1 Pi 3 - Bible en langue Bulu

Aluʼu bebuni

¹ Avale te fe mia, a beyal, suʼane miabebien e si e be benyo beyôme benan. Nalé ate, jaʼane bevoʼo ya été ba bene buni foé Zambe, ba ye buni, saa a nkatane foé, ve amu mbamba ntabane beyale bap,

² éyoñ ba yene mfuban éjijine ntabane wônan.

³ Nyanga jenan, é boʼo te bo nyô ya atan. Mfenan ési, metabe, bimvônga, bikat bi or, mengômesan me ne tañ anen.

⁴ Ve nyanga jenan é boʼo nyô ya nlem nje é solô. Ngômesan é ne te ja ntuk, e nyô ya Nsisim ô ne évôvoé a mvoʼé , e nje é ne tañ anen e mise me Zambe.

⁵ Avale te mimfufup mi binga mi nga too Zambe ndi e melu mvus, mi nga jaé, a nsuane bebiene si e be beyôm.

⁶ Aval ane Sara, nye a nga ve Abraham mewôk a loone nye na, Masa. Mi ne bone bé éyoñe mia bo mvaé a te koone woñ éziñ e minlem été.

⁷ Avale te fe beyôm, nyiñane benyo beyal, mi yeme na be ne bitétéa bi ne atek. Semaʼane be, amu be ne benyoñe ngab ényiñe ya mvam mia be be. Nde jam éziñ da ye bo te ndeñele mia meyeʼelane menan.

Enyiñe fufulu

⁸ Ma suʼulane jô mia na fulaʼane minlem a wulu a feʼe jia. Mi nyeʼesan ane bobenyañ, a bi minleme ya éngôngo a anyep.

⁹ Te butane abé a abé , nge meta a meta. Ve mi vianeʼe botan, amu jame te nde mi nga lobane de, nde mia ye nyoñ ébotan.

¹⁰ E ne bebela na, nyô a kômbô nyeʼe ényiñ, a yene melu ya afok, a yiane baʼale ôyeme vié a bo te laa minsos anyu dé,

¹¹ a lume abé mvus, a bo mvaé, a jeñe mvoʼé ényiñe jé été,

¹² amu mise me Nti me lôô bôt be ne zôsôô , a melo mé ma vôʼôlô meyeʼelane map. Ve asu Nti e ne bebo abé e ngame yat.

Ndi nlem ékpweʼele été

¹³ Za a ye bo mia abé nge mia liti na mia nyeʼe mboone mvaé?

¹⁴ A na, jaʼan éyoñ mi ne tôban ékpweʼele amu mboone zôsôô , mi nee ébotan. Te veʼele koone be woñ nge kumetane minlem.

¹⁵ Ve telaʼane Krist étyi e minleme mienan été, nye a ne Nti. Mi tabeʼe nkôman biyoñe bise, ane mi ne kame ndi minlem jenan ôsu ya ba bese be ne sili mia ajô ya été.

¹⁶ Ve boʼone jame te a minlem évôvoé a ésemé. Baʼalane mone môte ya minleme mienane mfuban , nde éyoñ ba ye ta mia, e ba ba kobô e mbamba foé ya ntabane wônan abé , ane mia tôñe Krist, be wôʼôson, amu mam ba kobô.

¹⁷ Amu a dañe mvaé ya wôʼô mintaé éyoñ mia bo mvaé a lôt éyoñ mia bo abé .

Ndañan Yésus Krist

¹⁸ Yaa, Krist émien a nga jibi mintaé ajô mam abé éyoñe jia ya biyoñe bise, nyô a mbe zôsôô ajô ba be ne ékotekot, nde a ye liti mia e be Zambe. A nga wu e minsône mié été, ve a nga bulan ényiñ a zene ya Nsisim.

¹⁹ Eyoñe te nje a nga ke kobô mejô me Zambe, jaʼane be minsisim mi ne e mimbôk,

²⁰ e be bikangekange ya melu kôa, éyoñe Zambe a nga jaé liti njibane wé e melu Noé a nga lôñe ark , ñwô te tyôtyoé bôt, muam, be nga nyiiban a mendim.

²¹ Jame te e mbe ndeme nduan wo nyii mia éyoñe ji. O nji bo ntunane mvine ya nyôl, vʼô ne mintiñetane mi mbamba mone môte ya nlem e mfaʼa Zambe. Wo nyii mia amu ñwôman Yésus Krist,

²² nye ate, éyoñ a keya yôp, a too mbo nnôm Zambe, a nye ate beéngele, bejôô a mingungul be ne éjôé jé si.