1 Pi 5 - Bible en langue Bulu

Esaé mvendé keké

¹ Nde ma lebe bemvendé be ne zañe jenan, ma, mvendé , a ngabe ya mintaé mi Krist, ma, e nyô a ne nyoñe ngap ya étôtoʼo ja ye yené.

² Vaʼane mbame mintômba ô nga vebane be mia bidi, a baʼale wô, saa a ntindan, ve a nyeʼan, aval ane Zambe a kômbô.

³ Saa amu mia sôñe maʼan, vʼamu nya nkômbane ya bo ésaé. Te jôô be njôane ya liti ve ônyu, ve boʼon éveʼela ya mbam.

⁴ Wôna, éyoñ njôô bebaʼale mintômba a ye yené, mia ye nyoñ ékate duma é ne te ja ntuk.

Ejoté nyô a ñyemane ngul e mbunan été

⁵ Avale te mia bisoé bi bôt, suʼane miabebiene si e be bemvendé be bôt. A mia bese fufulu, boʼon éjoté nyô e zañe jenan. Amu Zambe a tele bôt be ne mebun e ngame yat. Ve a mvamane ba be ne njeʼebane minlem.

⁶ Ajô te suʼane miabebien éwôlô wo Zambe si, ndemben a ye bete mia yôp éyoñ é ne ntiñetan.

⁷ Keʼane nye mam mese ma tyelé mia minleme yôp amu a baʼale mia,

⁸ boʼone te dañe di nge nyu, mombaʼan! Nsiñe wônan, Satan, a ke a mon aval ane ñyôyoʼo ngbwengbwem, a jeñe za a ne landé.

⁹ Yemane ngu e mbunan été, a bene nloone wé, mi yeme na, avale mintaé da, e ne nnane be bobenyoñ be ne mmialane si nyô.

¹⁰ Zambe ya mvam a mvolan, nyô a nga loone mia étôtoʼo jé é too nnôm éto e be Krist, a ye beta telé mia mebo si éyoñ mi maneya wôʼô mintaé nté éziñ.

¹¹ A ye yemete mia, a ve mia nkaʼa mvus, a bo mia na, mi bo te fôʼôsan.

Nwômesane kalate a mebatan

¹² Me nga tili mia e bone mejô ma a Silveñ, nye ma yen ane monyañe ya tabe nye ndi. Me sôñe na, me lebe mia a bo mia mi yeme na, mi tii amu mvame Zambe étam.

¹³ Nsamba bôt ô ne ntoban e Babilôn wo batane mia, a Mark fe, mone wom.

¹⁴ Mi bataʼan wua a nyô mbok, a nlatane menyu me bobenyañ. Mvoʼé é boʼo be mia bese mi ne be Krist.