1 Pi 4 - Bible en langue Bulu

Mfefé ényiñ

¹ Nde amu Krist a nga jibi mintaé e minsôn été, mia fe tabaʼane nkômane ya nyiñ ôsimesane te été. Nyô a jibi mintaé e minsôn, a kandaneya abé

² na, a nyiñ éyoñ a liʼiya minsôn été, saa fe aval ane mbia minkômban ya bôt mi né, ve aval ane nkômbane Zambe ô né.

³ E ne été na, mi nga nyiñ ayap e nkômbane meyoñ me ne te yeme Zambe été. E ne na: Bijabô, mbia minkômban, nsoʼone bilam, njeman mbia mebôk , mbia bisulane bi ndian a nyuan, nkañane bengunemelan.

⁴ Ajô te ba kam amu jé mi nga tyetebe be, te fe fulan a be e mbia mboon été,

⁵ a ba ta mia. Ba ye yalan asu nyô a ne nkômane ya tyiʼi bevevee a miñwuane mejô.

⁶ Amu ajô te, jaʼane e be miñwuan, mbamba Foé a nga kateban e be be, nde jaʼane bôt ba tyiʼi ajô dap e minsôn été aval ane bôt, ve ba nyiñ ane Zambe a zene ya Nsisim.

⁷ Asuʼulane ya mam mese e nto bebé, litaʼane na mi ne fek a boʼone te dañe di nge nyu, nde mia ye bi ngule ya yeʼelan.

⁸ E jam ôsu, biane nyeʼan ô too e zañe jenan, amu nyeʼan wo buti jama mbia be mam.

⁹ Mi boʼo anyep, wua a nyô mbok, tee nkobô menyiñ.

¹⁰ Belaʼan môt ase e mveane Zambe a nga ve nye, asu mvaé bôte bevok, éyoñe te mia ye bo mbamba bebelane ya ézuʼu mimveane Zambe a ve.

¹¹ Nge môt éziñ a kobô, é boʼok asu ya kalane mejô me Zambe. Nge mfe a saane bôt, a boʼo de a ngule Zambe a ve, nalé ate Yésus Krist nyô a ne Zambe, a ye foʼo wum.

Njibane mintaé

¹² A bôt ma nyeʼe, te seman nge mia teme na mi ntele nkabaʼa meveʼele été, a bo te yene de aval ane nge é ne étua jam.

¹³ Vʼéyoñe mia nyoñe ngap e mintaé mi Krist, vaʼan, ndemben éyoñ étôtoʼo jé ja ye kulan, mia fe mia ye vak a fôn.

¹⁴ Nge ba kpweʼele mia amu jôé Krist, mvom a mia, amu Nsisime duma, Nsisime Zambe, ô too be mia.

¹⁵ Môt éziñe ya be mia a boʼo te wôʼô mintaé amu na a ne ñwôé bôt, ñwuwup nge zemimfaka, nge na a ne nyô a kobô éza mam,

¹⁶ ve nge môt a wôʼô mintaé ane mbuni a boʼo te wôʼôson. A vianeʼe ve Zambe duma amu a beʼe jôé mbuni.

¹⁷ Eyoñ é kuiya foʼo e ji ntyiʼane mejô wo taté e nda Zambe; ve nge wo taté be bia, wôna asuʼulane ya ba ba bene buni Mbamba Foé Zambe da ye bo aya?

¹⁸ A nge zôsôa môt a nyiiban e njuʼu été, wôna za jame da ye kui e be mbia môt a mbo mam abé ?

¹⁹ Ajô te e ba ba tôbane njuk ane nkômbane Zambe ô né be keʼe minsisime miap e be Nté biôm a ne teke atyendé; be boʼo mvaé.

²⁰ Ajô te, e ba ba wôʼô mintaé amu ba bo nkômbane Zambe mewôk be vaʼa Mbamba nté yôp a si minsisime miap. Be kele ôsu a bo mvaé.