1 Minkte 21 - Bible en langue Bulu

Elañe bôt a awu bim

¹ Ane satan a nga ke Israél e ngame yat a tindi David na a lañ Israél.

² David a nga jô Yôab a bivete yʼayoñe na: Kela lañan Israél, ataté Birséba a kui Dañ, a mi kate ma me yem e tañe bôt be né.

³ Yôab a nga yalane na: Nti a boʼo bôte bé be dañe bo abui tañe biyoñe ntet! A njô bôt, e masa wom, ye bese be nji bo bebo bisaé be masa wom? Vʼamu jé e masa wom a sili jame te? Amu jé Israél a ye beʼe mekua?

⁴ Ve nkobô njô bôt ô nga dañe wu Yôab, ajô te Yôab a nga ke a wulu e Israél ase; mvus éte a nga bulan e Yérusalém.

⁵ Nde Yôab a nga kalane David e tañe bôt a nga mane lañ; Israél ase a nga bili bôte mewosan milione jia a ntete toyini; e Yuda, be nga too bôte mewosan toyini mintete minyin a mewôme zamgbwa.

⁶ Ve a nji lañe Belévit nge bôte ya Bényamin, amu woñ ô nga bi Yôab amu abendé njô bôt.

⁷ Zambe a nga wôʼô abendé te abé , nde a nga bibi Israél.

⁸ Nde David a nga jô Zambe na me boya abé e nʼanen nde e ne nlañane bôt! Eyoñe ji kañeseʼe jamé ékobe mbo ésaé wôé, amu me nga bo ane nyô a ne feʼe momo!

⁹ Nde a nga kobô Gad ñyene mame David na:

¹⁰ Kele jô David na: Avale di nde Nti a jô na: Ma liti wo bibubua bilaa; tobe jia, a ma ye kuli je be wo.

¹¹ Ane Gad a nga kui be David a jô nye na: Avale di nde Nti a jô na:

¹² kañeseʼe jame da: nge mfumbale zaé tañe mimbu mila, nge ébôm ôsu besiñe bôé tañe ngon éla, nkpwaté mekône besiñe bôé ô nambeʼe wo, nge na tañe melu mela, Nti a ye bôme si jôé a e nkpwaté mekône wé éyoñ a ye lôme éngele ya jian a mialane bim e si ése ya Israél? Fasek a kate ma e jam ma yiane ke yalan e môt a lôme ma.

¹³ Ane David a nga yalane Gad na: Me ne e beta ôlun été! A ne mvaé me ku e mo me Nti été amu mvame jé é nʼanen abui; ve me boʼo te ku e mo me bôt!

¹⁴ Nalé Nti a nga bo na bim a dumen Israél été, a bôte toyini mewôme zamgbwale ya Israél be nga wu.

¹⁵ Zambe a nga lôm éngele e Yérusalém na a tyame nye; e zañe ntyamane Yérusalém, nde Nti a nga fombô a jôbane mbia jam ate. A nga jô éngele ntyame tisone na: Tebeʼe! Bulaʼane wo wôé mvus éyoñe ji. Engele Nti a nga tele bebé e nseñe Ornan, mone Yébuzieñ.

¹⁶ Nde David a nga bete mis a yene éngele Nti a tele e zañe si a yôp, nsoé nkpwaté mekône wé ô too nye wo, ô too Yérusalém e ngame yat. Nde David a bemvendé, minkuta e nyô, be nga ku mesu me butu si.

¹⁷ Ane David a nga jô Zambe na: Ye sa ma me nga jô na be lañe bôt? Ma me nga bo abé a ma me nga bo e jam é nʼabé; ve bôte ba be nga bo jé? A Nti, e Zambe wom, e wo wôé ô silaʼane ñhe e nyôle jam a e nda bôte jam, ve ô boʼo te kut ébubua e be bôte bôé!

¹⁸ éngele Nti a nga jô Gad na kobôʼô David, nalé ate a ye bet a lôñe Nti ataʼa metunaʼa e vôme Ornan, mone Yebuzieñ, a wôʼô tyaʼa nlisi.

¹⁹ Ane David a nga bet avalʼane nkobô Gad a nga kobô e jôé Nti ô mbe.

²⁰ Ornan a nga kôñelan a yen éngele Nti. Nde ba be bobefame bé benyin be nga sobô; Ornan a mbe a tyaʼa nlisi.

²¹ Eyoñe David a nga kui e fefele Ornan, Ornan a nga wua dis a yene David, nde a nga kôlô e vôm ba tyaʼa nlisi a kute meboñe si ôsu be David asu é butu si.

²² Ornan a nga jô David na: Vaʼa ma e vôm be wôʼô tyaʼa nlisi nyô, me lôñe Nti ataʼa metunaʼa, vaʼa ma vôm ate mvol a tañe moné vôm ate a yiane kui, nalé ate ébubua ôkon ja ye kôlô be bôt.

²³ Ornan a nga yalane David na: Nyoñe je a masa wom njô bôt a bo je e jam wo ye yene mvaé; ma ve fe beyôme benyak asu mimvean ba diʼi ngumba, mintoñ asu njaʼa, a nlisi asu mveane ya mefup, ma ve biôm bite bise.

²⁴ Ve njô bôt David a nga jô Ornan na: Momo! Ma zu kuse vôm ate avale da yian, mvol a tañe moné jé, amu ma ye bo te soo Nti e jôm é nʼéjôé, a ve mvean wo diʼibane ngumba ô too teke kui tañ!

²⁵ Ajô te David a nga ve Ornan or a too adit bifas mintete misaman asu vôme ya lôñe ataʼa metunaʼa.

²⁶ Nde David a nga lôñe Nti ataʼa metunaʼa vôm ate a ve mimvean ba diʼi ngumba a mi ya nlatane ngbwa. A nga loone Nti, a Nti a nga yalane nye amu nduan é nga so yôp a suan ataʼa metunaʼa mvean ba diʼi ngumba.

²⁷ Eyoñe te Nti a nga kobô éngele, nye ve some nkpwaté mekône wé abam.

²⁸ Melu mete, éyoñ David a yeneya na Nti a nga yalane nye e vôme Ornan mone Yébuzieñ a tyaʼa nlisi, nde a nga ve metunaʼa vôm ate.

²⁹ Ve Tabernakel Nti, Nyô Môze a nga lôñ e nkôte si, a ataʼa metunaʼa asu mimvean ba diʼi ngumba, bi mbe éto yʼékôndôʼô yôp é ne Gabaoñ.

³⁰ Ve David a nji bo nguleya ke wé na a sili nkômbane Zambe, amu nlem ô nga tyele nye yôp amu nkpwaté mekôn éngele Nti.