1 Minkte 22 - Bible en langue Bulu

¹ Ane David a nga jô na: E ndaa Zambe Nyô ja ye lôñebane va, a ataʼa metunaʼa asu mveane ya Israél ba diʼi ngumba da ye lôñebane va.

David a kômesane nlôñane nda Zambe

² Ane David a nga bendé na be sulan mintabe mi mbe si ya Israél, nde a nga ve beba mekok ésaé ya tyiʼi beta mekok asu nlôñane nda Zambe.

³ David a nga kômesane fe abui mvot, abime be mbe te fe nguleya vek,

⁴ a bilé bi sédre teke alañé, amu Besidônieñ a Betirieñ be nga zu ve David abui bilé bi sédre.

⁵ David a mbe a jôʼô na: Mone wome Solômon a ne mongô a nteʼan; ve ki e too na e nda ja ye lôñeban asu Nti ja ye bete duma dé a étôtoʼo jé nya ôyabe yôp e mesi mese; ajô te ma zu bo ngômesan asu dé. Nalé ate David a nga kômesan abui, éyoñ a ngenane te wu.

⁶ Ane David a nga loone mone wé Solômon a bendé nye na a lôñe Nti, Zambe ya Israél nda .

⁷ David a nga jô Solômon na: A mone wom, me nga bili nkômban ya lôñe nda asu jôé Nti e Zambe wom.

⁸ Ve Nti a nga kobô me na: Ô kuliya abui metyi a bo fe bita bi ne ngu; woo ye ke lôñe nda asu jôé dam amu ô sôéya abui metyi si ôsu viam.

⁹ Tame yen mon a ye bialé be wo, a ye bo e môt a bili awoʼon, amu ma ye ve nye awoʼon éyoñe ma ye kôté nye e be besiñe bé ba bômane nye; amu jôé dé da ye bo na Solômon, a ma ye ve Israél mvoʼé a évôvoé melu ya ényiñe jé.

¹⁰ E nye a ye lôñe nda asu jôé dam. A ye bo e mone wom, a ma ma ye bo nye ésaa; a ma ye yemete éto njôane jé Israél été nnôm éto.

¹¹ Ajô te éyoñe ji, a mone wom, Nti a tabeʼe be wo, éyoñe te e mame môé ma ye ke ôsu a éyoñe te wo ye lôñe ndaa Nti e Zambe wôé, aval a nga jô e mfaʼa wôé!

¹² Nti Emien a kañeseʼe ve wo ñyemane ya yeme wôk nalé fe atyeñ, Emien a vaʼa wo mebendé mé wo yiane kalan Israél asu ya baʼale metiñ me Nti e Zambe wôé!

¹³ Eyoñe te e mame môé ma ye ke ôsu, nge wo bo memvinda a minjôane Nti a nga bendé Môze asu Israél. Boʼo ngu a ayoʼo nlem , te ko woñ nge fôʼôban.

¹⁴ Abime biôme di nde me maneya kômesan a abime ngule dam asu ndaa Nti: betalañ be or toyini ntet, betalañ be argent akutu wua. Mfaʼa mvot a étyé bi ne abui abim be se nguleya vek. Me kômesaneya fe bilé a mekak, wo ye beta beté bilé bife a mekoʼo mefe.

¹⁵ O bili abui bebo bisaé: beba mekok , bôt ba yeme kpwele biôm e mekok a e bilé, a bôt be ne mintyetyeñ e mboone biôm mevale mese.

¹⁶ Or, argent, mvot a étyé bi ne tekʼalañé. Tebeʼe tetele a bo ane fam, a Nti Emien a tabeʼe be wo!

¹⁷ Ane David a nga bendé bivete bise ya Israél na be volô mone wé Solômon:

¹⁸ ye Nti, e Zambe wônan, a nji bo be mia, a ye a nji ve mia awoʼon mekuʼu mese? Amu a nga ve bôt be too si nyô e mo mam, a si éte é ntoo éjôé Nti a ji e bôte bé si.

¹⁹ Ajô te keʼane ñhe minleme mienan a minsisime mienane na mi jeñe Nti, e Zambe wônan; kôlaʼane si mi lôñ e Zambe a too étabaʼa é nʼétyi, éyoñe te mia ye soo éwolo élate Nti a biôm bi ne ntelan étyi asu Zambe e nda ja ye lôñeban a jôé Nti.