abendé ma ve wo nde le, aval ane minkulane mejô mi nga toteban melu kôa be wo, nde wo ye wosane mbamba mewosan, nkômetan a mie,

¹⁹ a mbunan, a mfuban mone môte ya nlem , nye ate bôte bevok be nga bene bo mewôk, a mbunane wop ô nga ke ényônyongo.

²⁰ Bevoʼo ya nsamba ôte be ne Ymené baa Alékzandre. Me nga kalane be mo me Satan, nalé ba ye yéʼé na be bo te beta biasé Zambe.