1 Minkte 26 - Bible en langue Bulu

Bebaʼale mimbé ya nda Zambe a bisaé bife Belévit ba yiane bo

¹ Minsamba bebaʼale mimbé: e be bone be Koré: Meselémiahu, e mone Koré, môte ya bone bʼAsaf.

² Bone Meselémiahu: Zakari ntôl, Yediaél ébatan, Zabadyahu e mone lale,

³ Yatniel e nyô nyini, Elam e nyô tane, Yôanañ e nyô samane, Elyoénayi e nyô zamgbwale.

⁴ Bone bʼObéd-Edom: Semaéya ntôl, Yehôzabad nyô baa, Yôa e mone lale, Sakar e nyô nyini, Natanaél e nyô tane,

⁵ Ammiél e nyô samane, Isakar e nyô zamgbwale, Peultayi e nyô muame, amu Zambe a nga botane nye.

⁶ Mone wé Semaéya a nga biaé bon mbe be nga bili éjôé ya nda bôte jap amu be mbe biwôlô bi bôte mewosan.

⁷ Bone be Semaéya: Otni, Refaél, Obéd, Elzabad a bobenyañe bé be too biwôlô bi bôt môé na: Elihu a Samakyahu.

⁸ Balé bete bese be mbe bone bʼObéd-Edom; bebien, bone bap a bobenyañe bap be mbe biwôlô bi bôt njalan a ngul mfaʼa yʼésaé, bôte ya bʼObéd-Edom mewôm mesaman a bebaé.

⁹ Bon a bobenyañ be Mekelémiahu, biwôlô bi bôt, be mbe awôm a muam.

¹⁰ Hôsa ya bone be Merari a nga biaé bon ana: Simri évet, ésaa nye a nga telé nye évet, akôsa bo na sa ke nye a mbe ntôl,

¹¹ Hilkiyahu ébatan, Tebaliahu e mone lale, Zakari e nyô nyini. Bon a bobenyañe be Hôsa be mbe awôm a belaa.

¹² Minsamba bebaʼale mimbé mite, bivete ya bôt bete avale fe ane bobenyañe bap be nga too éyoñ ése asu ésaé ya nda Nti.

¹³ Be nga bo asimba asu mbé ôse bongô a benya bôtô ane menda me bôte map me né.

¹⁴ Asimba é nga liti Selémiahu asu mfaʼa jôp da tôô. Be nga bo asimba asu mone wé Zakari nye a mbe mve melep a yeme yen, asimba é nga ve nye mfaʼa yʼakôé.

¹⁵ Obéd-Edom a nga nyoñ mfaʼa ya nké, bone bé ki be nga nyoñe nda é bili binaane biôm

¹⁶ Kupim ba Hôsa be nga nyoñe mfaʼa jôp da dim ô laté a mbé ba loone Kalékét, ñwô wo yombô mfaʼa zene ja bet. Minsamba bebaʼale mi nga too nkaban avale di:

¹⁷ e jôp da tôô, Belévit besaman, mfaʼa yʼakôé Belévit benyin môs ôse, mfaʼa ya nké, benyin môs ôse, benyin e mevôm ba naane biôm, nkabane minsamba mibaé;

¹⁸ Asu e nda é ne fefel e jôp da dim, bôte benyin e njoñ a bebaé e nda été.

¹⁹ Minsamba bebaʼale mimbé mmie le ya bone be Koré a bone be Merari.

²⁰ Belévit bʼéziñ, bobenyañe bap, be nga lôme be be bo ésaé ya baʼale akume ya nda Zambe a akume biôm bi nʼétyi.

²¹ Mfaʼa bone be Laéden, abume Gerson, be too bivete menda me bôte map, be mbe na: Yehiéli,

²² a bone be Yehiéli, Zétam a monyañe wé Yôél mbe be nga baʼale akume ya nda Nti.

²³ Mfaʼa bone be Amram, ba be Yitsehar, ba be Hébron a ba be Uziél,

²⁴ Sebuél, e mone Gersom, ndaé Môze, nye a mbe mbaʼale akum.

²⁵ E bobenyañ be nga vumane nye be too mvoñ bôt Eliézer be mbe Rehabiahu moné wé, Ezayi mone wé, Yôram moné wé Zikri mone wé a Selômit mone wé,

²⁶ Selômit a bobenyañe bé mbe be nga bili ésaé ya baʼale akume biôm bi nʼétyi mbie njô bôte David a nga telé étyi, nalé fe bivete menda me bôt, bejôô ya betoyini a mintet a ba ya nsamba mewosan;

²⁷ biôm bite bi nga nyoñeban akume nsa été a veban asu mbaʼalane nda Nti.

²⁸ Biôm bise Samuel ñyene mam a nga ve, bi Saül e mone Kis a nga ve, bi Abnér e mone Ner a nga ve, e bi Yôab e mone Seruya a nga ve, a bi bôte mevale mese be nga ve, Selômit a bobenyañ mbe be nga baʼale bie.

²⁹ E bone be Yitsehar, Kenaniahu a bone bé be nga belane be asu mame ya Israél atan, nalé fe ane bejôô a betyiʼi mejô.

³⁰ E bone be Ebroñ, Hakabiahu a bobenyañ, biwôlô bi bôt toyini a mintete zamgbwa, be nga bo ésaé ya jom Israél e Yordane Yat, e jôb da dim, asu ésaé Nti ése a ji njô bôt.

³¹ E mfaʼa bone bʼEbroñ, Yériya a mbe évete jap. Mbu mewôme nyini David a nga jôô, be nga ke ba fas éndane ya mvôʼô Hébron, nde be nga koon, e Yazer, si Galad, biwôlô bi bôte yʼété.

³² Yériya a bobenyañ be mbe bôte toyini a mintete zamgbwa be too biwôlô, bivete menda me bôt mbie njô bôte David a nga telé e be mvôʼô Ruben, mvôʼô Gad a éfas ayoñe Manasé asu mam me Zambe mese a ma me njô bôt.