1 Tes 4 - Bible en langue Bulu

Enyiñe Zambe a yene mvaé

¹ Nde, a bobejañ, e mame bia sili a lebe mia e be Nti Yésus e mme ma: mi nga yéʼé e be bia ane mia yiane wulu na Zambe a yene mia mvaé, a nalé ate nye mia wulu. Kelan ôsu a bulu bo nalé.

² Yaa, mia yeme mam bi nga yeʼele mia a jôé Nti Yésus.

³ Nkômbane Zambe, ô ne ntelan étyi wônan, e ne na, mi bo te bo ébamba,

⁴ môt ase ya be mia a luʼu minga e mfuban été a ésemé été,

⁵ te dutuban a mbia nkômban, aval ane meyoñe bikuu me ne te yeme Zambe ma bo.

⁶ Môt éziñ a boʼo te bo jam da telé monyañ minjuʼu été, nge kolé nye ôbak mfaʼa ya ajô di, amu Nti a kun avale mame te ese, aval ane bi nga kate mia, a tuʼa bômôlô mia de e melo.

⁷ Bebela na, Zambe a nji loone bia na bi nyiñ e mvin été, ve a nga loone bia na bi nyiñ e mfuban été.

⁸ Ajô te nyô a bene melebe ma, a nji bene melebe me môt, ve Zambe, nyô a ve mia mfufube Nsisime wé.

⁹ Mfaʼa nyeʼane bobenyañ, e nji fe bo mfi na me tili mia de, amu mi nga yéʼé miabebien e be Zambe na, mi nyeʼesan mia mia,

¹⁰ a mia bo fe nalé e be bobenyoñ bese, e Masédôan ase été; bia lebe mia, a bobejañ na, mi beta bulu bulu kee nalé ôsu.

¹¹ Jeñan a nlem ôse na, mi nyiñ évôvoé été, mi bo e mame ma fombô mia, a bo ésaé a mo menan, ane bi nga bendé mia,

¹² nalé ntabane wônan wo ye bo e wu wo sili ésemé e mise me bôte ya atan a na, mi bo te yi mvolane môt éziñ.

Nsoone Nti a ñwômane miñwuan

¹³ A bobejañ, bi nji kômbô liʼi mia e ndiman été ajô miñwuan, mi za tabe ôlun été, aval ane ba bevok be nji bi ndi minlem.

¹⁴ Yaa, nge bia buni na Yésus a nga wu, a wômô fe e miñwuan, avale te fe e ba be wuya, Zambe, amu Yésus ate, a ye kôane be e be Yésus.

¹⁵ E jame bia kate mia e nde di, éfia Nti émien: bia, e bevevee ba ye nyiñ akekui nsoone Nti, bia ye bo te ke e ba be wuya ôsu.

¹⁶ Amu Nti émien, éyoñ éyoñ é kuiya, tyiñe beta éngele é kobôya, a toñe Zambe é loñebaneya, a ye so yôp; éyoñe te miñwuan mi ne be Krist mia ye taté wômô;

¹⁷ mvus éte bia, bevevee, bia ye liʼi, fufulu a be, bia ye nyoñeban e minkut été, a ke tôbane Nti e miñyem été, nalé ate bia be Nti bia ye tabe nnôm éto.

¹⁸ Boʼone ngule minlem, bana a ba bevok a nyeʼelane wu.