1 Minkte 27 - Bible en langue Bulu

Bivete bi nsamba mewosan

¹ E bone bʼIsraél ba mbe be nga saé be njô bôt ane tañe jap é né: bivete menda me bôt, bivete betoyini a mintet, bivete bezimbi bi nga too njô bôte fefe asu mam mese ma fombô minsamba bezimbi, nsoone wop a nkeane wop, ngon ése, nalé a bobaʼan e bengon bese ya mbu, nsamba bezimbi ôse ô bili bôte toyini mewôm mebaé a ényin.

² Nsamba ôsu ya ngon ôsu: Yakôbeam e mone Zabdiél; nsamba wé ô nga bili bôte toyini mewôm mebaé a ényin.

³ A mbe wua ya bone be Pérét. A mbe nlô bivete bise ya minsamba mewosane e ngon ôsu.

⁴ Nsamba e ngone baa: Dôdayi, mon Ahôhite; Miklôt nye a mbe njôô ya nsamba te; nsamba wé ô nga bili bôte toyini mewôm mebaé a ényin.

⁵ Njôô nsamba mewosane lale asu ngone lale a mbe Benayahu, e mone ntuni Yehôyada, évet; nsamba wé ô nga bili bôte toyini mewôm mebaé a ényin.

⁶ Benayahu a mbe mbene ya bôte mewôm melal été a too nlô ya bôte mewôm melal bete; mone wé Amizadab a mbe e nsamba wé été.

⁷ Nsamba nyini asu ngone nyini: Asaél, monyañe Yôab, mone wé Zebadia a zaʼa nye mvus; nsamba wé ô nga bili bôte toyini mewôm mebaé a ényin.

⁸ Nsamba tane asu ngone tane: Kamhut ya Yizra nye a mbe njôô; nsamba wé ô nga bili bôte toyini mewôm mebaé a ényin.

⁹ Nsamba samane asu ngone samane: Ira, e mone Ikés, môte ya Tékôa nye a mbe njôô; nsamba wé ô nga bili bôte toyini mewôm mebaé a ényin.

¹⁰ Nsamba zamgbwale asu ngone zamgbwale: Hélét mone Pelônite ya bone bʼEfrayim nye a mbe njôô; nsamba wé ô nga bili bôte toyini mewôm mebaé a ényin.

¹¹ Nsamba muame asu ngone muame: Sibkayi, mone Hukatite ya nda bôte Zéra nye a mbe njôô; nsamba wé ô nga bili bôte toyini mewôm mebaé a ényin.

¹² Nsamba ébulu asu ngon ébulu: Abiézer ya mvôʼô Bényamin e Anatot nye a mbe njôô; nsamba wé ô nga bili bôte toyini mewôm mebaé a ényin.

¹³ Nsamba awômô asu ngon awômô: Maharayi ya Nétôfa, e nda bôte Zéra nye a mbe évet; nsamba wé ô nga bili bôte toyini mewôm mebaé a ényin.

¹⁴ Nsamba awôm a wua asu ngon awômô a jia: Benaya ya Piraton, e bone bʼEfrayim nye a mbe njôô; bôt be mbe nsamba wé toyini mewôm mebaé a ényin.

¹⁵ Nsamba awôm a baa asu ngon awôm a baa: Heldayi ya Netôfa e nda bôte Otniél nye a mbe njôô; nsamba wé ô nga bili bôte toyini mewôm mebaé a ényin.

¹⁶ Bivete meyoñ ya Israél mbie bi: mfaʼa mvôʼô Ruben évet é mbe Eliézer e mone Zikri; mvôʼô Siméoñ évet é mbe: Sefatiahu e mone Maaka;

¹⁷ Mvôʼô Lévi évet é mbe Hakabia e mone Kemuél; mvôʼô Aron évet é mbe Sadok;

¹⁸ Mvôʼô Yuda évet é mbe Elihu ya bone be David; mvôʼô Isakar évet é mbe Omri e mone Mikaél;

¹⁹ Mvôʼô Zabuloñ évet é mbe Yismaéyahu e mone Abdias; mvôʼô Néftali évet é mbe Yérimôt e mone Azriél;

²⁰ Asu bone bʼEfrayim évet é mbe Hôsé e mone Azaziahu,

²¹ asu éfas ayoñe Manasé ya Galad évet é mbe Yidô e mone Zakari; mvôʼô Bényamin évet é mbe Yaasiél e mone Abnér;

²² mvôʼô Dan: évet é mbe Azareél e mone Yérôham. Bivete meyoñe ya Israél mbie le.

²³ David a nji ke nyoñ tañe bôt be mbe ataté mimbu mewôm mebaé a sise si, amu Nti a nga jô na a ye bo Israél abui ane ateté ya yôp.

²⁴ Yôab e mone Séruya, a nga beta taté nlañane bôt, ve a nji ke sondô wô, amu jame te e nga dutu Nti na a yaa Israél. Biyalan yʼété bi nji ke tiliban e metañe ya minkañete mi njô bôte David.

Bebo bisaé be David befe

²⁵ Azmavét, e mone Adiél, a mbe mbaʼale akume njô bôt. Yônatan e mon Ozias a mbe mbaʼale biôm bi mbe e nnaan e si ya Israél ataté bitison a kui minlam a mewôm bebaʼale be né.

²⁶ Ezri, e mone Kelub, a mbe ntebʼôsu ya bebé mefup bese ya Israél.

²⁷ Simeyi ya Rama a mbe mbaʼale mefup mindiʼi mi woon Zabdi ya Kefam a mbe mbaʼale woon a mbe a soʼo mefube mete.

²⁸ Baal-Hanan ya Bét-Gédér a mbe mbaʼale mefube me ôlivié a ma me Sikomor afôla si é ne njeʼese. Yôas a mbe mbaʼale mimbon.

²⁹ Sitrayi ya Saroñ a mbe mbaʼale mimbame benyak, a vaʼa be bidi e miñyanebe ya Saron. Kafat e mone Adlayi a mbe mbaʼale mimbam benyak mi mbe mi jaʼak e minjeʼese.

³⁰ Obil mone Ismaélite a mbe mbaʼale bekamel. Yedia ya Mérônôt a mbe mbaʼale beyale bijakas.

³¹ Yaziz, mone Hagrite a mbe mbaʼale mintômba a bikela. E bôt be mbe na ba baʼale akume njô bôte David mbe le.

E bôt be mbe David bebé

³² Yônatan, ndômenyañe David, ntyetyeñ a ñyeman, a mbe ntebele njô bôt. Yehiel, e mone Hakmonite a nga bo ésaé ya yeʼele bone be njô bôt.

³³ Ahitôfél a mbe fe ntebele njô bôt. Hukayi mon Arkite, a mbe mbaʼale minsolan mi mame njô bôt.

³⁴ E bôt be mbe Ahitôfél mvus be mbe Yôyada e mone Benaya a Abiatar. Yôab ki nye a mbe nlô évete ya nsamba mewosan.