1 Minkte 24 - Bible en langue Bulu

Betuni nkabane minsamba minyin bivete minsamba Belévit

¹ Minsamba mi bone bʼAron: bone bʼAron: Nabad, Abihu, Eléazar a Itamar.

² Nadab a Abihu be nga taté wu a ésaa wop teke liʼi bon; Eléazar a Itamar be nga bo ésaé betuni.

³ David, nalé fe Sadok ya bone bʼEléazar a Ahimélek ya bone bʼItamar, be nga kabe bone bʼAron avalʼane bisaé biap bi né.

⁴ Bone bʼEléazar be nga bili abui bivet a lôte bone bʼItamar, éyoñe te be nga kabe be avale di na: Bone bʼEléazar be bi bivet awôm a bisamane ya menda bʼésaa, bone bʼItamar ki bivete ya menda bʼésaa muam.

⁵ Be nga kabe be a mboon asimba , bana ba be ba bevok a amu bebo bisaé ya vôm a nʼétyi a bebo bisaé be Zambe be mbe bone bʼEléazar a bone bʼItamar.

⁶ Ntili bekalate Semaéya, e mone Natanaél ya ayoñe Lévi, a nga tili be môé ôsu njô bôt a bebo bisaé ôsu be ntuni Sadok, ôsu be Ahimélek, e mone Abiatar a ôsu be bivete ya menda me bôte betuni a Belévit. Be mbe be nyoñe nda bʼésaa jia asu Eléazar a nyô fok asu Itamar.

⁷ Mboon asimba ôsu ô nga liti Yehôyada; wu baa Yedaéya;

⁸ wu lale Harim; wu nyini Seorim;

⁹ wu tane Malkiya; wu saman Miyamin;

¹⁰ wu zamgbwale Hakôt; wu muame Abiya;

¹¹ wu ébulu Yasua; wu awômô Sekanya Hu;

¹² wu awômô a wua Eliasib; wu awômô a baa Yakim,

¹³ Wu awôm a lale Hupa; wu awôm a nyini Yesébeam;

¹⁴ wu awôm a tane Bilga; wu awôm a samane Imer;

¹⁵ wu awôm a zamgbwale Hézir; wu awômô a muam Hapitsét;

¹⁶ wu awôm a ébulu Pétaya; wu mewôm mebaa Ezékiel;

¹⁷ wu mewôme baa a wua Yakin; wu mewôm mebaé a baa Gamul;

¹⁸ wu mewôm mebaé a lale Delayahu, wu mewôm mebaé a nyini Maziahu.

¹⁹ Avale di nde be nga nyoñe mbeʼe ya ésaé jap, asu ya nyiin e nda Nti, avale nyeʼelan ô né ñwô ésaa wop Aron a nga telé avale Nti, Zambe ya Israél a nga bendé nye.

²⁰ Mfaʼa bone be Lévi be nga liʼi, biyôlé biap mbie bi: e bone be Amram: Kubaél; e Bone be Kubaél, Yedeyahu;

²¹ e be Rehayahu, e be bone be Rehayahu, Yikiya évet.

²² E be bone be Yitseharite: Selômôt; e be bone be Selômôt: Yehat.

²³ Benayi, Yériyahu, Amaryahu môta baa, Yahaziél e môta lale, Yekameam e môta nyini.

²⁴ E mone Uziél: Miké; e be bone Miké: Kamir;

²⁵ monyañe Miké: Yikiya; e be bone be Yikiya: Zakiri.

²⁶ Bone be Merari: Mali a Musi a bendaé bé bone be Yaziahu.

²⁷ Bone be Merari, e be mone wé Yaziahu, Kôham, Zahur a Ibri.

²⁸ E be Mali: Eléazar, nyô a nji biaé bon; e be Kis,

²⁹ bone be Kis: Yerameél,

³⁰ bone be Musi: Mali, Eder a Yerimôt. Bone Belévit mbe le ane menda bʼésaa me né.

³¹ Be fe ane bobenyañ bone be Aron, be nga bo asimba ôsu be njô bôte David, Sadok, Ahimélék a bivete menda me bôte Belévit. Avale te nde e nga boban asu évete ya nda bôt avale fe ane ôyôme môte ya bobenyañ.