1 Minkte 19 - Bible en langue Bulu

Beamônite ba té bebo bisaé be David ntañete

¹ Eyoñe mam mete me maneya, Nahas, njô bôte Beamônite, a nga wu a e mone wé a nga jôô éjiane jé.

² Ane David a nga jô na: Ma ye liti Hanun mvam , e mone Nahas, amu ésaa a nga liti ma mvam . Nde David a nga lôme bôte ya volô nye nlem amu awu ésaa.

³ Ve bivete Beamônite be nga jô Hanun na: Ye wo buni na David a lôme wo bevolô minlem amu na a semé ésoo nga? Ye bebo bisaé bé be nji zu be wo asu ya nyoñ, asu ya bulekan a looé si?

⁴ Ajô te Hanun a nga bi bebo bisaé be david, be mane tyeñe be zel, a tyiʼi mengômesane map e zañ a kui mintyeʼe mekan. Eyoñe te a nga suu be be ke.

⁵ Nde be nga zu kate David foé ajô bôte bete, nye ve lôme bôt be ke tôbane be, amu be mbe mbia ôson été; a njô bôt a nga lôme be mbañete na: Tabaʼane Yérikô a kui éyoñ e zele jenan é maneya kui, éyoñe te nje mia ye zu.

⁶ Eyoñe Beamônite be yeneya na be ntoo mbia jôm e mise me David, nde Hanun a Beamônite be nga lôme betalañ be argent toyini, be kuse bevagoñe bita a e bôte ba wulu bikabela yôp be soʼo mezôpôtami, e Aram-Maaka, a e Sôba.

⁷ Be nga kuse bevagoñ toyini mewôm mela a ébaé, a njô bôte ya Maaka a e bôte bé, nde be nga zu vule minkan ôsu tisone Médeba. Ane Beamônite be nga kôlô bitisone biap, be sulane vôme wua a taté dulu ya wosan.

⁸ Ane David a nga wôʼô jame te, a lôme Yôab, nsamba mewosan a biwôlô bi bôt be ke wosane be.

⁹ Nde Beamônite be nga kôlô a tebe minnoñ ya wosan anyiine tison; bejô bôt be nga so be mbe nkandan a nkane bita Beamônite, be too mfaʼa yʼafan.

¹⁰ Eyoñe Yôab a yeneya na mewosan ma ye bo nye mfaʼa ya ôsu a mfaʼa ya mvus, nde a nga tobe bôt ézezañe ya ba ba dañe yeme mewosan Israél été, ane be nga tebe ba Beasirieñ be lôane mesu;

¹¹ A nga telé bôte bevok éjôé monyañ Abisayi si, ba Beamônite be lôane mesu.

¹² A nga jô Abisayi na: Nge Besirieñ be dañe ma ngu éyoñe te wo zu volô ma; nge Beamônite be dañe ma ngu éyoñe te wo zu volô ma; nge Beamônite be dañe wo ngu éyoñe te ma ye zu volô wo.

¹³ Boʼo ngu, nalé fe vaʼa bia ngu asu ayoñe dangan a asu bitison bi Zambe wongan, a Nti a boʼok e jam a ye yene mvaé!

¹⁴ Ane Yôab a nga téé dulu ba be bôt be mbe nsamba wé na be wosane Besirieñ mbe be nga taté na ba tup ôsu vié.

¹⁵ Eyoñe Beamônite be yeneya na Besirieñ be nga tup, nde be fe be nga tup ôsu Abisayi, monyañe Yôab, a bulan e tison; a Yôab ki a nga bulan e Yérusalém.

¹⁶ Eyoñe Besirieñ be nga yene na Israél a bôéya be, be nga lôme minlôman mi ke loone Besirieñ be mbe e Yordane yat; Kôfak, évete ya nsamba mewosane Hadadézer a mbe nlô wop.

¹⁷ Nde be nga kate de David, ane nye ki a nga sulan Israél ase, be dañe Yordan be kui be bebé a tebe nsamba ya wosane be. Ane Besirieñ be nga tup ôsu Israél,

¹⁸ a David a nga wôé be: minsamba mi bili bevagoñ toyini zamgbwa a e bôt ba wulu a mebo toyini mewôm menyin, a nga wôé Kôfak, évete nsamba mewosan.

¹⁹ Eyoñe bebo bisaé be Hadadézer be yeneya na Israél a bôéya be, nde be nga bo élate mvoʼé a David a nyiin éjôé jé si. Ataté éyoñe te, Besirieñ be nji fe kômbô beta volô Beamônite.