1 Tes 2 - Bible en langue Bulu

Paul e Tésalônik

¹ Miabebien mia yeme de, a bobejañ na mi nji nyoñe bia e zesé.

² Ve na, éyoñ bi ndôme mane jibi meta a mintaé e Filip, aval ane mia yem, bi nga bi ndi minlem ja yian e be Zambe wongan, asu ya kate mia e Mbamba Foé wé e mewosan été.

³ Nalé a ne na, nkatane mejô me Zambe wongan ô nji bi mbôkaʼa ô ne ékobe yôp, ô nji so zene ya mam me ne mvin, a ô nji belane mvolane meduʼan.

⁴ Ve Zambe a nga mane veʼele bia asu ya ve bia Mbamba Foé. Ajô te bia kobô mejô me Zambe; bi nji jeñe na bi yené mvaé e be bôt, ve e be Zambe, e nyô a veʼele minleme miangan.

⁵ Amu ajô te bi nji belane mejô meduʼan, mia bebien mia yeme nalé na, teke mbia ôsimesane ya mfi wongan a solô mvus, Zambe a ne ngaa,

⁶ a bi nji veʼele jeñe duma e be bôt, nge e be mia, nge e be bôte befe,

⁷ ve bi mbe fe ngule ya belane ngule jangan ane minlômane mi Krist. Ve bi nga too e zañe jenane njalan a évôvoé, aval ane nyia a futi e bon a ve bidi ayôñe ya abume dé si.

⁸ Nalé bi nga bili beta nyeʼan mfaʼa wônan, abime ya na, bi mbe nkômane ya ve mia, saa ve Mbamba Foé Zambe étam, ve jaʼane binyiñe biangan, abim édima mi nga yené mfaʼa wongan.

⁹ Mia simesan, a bobejañ, minjuʼu miangan a ñwôʼan ateʼe nyôle wongan, a mboon ésaé, môse baa alu na bi bo te kaʼa môt éziñ ya e be mia mbeʼe, nye bi nga kate mia Mbamba Foé Zambe.

¹⁰ Mi ne bengaa, a Zambe fe, na, bi nga nyiñe be mia, bebuni , ényiñ é ne mfuban , zôsôô a tee bijô.

¹¹ A mia yem ane bi nga baʼale môt ase ya be mia, ane ésaa a baʼale bone bé,

¹² bi nga lebe mia, ve mia ngule nyô, bendé mia na mi wulu ane da yiane be Zambe, nye a loone mia éjôé jé a e duma dé.

Mi nga vu bekeké ya Yudé

¹³ Amu ajô te mfaʼa wongan, bi ne te jôʼé ve Zambe akéva éyoñ ése: éyoñ mi nga nyoñ ajô Zambe bi nga bo bi kate mia, mi nga nyoñe de, saa aval ane ajô môt, ve aval ane jôm ébien é né, e ne na, ajô Zambe. E nde fe da bo ésaé e be mia bebuni .

¹⁴ Amu na, a bobejañ, mi nga vu bekeké be Zambe be ne e Yudé, e be Krist Yésus, amu mia fe mi nga tôbane njuk ô soʼo be bobenyoñ avale be nga tôbane mie e be Beyude,

¹⁵ e mbe bete be nga wôé Nti Yésus a bekulu mejô, be nga kpweʼele fe bia, be nji yené mvaé e be Zambe, a be ne besiñ be bôte bese.

¹⁶ Ba kame bia bi bo te kate bikule Mbamba Foé asu ya nyii be, nalé ate, biyoñ bise, ba dañe nene abé dap. Ve asuʼulan, ayaa e nga kui e be be.

Paul a kômbô bulane Tésalônik

¹⁷ Mfaʼa wongan a bobejañ, nkandane bia be mia nté éziñ, ôyap e ñyenane ya mis, ve saa minlem, bi nga ve ngul abui na bi zu jome mia amu bi nga bili de beta nkômban.

¹⁸ Ajô te bi nga kômbô zu e be mia, mamien, Paul, biyoñe biyoñ, ve Satan a nga kolé bia de ôbak.

¹⁹ E ne foʼo ve na, mia étam mi ne ndi minleme jangan, avaʼa dangan, a mebune mangan mme ma ye bo ékate jangan e mise be Nti Yésus éyoñ a ye so.

²⁰ Mia foʼo mi ne duma dangan a avaʼa dangan.