1 Minkte 29 - Bible en langue Bulu

Mimveane bôt bebien ba ve asu melôñe nda Zambe

¹ Ane njô bôte David a nga jô ékôane bôt ése na: Mone wome Solômon, nye étame Zambe a nga top, a ne mongô a nteʼan, ésaé ke anen, amu nda nyô é nji bo asu môt, ve asu Zambe Nyô a too.

² Me maneya belan e ngule jam ése na me tôkane biôm asu nda Zambe wom or asu biôme bi or, argent asu biôme bi argent, mvot asu biôme bi mvot, étyé asu biôme bia yian étyé a bilé asu biôme bia yiane boban a bilé, mekoʼo mʼônix a mekok ba yiane totan e mevôm mevôm asu ya ve abeñ: mekoʼo ma faé me too menyôle menyô, mevale mekoʼo mese me nʼédima a marbre a nʼéfumulu abui.

³ Nalé fe na amu ma dañe nyeʼe e nda Zambe wom, ma ve e nda Zambe wom or a argent bi ne ébiam, ma beté bie e yôbe ya biôm bise me maneya tôkan asu vôm a ne étyi:

⁴ betalañ be or toyini éla, or ya Ofir a betalañ be argent toyini zamgbwa a too mfuban asu ya yañe mimfine menda.

⁵ Mfaʼa or asu jôm ja yiane or, a mfaʼa argent asu jôm ja yiane argent, a mfaʼa bisaé bise bebo bisaé ba yiane bo, za a bete wo yôp e môse ya den, te ntindan, a tiñeti Nti na a zu ve bie?

⁶ Ane bivete menda me bôt, bivete meyoñ ya Israél, bivete betoyini a mintet, toʼo bivet bia tindi bisaé bi njô bôt be nga ve teke ntindan.

⁷ Asu bisaé ya nda Zambe be nga ve betalañ be or toyini étan, minsañ mi or toyini awôm, betalañ be argent toyini awôm, betalañ be mvot toyini awôm a muam, betalañ bʼétyé toyini ntet.

⁸ E mo me Yéhiél mone Gersonite, be nga kalane fe mekoʼo mese me nga too asu akume ya nda Zambe.

⁹ Bôt be nga vak amu mimvean be nga ve teke ntindan, amu be nga ve bebiene be Nti a minleme mise; njô bôte David fe a nga vaʼa jame te.

Meyeʼelane David

¹⁰ David a nga botane Nti ékôane bôt ése é too. David a nga jô na: A Nti, e Zambe ésaa wongan Israél, ébotan a wo ataté nnôm éto a kui nnôm éto.

¹¹ A Nti, Anen, ngu, étôtok, éjijin a mfaan bi ne émbiôé, amu jôm ése é ne yôp a si é ne énjôé, a Nti, njôan ô ne fe éñwôé e wo ô ne mbetan a ô koo biôm bise yôp!

¹² Akum a duma bia so be wo, wo wo jôô biôm bise, ngu a éwôlô bi ne e wo wôé été, e wo wôé fe ñwô ô bili nguleya nene a yemete biôm bise.

¹³ Eyoñe ji, a Zambe wongan, bia kañe wo a seʼe étôtoʼo ya jôé dôé.

¹⁴ Amu me ne jé, e bôte bam ke jé ane bi ne nguleya bo avale mimveane di teke môt a tindi bia? Biôm bise bia so be wo, a e biôme bia ve wo nne bia so wo wôé été!

¹⁵ Bi ne beyeñ e mise môé a mintabe avale bʼésaa bangan bese be mbe; melu mangan bi too si nyô me ne ane nsisiñ, a jam ya tabe de ndi e nji bo.

¹⁶ A Nti, e Zambe wongan, abui akum ese bi maneya tôkane dina na bia lôñe wo a jôé dôé e nʼétyi nda , ése da so e wo wôé été. Biôm bise bi ne émbiôé!

¹⁷ A Zambe wom, ma yeme na wo fase nlem ô nyekeʼe fe zôsôô; ajô te nde ma te bo mimveane mina teke ntindan ve e zôsôô ya nleme wom, a éyoñe ji me yeneya a mevaʼa mese ane bôte bôé be ne va ba ve wo mimveane miap teke ntindan.

¹⁸ A Nti, e Zambe Abraham, Izak a Yakob bʼésaa bangan, kañeseʼe na e bôte bôé be baʼale avale minsimesane dina ya minleme miap melu mese, a kañeseʼe na asimesane dap é bo ñyemetan ve be wo.

¹⁹ Vaʼa mone wome Solômon nlem ô ne nkômesan ôse na wo baʼale mebendé môé, miñyeʼelane miôé a metiñe môé, na wo bo me mese a na wo lôñe nda nje me maneya tôkane biôme bina bise.

Solômon a telébane njô bôt

²⁰ Ane David a nga jô ékôane bôt ése na: Vaʼane Nti e Zambe wônan akéva! Ane bôte bese ya ésulan be nga ve Nti, Zambe bʼésaa bap akéva. Be nga vitibi a kute meboñe si ôsu Nti a ôsu be njô bôt.

²¹ Mametyé, éyoñ môs ôte ô lôteya, be nga ve Nti metunaʼa a mimvean mia diʼibane ngumba: beyôm benyak toyini, beyôm mintômba toyini, bone mintômba toyini a mvean binyunyui yʼété, a bityiʼa bife abui asu Israél ase.

²² Be nga di a nyu môs ôte, e mise me Nti, abui mevak été, be nga telé Solômon e mone David njô bôt éyoñe baa, be nga woʼo nye mbon e mise me Nti ane njôô, a Sadok ane ntuni .

²³ Ane Solômon a nga tabe éto njôane Nti ane njô bôt éjian ésaa wé, a Israél ase a nga bo nye mewôk.

²⁴ Bivete bise, bôte mewosan a bone be njô bôte David bese be nga bo njô bôte Solômon mewôk.

²⁵ Nti a nga bete Solômon ôyabe yôb abui e mise mʼIsraél ase, a nga bo njôane wé jame ya kam, njôane njô bôte mfe ya Israél ô nji bo nye ôsu ô too avale te.

Awu David

²⁶ David e mon Izayi a nga jôô Israél ase

²⁷ A nga jôô Israél mimbu mewôm menyin: a nga jôô Ebroñ mimbu zamgbwa, a a nga jôô e Yérusalém mimbu mewôm melaa a milaa.

²⁸ A nga wu a too nya mbamba mvendé , njalan a melu, a akum a duma. E mone wé Solômon a nga jôô éjiane jé.

²⁹ Mimboon mi njô bôte David, mi ya ôsu a mi mia suʼulan, e kalate mimboon mi Samuel, ñyene mam, e kalate mimboone mi Natan nkul mejô a e kalate mimboon mi Gad ñyene mam,

³⁰ éjôé jé ése a éwôlô jé ése, e mam me nga boban melu mé, toʼo na Israél été nge e bijôé bise ya mesi mevok.