1 Pi 2 - Bible en langue Bulu

¹ Ajô te, vaʼan avale nkpwala ese, minsose mise a nsisime bebaduʼu aval ese, minyamete a bibôta.

² Aval ane minkeñelé mi bon mi ndôme bialé, mia yiane foʼo ve menyañe ya nsisim me ne mfuban nde mia ye yaé a zu kui nyian.

³ Nge mi tyeʼeya na, Nti a ne mvaé,

⁴ subaʼane nye bebé, veveakok, e di bôte be nga ben, ve de e nto ntoban, a édima e mise me Zambe.

⁵ Miabebien, aval ane bevevee mekok , nyiʼan e nlôñane nda Nsisim a too, a bo mfufube nsamba betuni, asu ya ve bityiʼa ya nsisim , bi Zambe a yene mvaé, amu Yésus Krist. Metunaʼa ya Nsisim a zene ya e be Yésus Krist.

⁶ Amu da yené ntilan e mimfufube mintilan été na: tame yen, ma bôôn akoʼo ya jua e Siôn été, ntoban a édima, a nyô ase a telé ndi nleme jé e be nye, a ye bo te jôban.

⁷ Mfaʼa mia bôt mia buni, duma be mia; ve mfaʼa ba be ne te buni, akoʼo belôñ be nga ben, e bobaneya akoʼo ya jua,

⁸ a di ya kolé ôbak, akôme da kpwéé bôte si, ba kolé de amu ba bene buni mejô me Zambe. A jam e mbe e yangeʼe be nde le.

⁹ Ve mia mi ne mvoñ é ne ntoban, nsamba betuni be njô bôt, ayoñ e ne étyi, e bôte Zambe a nga kuse na mi yôtane beta mimboone mi nyô a nga loone mia akôlô dibi été, a zuu mia étôtoʼo éfufube jé.

¹⁰ Mia, aso melu mvus, mi nji bo e bôte bé, ve éyoñe ji mi ntoo émbé. E mia mi nji koban éngôngo, ve éyoñe ji, mi koobaneya éngôngo.

Enyiñe bebuni e zañe betebuni, bebuni a bejôô ya si nyô

¹¹ A bôt ma nyeʼe, ma lebe mia aval ane bewulu dulu a beyeñe na, mi saʼale minkômbane ya minsôñ mise, mmie mite mia wosane Nsisim.

¹² Tabaʼane mvoʼé ézezañe betebuni, nde e vôme ba koñe mia ane mbia be bôt, be yen éfufup amu mbamba mimboone mienan a wumu Zambe môse ya nsoone wé.

¹³ Suʼane miabebien e si e be bejôô ya minsôn amu Nti.

¹⁴ Njô bôt amu éto jé, nge ngovina mbe a lôme éjiane jé na be lebe bebo mam abé , a seʼe ba ba bo mvaé.

¹⁵ Amu nkômbane Zambe ô ne na, éyoñe mia bo mvaé, mia ye kpwéé ndimane mekute me bôt évô.

¹⁶ Nyiñan ane ba be ne beti. Te bian éto beti jenan ane ébutaʼa ya abé denan, ve tabe ane bebo bisaé be Zambe.

¹⁷ Wumulaʼane bôte bese, nyekaʼane bobenyoñ, koone Zambe woñ, wumulaʼane njô bôt.

Bebo bisaé a bemasa

¹⁸ A bebo bisaé, suʼan miabebien si beta nsuan e be bejôô benan a woñ. Saa ve ba be ne mvoʼé a évôvoé étam, ve jaʼane ba be ne abé .

¹⁹ Amu njibane ya jibi minjuk mia so ékotekot, amu nseman mia semé Zambe ô ne ébotan.

²⁰ Za duma mia nyoñ éyoñ mia wu ékpweʼele amu mboone mia bo abé ? Ve nge mia bo mbane ya jibi ékpweʼele éyoñ mia bo mvaé, jame te e ne ébotan e mise me Zambe.

²¹ Amu jame te nde mi nga loban. Amu Krist fe a nga jibi mintaé amu mia, a liʼi mia éveʼela, nalé mia ye tôñe bibôʼa mebo bié.

²² A nji bo abé éziñ nge kobô minsos anyu dé.

²³ Be nga ta nye, ve nye a nji ta môt éziñ; a nga jibi mintaé ve teke ndeñele môt. A nga kee zôsôô ntyiʼi mejô njuʼu wé,

²⁴ a nga beʼe mam abé mangan e nyôle je été élé yôp, ndembene bi bo miñwuan mfaʼa mam abé ve bi nyiñ asu mam me ne zôsôô . Amu bi nga saéban a meveñe mé.

²⁵ Amu mi nga dimi fé ane bone mintômba, ve éyoñe ji mi bulaneya e be mbaʼale mintômba a nnonô ya minsisime mienan.