1 Minkte 17 - Bible en langue Bulu

David a bi Osimesane ya lôñe nda Zambe

¹ David a too nda jé, nde a jô nkulu mejô Natan na: Tame yene na ma me too e nda besédre, vʼéwolo élate Nti ki é too e bindelé ya nda éndelé si.

² Ane Natan a nga yalane David na: E jam ése ô bili nkômbane ya bo, boʼo de, amu Zambe a ne be wo.

³ Vʼé nga bo na, alu te ebien, Zambe a nga kobô Natan na:

⁴ Kele jô mbo ésaé wom David na: Avale di nde Nti a jô na: Sa ke wo wo ye lôñe ma nda ya tabe.

⁵ Amu me ngenane te tabe nda éziñ ataté e môse me nga soo bone bʼIsraél Ejipte a kui e môse wu. Ve ma zu ma tabe na ma kôlô e nda éndelé nyô ma nyiin e nyô fok, ma kôlô étabaʼa ji ma nyiin e ji évok.

⁶ E vôm ase me wuluya Israél ase été, ye me kobôya wua ya betyiʼi mejô ya Israél éfia éziñ, ba me nga bendé na be ve bôte bame bidi, asu ya jô nye na: Amu jé mi nji lôñe ma nda sédre?

⁷ Ajô te éyoñe ji, wo ye kobô mbo ésaé wom avale di na: Nti a ne ngul ése a jô na: Ma me nga nyoñe wo e vôme biyem bia di, e mvuse mbame biyem, na ô bo évete ya Israél ayoñe dam.

⁸ Me nga too be wo e vôm ase ô nga ke, me maneya vaa besiñe bôé bese ôsu ya asu dôé a ma ye bo jôé dôé ane di biwôlô bi bôte ya si nyô.

⁹ Me nga ye tobe ngume vôm asu ayoñe dam Israél, me telé de na é tabe valé te fe fôʼôban, a bebo mbia be mam be bo te beta ndeñele de,

¹⁰ avale ya melu mvus, a ataté melu me nga telé betyiʼi mejô e be ayoñe dam Israél. Me nga bo na ô vo besiñe bôé. Ma kate wo na ma ye lôñe wo nda .

¹¹ Eyoñe melu môé ma ye bo njalane na ô wu, ma ye bete mvoñ bôte jôé e mvuse jôé, wua ya bone bôé nye a ye tebe njô bôt a ma ye yemete éto njôane jé.

¹² E nye a ye lôñe ma nda , a ma ye telé éto njôane jé nnôm éto.

¹³ Ma ye bo nye ésaa a nye a ye bo mone wom; ma ye bo te vaa nye ndi nleme jam avale me nga vaa je e be nyô a nga too wo ôsu.

¹⁴ Ma ye bo nye na a tabe nda jam a éjôé jam nnôm éto, avale te fe njôane wé wo ye bo ngu nnôm éto

¹⁵ Ane Natan a nga kobô David avalʼane mejô mana mese a ñyenane wuna ôse bi mbe.

¹⁶ Ane David a nga zu tabe e vôme Nti a né a jô na: Me ne za, a Zambe nyô a too, a nda bôte jame ke jé, ane wo kuli ma e nté nkôñe wu?

¹⁷ E too ke na, e mise môé, a Zambe wom, e jam me nga simesane bo wo e ne angôndô ya ôyôme jam; ve ô maneya kobô ajô ya nda mbo ésaé melu abui me ngenan ôsu. Ô yeneya ma ane môte ya e nsamba bôt ô ne mbetane yôp, a Zambe nyô a too.

¹⁸ Jé éfe David a ne nguleya beta jô wo mfaʼa duma ya mbo ésaé wôé? Womien wo yem mbo ésaé wôé.

¹⁹ A Nti, e ne amu mbo ésaé wôé, e too fe avale ane nleme wôé ô né, nde ô boya e beta jame nyô asu ya bo na bôt be yem anene dôé ése.

²⁰ A Nti ô ne teke afunan a avalʼane mam mese bi nga wôʼô melo mangan me né, Zambe mfe a nji bo ve wo.

²¹ Ye ayoñe da ya si nyô e ne ane Israél ayoñe dôé, ayoñe Zambe a nga ke kôté na e bo ayoñe dé, asu ya ve wo jôé e ne anen a angôndô, éyoñ ô nga titane meyoñ bikuu ôsu ya ayoñe dôé ô nga kôté Ejipte.

²² O nga ve womien Israél, ayoñe dôé, na e bo ayoñe dôé nnôm éto, a wo, a Nti, ô ntoo e Zambe wop.

²³ Eyoñe jina ñhe a Nti, nkobô ô maneya kobô mbo ésaé a e nda jé ô boʼo bebela nnôm éto. Boʼok aval ô maneya jô!

²⁴ Nkobô te ô boʼo bebela, a jôé dôé da yiane duma nnôm éto be jôʼô na: Nti, Nyô a ne ngul ése, a ne Zambe Israél, a ne Zambe asu Israél; a e ndaa mbo ésaé wôé David é tebeʼe ngule be wo!

²⁵ Womien, a Zambe wom, ô nga bo mbo ésaé wôé ayemé a jô na: Wo ye lôñe nye nda . Ajô te mbo ésaé wôé a te bi ayoʼo nleme ya yeʼelane wo meyeʼelane ma.

²⁶ Eyoñe ji, a Nti, wo ô ne Zambe, a ô maneya kobô mbo ésaé wôé ajô ya mvome nyô.

²⁷ Eyoñe ji, kañeseʼe ñhe botane nda mbo ésaé wôé, nalé ja ye tabe be wo nnôm éto, amu wo Nti ô ne Nyô a botan a ô ne Nyô a bili bibotan nnôm éto.