1 Tes 1 - Bible en langue Bulu

Ntili kalate a mebatan

¹ Ma, Paul, bia Silvain bi too a Timôté, ma tili keké ya Tésalônik é nee be Zambe Esaa wongan a e be Nti Yésus Krist. Mvam a mvoʼé bi boʼo be mia.

² Bia ve Zambe akéva biyoñe bise ajô denan mia bese éyoñe bia simesane mia e meyeʼelan mangan été;

³ éyoñ ése bia simesane mbunane wônan wo bo ésaé, nyeʼane wônan wo tôbane njuk a mbane ndi minleme jenan, mbie bite bia sobia e be Yésus Krist, asu be Zambe ésaa wongan,

⁴ bi tukaʼa yem, a bobejañe Zambe a nyeʼe, na a nga tobe mia.

⁵ E ne été na, nkañetane Mbamba Foé wongan e be mia ô nji bo ve zesé nkobô, ve ngu, ésaé Mfufube Nsisim, mbamba ntôane mam. A e ne été, ane mia yeme na, e nga kui be bia nalé amu mvaé jenan.

⁶ A mi nga vu bia, bia a Nti, a nyoñe mejô me Zambe ôlun été, nalé fe avaʼa Mfufube Nsisim.

⁷ Amu nalé, mi ntoo éveʼela e be bebuni bese ya Masédôan a Akayi.

⁸ Ajô Zambe e maneya wôʼôtane saa ve Masédôan a Akayi étam, e téʼé be mia, ve nalé fe foé ya mbunan wônan e be Zambe é maneya tuʼa mialane vôm ase, aval e nji beta sili na bi kobô de.

⁹ Amu môt ase a kañete, a kobôʼô ajô dangan, ane mi nga nyoñe bia, a ane mi kôñelaneya mfaʼa Zambe a nlumane bengunemelane mvus asu ya bo vevee a nya Zambe bisaé.

¹⁰ asu ya yange Mone wé a soʼo yôp, nyô a nga wômôlô miñwuan, Yésus, e nyô a wôlé bia e be ayaa da zu.